បាត់ដំបង: យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា ថ្ងៃអាទិត្យ ១០កើត ខែបុស្ស ឆ្នាំខាល ចត្វាស័ក ព.ស. ២៥៦៦ ត្រូវថ្ងៃទី០១ ខែធ្នូ ឆ្នាំ២០២៣ វេលាម៉ោង១៤និង១០នាទី អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ឯក ប៉ាន់ វ៉ាន់នី អធិការនគរបាលស្រុកបាណន់ បានដឹកនាំកម្លាំងផ្នែកជំនាញនៃអធិការដ្ឋាននគរបាលស្រុក រួមជាមួយកម្លាំងប៉ុស្តិ៍នគរបាលរដ្ឋបាល ចុះបង្ក្រាបករណីលេងល្បែងស៊ីសងខុសច្បាប់(ប្រជល់មាន់) នៅក្នុងមូលដ្ឋាននៅចំណុចភូមិអន្លង់តាម៉ី ឃុំឈើទាល ស្រុកបាណន់ ខេត្តបាត់ដំបង និងបានអប់រំធ្វើកិច្ចសន្យាបញ្ឈប់ល្បែងស៊ីសងចំនួន០៣នាក់ ។
១.ឈ្មោះ រើន ចាន់រិទ្ធ ភេទប្រុស អាយុ ៣៣ឆ្នាំ មានទីលំនៅភូមិអន្លង់តាម៉ី ឃុំឈើទាល ស្រុកបាណន់ ខេត្តបាត់ដំបង
២.ឈ្មោះ មុត វី ភេទប្រុស អាយុ ៥៥ឆ្នាំ មានទីលំនៅភូមិអន្លង់តាម៉ី ឃុំឈើទាល ស្រុកបាណន់ ខេត្តបាត់ដំបង
៣.ឈ្មោះ សុច សុវណ្ណ ភេទប្រុស អាយុ ៥៥ឆ្នាំ មានទីលំនៅភូមិចម្ការស្វាយ ឃុំឈើទាល ស្រុកបាណន់ ខេត្តបាត់ដំបង។
វត្ថុតាងដកហូតរួមមាន៖
– មាន់ឈ្មោលចំនួន ០២ក្បាល ។
– ស្បៃអ៊ុយហ៊ុំធ្វើសង្វៀនសម្រាប់ប្រជល់មាន់ចំនួន ០១ផ្ទាំង ។
– ក្រណាត់ក្រាលសង្វៀនប្រជល់មាន់ ០១ផ្ទាំង ។
– ឆ្នាំងដាំទឹកស្អំមាន់ចំនួន០១ ។
– ធុងជ័រដាក់ទឹកចំនួន០១ ។
– ម៉ូតូចំនួន០៥គ្រឿង ។
– ទូរស័ព្ទដៃចំនួន០១គ្រឿង ។
ពេលនាំខ្លួនមកធ្វើការសាកសួរនៅអធិការដ្ឋានរួចមក អ្នកលេងល្បែងស៊ីសងខុសច្បាប់ទាំង០៣នាក់ខាងលើ ត្រូវបានធ្វើការអប់រំនិងកិច្ចសន្យាឱ្យបញ្ឈប់សកម្មភាពនេះបន្តទៀត រួចអនុញ្ញាតឱ្យគ្រួសារមកធានាត្រឡប់ទៅមូលដ្ឋានវិញ ៕
មតិយោបល់