ភ្នំពេញៈ នាវេលាម៉ោង០២និង២០នាទីយប់រំលងអធ្រាត្រ ថ្ងៃទី០៣ ខែវិច្ឆិកា ឆ្នាំ២០២២ ប្តីប្រពន្ធពីរនាក់ជិះម៉ូតូសណ្តោងរ៉ឺម៉ក មកពីទិញបន្លែយកទៅលក់បន្ត ហើយត្រូវបានក្រុមជនសង្ស័យ ធ្វើសកម្មភាពឆក់កាបូបស្ពាយមិនបានសម្រេច បណ្ដាលឲ្យរេចង្កូតបុកទ្រូងផ្លូវ ទីតាំងទល់មុខមណ្ឌលសុខភាពទឹកថ្លា ស្ថិតតាមបណ្ដោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ហេតុការណ៍៖ នៅមុនពេលកើតហេតុ ជនរងគ្រោះបានបើកម៉ូតូសណ្តោងរ៉ឺម៉កដឹកបន្លែ មួយគ្រឿង ទើបមកពីទិញបន្លែនៅឯផ្សារព្រែកអញ្ចាយកទៅលក់បន្តនៅផ្សារជម្ពូវ័ន បានធ្វើដំណើរតាមបណ្ដោយផ្លូវសហព័ន្ធរុស្ស៊ី ពីកើតទៅលិច មកដល់ត្រង់ចំណុចកើតហេតុ ស្រាប់តែលេចមុខជនសង្ស័យពីរនាក់ ជិះម៉ូតូ០២គ្រឿង តាមពីក្រោយជនរងគ្រោះ ។ បន្ទាប់មកជនសង្ស័យបានធ្វើសកម្មភាពឆក់កាបូបស្ពាយមិនបានសម្រេច ធ្វើឲ្យម៉ូតូសណ្តោងរ៉ឺម៉កជនរងគ្រោះ រេចង្កូតទៅបុកទ្រូងផ្លូវ ធ្លាក់បន្លែពីលើរ៉ឺម៉ករាយពេញផ្លូវ និងជនរងគ្រោះរងរបួស រីឯជនសង្ស័យបាននាំគ្នាជិះគេចខ្លួនពីកន្លែងកើតហេតុបាត់ស្រមោល ។
នៅក្រោយពេលកើតហេតុ សមត្ថកិច្ចបានចុះមកអន្តរាគមន៍ ប៉ុន្តែជនរងគ្រោះមិនមានបាត់បង់ទ្រព្យរបស់អ្វីនោះទេ ហើយក៏បន្តដំណើរទៅមុខ ដើម្បីប្រញាប់ទៅលក់បន្លែ ៕
មតិយោបល់