ភ្នំពេញ: នាវេលាម៉ោង០៩និង៣០នាទីយប់ ថ្ងៃទី០២ ខែវិច្ឆិកា ឆ្នាំ២០២២ មានករណីគ្រោះថ្នាក់ចរាចរណ៍ មួយបានកើតឡើង ម៉ូតូបុរសម្នាក់ជិះម៉ូតូស្កុពីមួយគ្រឿង បោះពួយយ៉ាងលឿន ដោយខ្វះការប្រុងប្រយ័ត្ន បានវ៉ាជែងជ្រុលទៅបុកម៉ូតូមួយគ្រឿងទៀតពេញទំហឹងខ្ទាតទៅបុករថយន្ត បណ្តាលឲ្យរងរបួសធ្ងន់សន្លប់ពីរនាក់ ទីតាំងនៅក្បែរផ្សារសែនមេត្រី ស្ថិតតាមបណ្ដោយផ្លូវ១៧ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
ហេតុការណ៍៖ នៅមុនពេលកើតហេតុ គេឃើញបុរសម្នាក់បើកបររថយន្តម៉ាកហ្វតរ៉ែនជ័រ មួយគ្រឿង ពណ៌ស ពាក់ស្លាកលេខភ្នំពេញ2BU-2078 ធ្វើណើរតាមបណ្ដោយផ្លូវ១៧ ទិសដៅពីជើងទៅត្បូង ពេលនោះមានម៉ូតូមួយគ្រឿងម៉ាក ហុងដាស្កុពី ពណ៌ខ្មៅ ពាក់ស្លាកលេខភ្នំពេញ 1JH-8695 ជិះដោយបុរសម្នាក់ ស្របទិសគ្នាតាមពីក្រោយរថយន្តក្នុងល្បឿនលឿន មកដល់ត្រង់ចំណុចកើតហេតុ បានបើកវ៉ាជែងខាងឆ្វេងរថយន្ត ដោយមិនបានប្រុងប្រយ័ត្ន ក៏ជ្រុលទៅបុកចំពីមុខម៉ូតូមួយគ្រឿងទៀតម៉ាក ហុងដាស្កុពី ពណ៌ស ពាក់ស្លាកលេខ ភ្នំពេញ 1IU-2677 ដែលជិះដោយបុរសម្នាក់ ក្នុងទិសដៅបញ្រ្ចាសគ្នា ហើយម៉ូតូស្កុពីពណ៌ខ្មៅ ក៏បានខ្ទាតទៅបុកចំពីមុខក្រោយរថយន្ត បណ្តាលឲ្យបែកចង្កៀងនិងក្រពឹតផ្នែកខាងក្រោយចំហៀងខាងឆ្វេង ។ ចំណែកម៉ូតូទាំងពីរគ្រឿងបានរងការខូចខាតយ៉ាងដំណំ រីឯអ្នកបើកបរម៉ូតូពីរនាក់សន្លប់ ត្រូវរថយន្តដឹកយកទៅសង្គ្រោះ ។
នៅក្រោយពេលកើតហេតុ សមត្ថកិច្ចជំនាញបានចុះវាស់វែង យករថយន្តនិងម៉ូតូទាំងពីរគ្រឿងទៅរក្សាទុក នៅអធិការដ្ឋាននគរបាលខណ្ឌមានជ័យ ដើម្បីរង់ចាំធ្វើការដោះស្រាយទៅតាមផ្លូវច្បាប់ ៕
មតិយោបល់