បាត់ដំបង: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី២២ ខែតុលា ឆ្នាំ២០២២ វេលាម៉ោង០៩និង៣០នាទីព្រឹក មានប្រជាពលរដ្ឋឈ្មោះ ទេស កៀន ភេទប្រុស អាយុ៦៤ ឆ្នាំ រស់នៅភូមិផ្លូវបំបែក ឃុំព្រៃស្វាយ ស្រុកមោងឫស្សី ខេត្តបាត់ដំបង បានមករាយការណ៍មកសមត្ថកិច្ចប៉ុស្តិ៍នគរបាលរដ្ឋបាលព្រៃស្វាយ គាត់បានប្រទះឃើញអាវុធវែងចំនួន០១ ដើម ម៉ាកAK57 ផលិតនៅប្រទេសសូវៀត (គ្មានបង់និងគ្មានគ្រាប់) ដែលខ្លួនបង់សំណាញ់បាន ស្ថិតនៅចំណុចខាងកើតស្ពានថ្មក្នុងប្រឡាយ១៧មេសា ចម្ងាយប្រហែល៥០ម៉ែត្រ ផ្លូវក្រាលកៅស៊ូឆ្លងទៅស្រុករុក្ខគីរី កាលពីថ្ងៃទី២១ ខែតុលា ឆ្នាំ២០២២ វេលាម៉ោងប្រហែល១១ និង០០នាទី ។
ប្រជាពលរដ្ឋយកមកប្រគល់ជូន ប៉ុស្តិ៍នគរបាលរដ្ឋបាលព្រៃស្វាយ ដើម្បីរក្សាទុកបញ្ជូនទៅផ្នែកជំនាញ ។
ឆ្លៀតក្នុងឱកាសនោះ នគរបាលស្រុកមោងឫស្សី បានថ្លែងអំណរគុណដល់ពលរដ្ឋ ដែលបានរាយការណ៍ជូនសមត្ថកិច្ច ទាន់ពេលវេលា និងបានអំពាវនាវដល់ប្រជាពលរដ្ឋ ដែលរស់នៅក្នុងមូលដ្ឋានទាំងអស់ សូមឲ្យមានការប្រុងប្រយ័ត្នខ្ពស់នូវយុទ្ធភ័ណ្ឌមិនទាន់ផ្ទុះ ឬអាវុធខូចគុណភាពផ្សេងៗ ត្រូវរាយការណ៍ជាបន្ទាន់ជូនសមត្ថកិច្ច ចៀសវាងការកើតមានគ្រោះថ្នាក់ ដោយសារយុទ្ធភ័ណ្ឌ និងអាវុធទាំងនោះជាយថាហេតុ ៕
មតិយោបល់