ភ្នំពេញៈ នាវេលាម៉ោង១២និង២០នាទីយប់រំលងអធ្រាត្រឈានចូលថ្ងៃទី១២ ខែធ្នូ ២០២២ មានករណីគ្រោះថ្នាក់ចរាចរណ៍ មួយបានកើតឡើង រថយន្ត Camry មួយគ្រឿង ជ្រុលទៅបុកពីក្រោយរថយន្ត Masda BT-50 មួយគ្រឿង ចតនៅលើចិញ្ចើមផ្លូវ ហើយបើកគេចទៅបុកម៉ូតូពីរគ្រឿងទៀត ទីតាំងស្ថិតតាមបណ្ដោយផ្លូវទន្លេសាប សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
ហេតុការណ៍៖ នៅមុនពេលកើតហេតុគេឃើញបុរសម្នាក់ ស្រវឹងជោកបើករថយន្ត Camry មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2BL-2558 ធ្វើដំណើរតាមបណ្ដោយផ្លូវទន្លេសាប មានទិសដៅពីត្បូងទៅជើងក្នុងល្បឿនលឿន មកដល់ចំណុចកើតហេតុស្រាប់តែរេចង្កូតជ្រុលទៅបុកពីក្រោយរថយន្ត Masda BT-50 មួយគ្រឿង ពណ៌ស ពាក់ស្លាកលេខ ភ្នំពេញ 2BC-0453 ចតនៅលើតាមចិញ្ចើមផ្លូវ បណ្តាលឲ្យក្រពឹតផ្នែកខាងក្រោយចំហៀងខាងស្ដាំ ចំណែករថយន្តបង្កហេតុបានរងការខូចខាតផ្នែកខាងមុខចំហៀងខាងស្ដាំយ៉ាងដំណំ រីឯអ្នកបើកបររថយន្តមិនឈប់នោះទេ បានបន្ថែមល្បឿនបើកគេចចេញពីកន្លែងកើតហេតុ ត្រូវបានប្រជាពលរដ្ឋជិះម៉ូតូដេញតាមពីក្រោយ ហើយរថយន្តនោះក៏បានបើកក្រឡឹងជុំវិញសណ្ឋាគារសុខាភ្នំពេញ ។ លុះពេលមកដល់ក្បែរកន្លែងកើតហេតុវិញ រថយន្ដនោះក៏បានជ្រុលបុកម៉ូតូពីរគ្រឿងទៀត ដែលឈប់ចតស្ងៀមនៅលើចិញ្ចើមផ្លូវ បណ្តាលឲ្យរងការខូចខាត ។ ពេលនោះសមត្ថកិច្ចចុះមកអន្តរាគមន៍ បន្ទាប់មកម្ចាស់ម៉ូតូទាំងពីរគ្រឿងនោះ មិនចង់មានរឿងវែងឆ្ងាយ ក៏លើកម៉ូតូជិះចេញទៅបាត់ ។
នៅក្រោយពេលកើតហេតុ ភាគីទាំងពីរក៏បានចរចាគ្នា ដោយមិនចង់មានរឿងវែងឆ្ងាយខាងរថយន្តCamryក៏ព្រមយករថយន្ដMasda ទៅជួសជុលឲ្យឡើងវិញដើម្បីបញ្ចប់រឿង ៕
មតិយោបល់