កាលពីថ្ងៃទី ១២ខែ១២ ឆ្នាំ ២០១២ ម្សិលមិញនេះ កូរ៉េខាងជើងបានលួចបាញ់គ្រាប់រ៉ូកែត ហើយលទ្ធផលគឺទទួលបានជោគជ័យ ប៉ុន្តែមានប្រទេសជាច្រើនបានធ្វើការថ្កោលទោសទៅលើប្រទេសមួយនេះ។
ខណៈពេលដែលមានប្រទេសជាច្រើនមានប្រតិកម្ម និងថ្កោលទោស សាធារណរដ្ឋប្រជាធិបតេយ្យប្រជាមាណិតមួយនេះ បានអះអាងថា ការបាញ់បង្ហោះផ្កាយរណបរបស់ខ្លួនគឺគ្រាន់តែធ្វើឡើងក្នុងទិសដៅសន្តិភាព និងវិទ្យាសាស្ត្រប៉ុណ្ណោះ។
អ្នកនាំពាក្យរដ្ឋមន្ត្រីការបរទេសកូរ៉េខាងជើង បាននិយាយថា មិនខ្វល់ពីសម្ដីរបស់បណ្តាប្រទេសដទៃទៀត លើកឡើង បែបណានោះទេរដ្ឋាភិបាលក្រុងព្យុងយ៉ាងនៅតែបន្តក្នុងការអនុវត្តនូវសិទ្ធិស្របច្បាប់របស់ខ្លួន ក្នុងការបាញ់បង្ហោះផ្កាយរណប។
អ្នកនាំពាក្យដដែលបានបន្តទៀតថា បណ្តាប្រទេសដែលបានលើកឡើងថា ការបាញ់បង្ហោះផ្កាយរណបនេះ ជាការរំលោភ ទៅលើសេចក្តីសម្រេចរបស់ក្រុមប្រឹក្សាសន្តិសុខអង្គការ សហប្រជាជាតិ និងថាវាជាគ្រាប់មីស៊ីលចម្ងាយឆ្ងាយនោះ កំពុងតែបង្កើនបុព្វហេតុ នៃភាពតានតឹងឡើង វាស្តែងឡើងតាមរយៈការប្រឆាំងជំទាស់ ចំពោះ ប្រទេសកូរ៉េខាងជើង។
គួរបញ្ជាក់ផងដែរថា គ្រាប់រ៉ុក្កែតកូរ៉េខាងជើង ដែលត្រូវបានបាញ់បង្ហោះនៅវេលាម៉ោងប្រមាណជា ៩ និង៤៥នាទីព្រឹក ម៉ោងក្នុងតំបន់ កាលពីថ្ងៃពុធ ទី១២ ខែធ្នូ ឆ្នាំ២០១២កន្លងទៅនេះ នៅមជ្ឈមណ្ឌលលំហអាកាស Sohae ស្ថិត នៅភាគខាងជើង ខេត្ត Phyongan ត្រូវបានបាញ់ចូលទៅកាន់តារាវិថី ប្រកបដោយភាពជោគជ័យ៕
មតិយោបល់