កំពង់ស្ពឺ : យោងតាមផេក អគ្គស្នងការដ្ឋាននគរបាលជាតិ នៅថ្ងៃសុក្រ៧រោច ខែបុស្ស ឆ្នាំខាល ចត្វាស័ក ព.ស.២៥៦៦ត្រូវនឹងថ្ងៃទី១៣ ខែមករា ឆ្នាំ២០២៣ វេលាម៉ោង០៩ និង៣៥នាទី នៅលើផ្លូវជាតិលេខ៤ ចន្លោះគីឡូម៉ែត្រលេខ៤៥-៤៦ ត្រង់ចំណុចភូមិមុខខេត្ត សង្កាត់រការធំ ក្រុងច្បារមន ខេត្តកំពង់ស្ពឺ មានករណីគ្រោះថ្នាក់ចរាចរណ៍រថយន្តបុកម៉ូតូបត់ឆ្លងផ្លូវ បណ្តាលឲ្យមនុស្សម្នាក់ស្លាប់ និងម្នាក់ទៀតរងរបួសស្រាល ។
តាមការបញ្ជាក់ពីសមត្ថកិច្ចបានឲ្យដឹងថា មុនពេលកើតហេតុ មានរថយន្ត១គ្រឿង ម៉ាកHYUNDAI ពណ៌ស ពាក់ស្លាកលេខកំពង់ឆ្នាំង 3A-0637 អ្នកបើកបរមិនទាន់ស្គាល់អត្តសញ្ញាណ(ចុះរត់គេច) បើកបរពីទិសខាងលិចទៅទិសខាងកើត ។ លុះមកដល់ត្រង់ចំណុចដូចខាងលើ បានទៅបុកម៉ូតូ ១គ្រឿង ម៉ាកHONDA WAVE 100CC ពណ៌ខ្មៅ ពាក់ស្លាកលេខកំពង់ស្ពឺ 1K-5450 អ្នកបើកបរឈ្មោះរឿន ធនបូរ៉ារ័ត្ន ភេទស្រី អាយុ១៥ឆ្នាំ រស់នៅភូមិរំលោងប្រឃ្លះ សង្កាត់សុព័រទេព ក្រុងច្បារមន ខេត្តកំពង់ស្ពឺ និងអ្នករួមដំណើរម្នាក់ឈ្មោះ យ៉ែម សុនីតា ភេទស្រី អាយុ១៤ឆ្នាំ រស់នៅភូមិទួលធ្នង់ សង្កាត់រការធំ ក្រុងច្បារមន ខេត្តកំពង់ស្ពឺ ដែលកំពុងតែបើកបរនៅខាងមុខស្របទិសគ្នាហើយបត់ឆ្វេងឆ្លងផ្លូវ បណ្តាលឲ្យឈ្មោះយ៉ែម សុនីតា ស្លាប់នៅកន្លែងកើតហេតុ និងឈ្មោះ រឿន ធនបូរ៉ារ័ត្ន រងរបួសស្រាល ។
ក្រោយកើតហេតុ សមត្ថកិច្ចជំនាញបានចុះវាស់វែង និងធ្វើកំណត់ហេតុ ប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី ។ ចំពោះវត្ថុតាងទាំង០២គ្រឿង យកទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីចាត់ការតាមនីតិវិធី ៕
មតិយោបល់