ពោធិ៍សាត់: យោងតាមផេក ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា កាលពីថ្ងៃទី០៣ ខែ​ធ្នូ ឆ្នាំ២០២២ វេលាម៉ោង​៧ និង០០នាទី​ ដោយទទួលបានពាក្យបណ្ដឹងពីប្រជាពលរដ្ឋ កម្លាំងជំនាញព្រហ្មទណ្ឌនៃអធិការដ្ឋាននគរបាលស្រុកក្រគរ បានសហការជាមួយកម្លាំងប៉ុស្តិ៍នគរបាលរដ្ឋបាលអន្សាចំបក់ បានចុះស្រាវជ្រាវមុខសញ្ញាលួច (ម៉ូតូ) នៅចំណុចផ្ទះជនរងគ្រោះឈ្មោះ ដាញ់ សារ៉ាន ភេទ​ ប្រុស​ អាយុ៣៤ឆ្នាំ រស់នៅ ក្នុងភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិ៍សាត់ ។

សម្ភារ:បាត់៖ ម៉ូតូ១គ្រឿង ម៉ាក់ហុងដាដ្រីម សេរីឆ្នាំ២០១៧ ពណ៌ខ្មៅ ផ្លាកលេខ ភ្នំពេញ 1GM 7199 (រកឃើញ) ម៉ូតូ១គ្រឿង ម៉ាកវ៉េវ សេរីឆ្នាំ២០១៥ ពណ៌ខ្មៅ ផ្លាកលេខគ្មាន (រកមិនឃើញ) យោងតាមកំណត់ហេតុបំភ្លឺជនរងគ្រោះ នៅថ្ងៃទី០២ ខែ​ធ្នូ ឆ្នាំ២០២២ វេលាម៉ោង​៨ និង ០០នាទី​យប់ខ្លួនបានជិះម៉ូតូមករក្សាទុកនៅក្នុងផ្ទះ និងម៉ូតូអូសរម៉ក់នៅក្រោយផ្ទះលុះព្រឹកឡើងថ្ងៃទី៣ ខែធ្នូ ឆ្នាំ២០២២ វេលាម៉ោង ៣និង ១០នាទីទើបខ្លួនដឹងថា បាត់ម៉ូតូ ២គ្រឿង ក្រោយមកទើបខ្លួនប្ដឹងសមត្ថកិច្ចចុះស្រាវជ្រាវឆែកកាមេរ៉ាសុវត្ថិភាព ឃើញសកម្មភាពចោរនៅវេលាម៉ោង០០ និង ៥០នាទី បានចូលផ្ទះយកម៉ូតូចេញទៅបាត់ ។

តាមរបាយការណ៍របស់អធិការដ្ឋាននគរបាលស្រុកក្រគរ បានឲ្យដឹងថា បន្ទាប់ពីបានទទួលពាក្យបណ្តឹងពីជនរងគ្រោះ កម្លាំងសមត្ថកិច្ចនគរបាលបានសហការគ្នាចុះស្រាវជ្រាវ និងតាមចាប់ឃាត់ខ្លួនជនមុខសញ្ញាខាងលើ រហូតមកដល់ថ្ងៃទី២៩ ខែធ្នូឆ្នាំ២០២២ ទើបចាប់ឃាត់ខ្លួនបានជនសង្ស័យ១នាក់ឈ្មោះ សេន ស៊ុលគីសភ្លី ភេទប្រុស អាយុ ២០ឆ្នាំ សញ្ជាតិខ្មែរឥស្លាម ទីលំនៅបច្ចុប្បន្នភូមិខ្លាក្រើពើរ ឃុំអន្លង់ត្នោត ស្រុកក្រគរ ខេត្តពោធិ៍សាត់ នៅចំណុចផ្ទះជនសង្ស័យតែម្តង ក្នុងចំណោមបក្សពួក២នាក់ ។

របាយការណ៍នេះបានឲ្យដឹងទៀតថា កម្លាំងនគរបាលបានចាប់ឃាត់ខ្លួន និងបញ្ជូនជនសង្ស័យមកកាន់អធិការដ្ឋាននគរបាលស្រុកក្រគរ តាមបញ្ជារបស់ឯកឧត្ដម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ ចុះថ្ងៃទី២៩ ខែធ្នូ ឆ្នាំ២០២២ វេលាម៉ោង ១៣និង ៣៧នាទី ដើម្បីចាត់ការបន្តទៅតាមនីតិវិធី ចំពោះម៉ូតូ១គ្រឿងដែលបានរកឃើញនៅផ្ទះជនសង្ស័យខាងលើ ត្រូវបានកម្លាំងសមត្ថកិច្ចនគរបាល ប្រគល់ឲ្យទៅម្ចាស់ម៉ូតូដែលជាជនរងគ្រោះវិញ ៕