ព័ត៌មានជាតិ

ករណីម៉ូតូ០៣គ្រឿង​បុក​គ្នាពេញទំហឹង ​បណ្តាល​ឲ្យ​ឆាបឆេះ​សន្ធោសន្ធៅ និងមានមនុស្សរងរបួសធ្ងន់​

ភ្នំពេញ:​ នា​វេលា​ម៉ោង០​៩និង៤០នាទី​យប់​ថ្ងៃទី​២១ ខែតុលា​ឆ្នាំ​២០២២ម៉ូតូ​ហុងដា​ឃ្លីក​ មួយគ្រឿង ​ជិះ​លឿន​ជ្រុល​ទៅ​បុក​ម៉ូតូ​ស្កុពី ​មួយគ្រឿង ​ជិះ​ឆ្លង​កាត់ផ្លូវបែក​ជាបួន ​​រួចក៏​ជ្រុលទៅ​បុក​ម៉ូតូ​ស្គុពី​មួយគ្រឿង​ទៀត ​បញ្រ្ចាស​ទិសគ្នា ​បណ្តាល​ដួល​អូស​ឆាបឆេះយ៉ាង​សន្ធោសន្ធៅ និងមានមនុស្សរងរបួសធ្ងន់ ទីតាំង​មុខ​កងរាជអាវុធហ្ថត ស្ថិតតាមបណ្ដោយ​ផ្លូវ​១៨២ ​កែងនឹង​ផ្លូវ​២៥៧​ សង្កាត់​ទឹកល្អក់​ទី​២​ ខណ្ឌ​ទួលគោក រាជធានីភ្នំពេញ ​។

ហេតុការណ៍៖ នៅ​មុន​ពេល​កើតហេតុ​គេឃើញស្រ្តី​ម្នាក់ ​ជិះម៉ូតូស្កុពី ពណ៌ស មួយគ្រឿង ពាក់ស្លាកលេខ​ភ្នំពេញ​ 1IL-2643 ធ្វើ​ដំណើរតាម​បណ្តោយ​ផ្លូវ​២៥៧​ មានទិសដៅ​ពី​ជើងទៅត្បូង ពេលមកដល់ត្រង់ចំណុចកើតហេតុ ​បាន​ជិះ​ឆ្លង​កាត់ផ្លូវ​១៨២​ ពេល​នោះ​ស្រាប់​តែ​មាន​ម៉ូតូ​ហុងដា​ឃ្លីក មួយ​គ្រឿង ពណ៌​ស​ ពាក់ស្លាកលេខ​ភ្នំពេញ ​1IH-1101 ជិះ​ដោយ​បុរស​ម្នាក់ ​​តាម​បណ្ដោយ​ផ្លូវ​១៨២​ ទិសដៅ​ពី​កើតទៅលិច​​ក្នុង​ល្បឿន​លឿន ​ជ្រុលទៅបុក​ម៉ូតូ​ស្កុពី​ពេញទំហឹង ​បណ្តាល​ឲ្យ​ម៉ូតូ​ស្កុពី​រងការខូចខាត​ ម្ចាស់​រងរបួស​ស្រាល ​។

ចំណែក​​ម៉ូតូ​ឃ្លីក​បាន​ជ្រុល​ទៅ​មុខចូល​ចំណីផ្លូវម្ខាងទៀត ជ្រុល​ទៅ​បុក​ម៉ូតូ​មួយគ្រឿង​ទៀត​ម៉ាក​ហុងដា​ស្កុពី​ ពណ៌​ស​ ពាក់ស្លាកលេខ​ ភ្នំពេញ ​2IU-8160 ​ជិះដោយ​ប្តី​ប្រពន្ធ​ពីរនាក់ ធ្វើដំណើរ​តាម​បណ្ដោយ​ផ្លូវ​១៨២​ បញ្រ្ចាស​ទិសដៅគ្នា​ជាមួយ​ម៉ូតូ​ឃ្លីក ​បណ្តាល​ឲ្យ​ខូចខាត​ផ្នែក​ខាងមុខ​យ៉ាង​ដំណំ​ ។ រីឯប្តី​ប្រពន្ធ​ទាំង​ពីរ​នាក់​រងរបួស​ស្រាល​ ​ម៉ូតូ​ដួល​អូស​ជា​ច្រើន​ម៉ែត្រ ​បណ្ដាល​ឲ្យ​ឆាបឆេះ​យ៉ាង​សន្ធោសន្ធៅ​ និង​ម្ចាស់​រងរបួស​ធ្ងន់ ​។

នៅក្រោយ​ពេលកើត​ហេតុ ​រថយន្ត​មន្ទីរពេទ្យ​ព្រះ​កុសម:​មក​ដឹក​ជនរងគ្រោះ​ទៅ​សង្គ្រោះ​ភ្លាមៗ ចំណែក​ម៉ូតូ​ទាំង​ពីរ​គ្រឿង​ត្រូវ​បាន​សមត្ថកិច្ច​ជំនាញ​វាស់​វែង​យក​ទៅ​រក្សា​ទុក ​នៅ​អធិការ​ដ្ឋាន​នគរបាល​ខណ្ឌ​ទួល​គោក​ ដើម្បីរង់ចាំ​ធ្វើការ​ដោះស្រាយ​ទៅ​តាម​ផ្លូវ​ច្បាប់ ៕​

មតិយោបល់