ភ្នំពេញ ថ្ងៃទី 13 ខែធ្នូ ឆ្នាំ 2012 Axiata Group Berhad (ហៅកាត់ថា Axiata) ជាក្រុមហ៊ុនទូរគមនាគមន៍ធំជាងគេបង្អស់មួយនៅអាស៊ី បានចេញសេចក្តីប្រកាស នៅថ្ងៃនេះ អំពីការរួមបញ្ចូលគ្នាតែមួយរវាងក្រុមហ៊ុន Hello Axiata Company Limited (ហៅកាត់ថា “Hello”) និង ក្រុមហ៊ុន Latelz Company Limited (ហៅកាត់ថា “Latelz”)។
ការរួមបញ្ចូលគ្នានេះ នឹងបង្កើតចេញជាក្រុមហ៊ុនទូរគមនាគមន៏ធំជាងគេបង្អស់ទី2 នៅកម្ពុជា ដែលមានអតិថិជនសរុបចំនួន 5លាននាក់។
លោក សៃម៉ុន ពើរឃីន (Simon Perkins) អគ្គនាយកប្រតិបត្តិរបស់ក្រុមហ៊ុនHello Axiata បានមានប្រសាសន៍ថា នេះគឺជាពេលវេលាដ៏ សមស្រប សំរាប់ការរួមបញ្ចូលគ្នា ក្នុងទីផ្សារ ទូរគមនាគមន៍ នៅកម្ពុជា។
“ក្នុងពេលបច្ចុប្បន្ននេះទីផ្សារកម្ពុជាមានក្រុមហ៊ុនទូរគមនាគមន៍ ចំនួន 9 ហើយយើងខ្ញុំមានជំនឿថា តាមរយៈ ការរួមបញ្ចូលគ្នា ចំនួនប្រតិបត្តិករនឹងថយចុះមក ត្រឹម 3 ទៅ 5 ប៉ុណ្ណោះ។ ពេលវេលាគឺពិតសមស្របណាស់ ហើយយើងក្នុងនាមជាក្រុមហ៊ុន Smart Mobile និង Hello ពិតជាមានមោទនភាពក្រៃលែង ក្នុងការធ្វើជាអ្នកនាំមុខគេនៅប្រទេសកម្ពុជា។”
លោក ពើរឃីន បន្តទៀតថា ការរួមបញ្ចូលគ្នានេះ នឹងធ្វើអោយក្រុមហ៊ុនកាន់តែធំ និង មានប្រៀបលើសគេខាងផ្នែកតម្លៃ ព្រមជាមួយនឹងការ កាត់បន្ថយចំណាយណាដែលគ្មានភាពចាំបាច់។ ម្យ៉ាងវិញទៀត ការរួមបញ្ចូលគ្នានេះ មុខជាជួយសំរួលដល់ការពួតផ្តុំកម្លាំងគ្នា និងការចែករំលែកគ្នា
ទៅវិញទៅមក នូវទំលាប់ការងារដ៏ប្រសើរបំផុត រវាង Hello Axiata និង Smart Mobile។លោក ក៏បានបន្ថែមទៀតផងដែរថា “យើង ជឿជាក់ថា ការរួមបញ្ចូលគ្នា នេះនឹងធ្វើអោយក្រុមហ៊ុនយើងមានមូលដ្ឋានកាន់តែរឹងមាំ និងអនុញ្ញាត្តអោយយើងរីកចំរើនកាន់តែ ខ្លាំងឡើងៗ ថែមទៀត។”
លោក ថូម៉ាស ហ៊ុន (Thomas Hundt) អគ្គនាយកប្រតិបតិ្តរបស់ក្រុមហ៊ុន Latelz មានប្រសាសន៍ថា ក្រុមហ៊ុនរួមនេះនឹង ផ្តល់ជូនទៅអតិថិជនទាំង 5 លាននាក់ ជាមួយនឹងផលិតផល និង សេវាចល័តថ្មីៗដែលនាំមុខគេ ដោយមានតម្លៃសមរម្យ សំរាប់ការប្រើប្រាស់សេវាទូរស័ព្ទចល័តនិយាយរកគ្នា និងការប្រើសេវាអ៊ិនធឺណេតចល័ត។ សំរាប់ការរួមបញ្ចូលគ្នានេះ Smart Mobileនាំមកនូវកិច្ចប្រតិបតិ្តការដ៏មានប្រសិទ្ឋភាព កម្លាំងការងារដ៏មានសមត្ថភាពខ្ពស់ វត្តមានពាណិជ្ជសញ្ញាដ៏ខ្លាំងក្លា ព្រមទាំងមូលដ្ឋានទ្រព្យ និង ហ្វ្រេកង់កាន់តែធំទូលាយទៀតផង ។ ជាមួយគ្នានេះដែរ Hello ក៏មានមូលដ្ឋានអតិថិជនដ៏រឹងមាំ ព្រមទាំង អានុភាព និងទំហំដ៏សំបើមរបស់ Axiata Group ផងដែរ។
លោកហ៊ុន មានមតិបន្ថែមថា “យើងមានក្តីរំភើបរីករាយណាស់ ចំពោះលទ្ឋភាពនានាដែលលេចចេញពីការបញ្ចូលគ្នាតែមួយ ដោយបានពង្រីកសហគមន៏ ក្នុងប្រព័ន្ធ ជូនទៅដល់អតិថិជនរបស់យើងទាំងអស់។ជាមួយគ្នានេះសេវាបំរើអតិថិជន នឹងកាន់តែពង្រឹងថែមទៀត ព្រមជាមួយនឹង ប្រព័ន្ធទូរគមនាគមន៍ចល័តធំជាងគេបំផុតមួយនៅប្រទេសកម្ពុជា ដែលគិតតាមតំបន់សេវាគ្របដណ្តប់ផង និងសមត្ថភាពរបស់ប្រព័ន្ធសេវាផង ។ យើងក៏នឹងមានសាខាលក់ និង ចែកចាយធំទូលាយ ជាងគេបង្អស់ នៅប្រទេសកម្ពុជាផងដែរ។ លោកបានបន្ថែមទៀតថា “យើងខ្ញុំសង្ឃឹមថាការរួមបញ្ចូលគ្នានេះ នឹងចប់ សព្វគ្រប់នៅចុងត្រីមាសទី 1 នៃឆ្នាំ 2013 ក្នុងកំឡុងនេះក្រុមហ៊ុន Hello និង Smart Mobile នឹងនៅតែបន្តប្រតិបត្តិការ រាងៗខ្លួនដូចមុនដដែល និងមិនមានប៉ះពាល់អ្វីដល់សេវាដែលអតិថិជនរបស់យើងកំពុងរីករាយទទួលបាននៅពេលបច្ចុប្បន្ននេះទេ។ជាប្រតិបត្តិករទូរគមនាគមន៏ចល័តនៅព្រះរាជាណាចក្រកម្ពុជា។
Latelz ប្រតិបត្តិការប្រព័ន្ធទូរគមនាគមន៍ចល័តដោយប្រើបច្ចេកវិទ្យា GSM/GPRS/EDGE នៅលើហ្វ្រេកង់ស៍ GSM900 និង GSM1800 រួមជាមួយនឹងបចេ្ចកវិទ្យា 3.75G UMTS/HSPA+ ជាមួយពាណិជ្ជសញ្ញា Smart Mobile និងក្បាលលេខទូរស័ព្ទ 010, 069, 070, 086, 096, 093, និង 098។ សេវា2G របស់ Smart Mobile គ្របដណ្តប់ទូទាំងផ្ទៃប្រទេសនៅក្នុង 24 ខេត្តក្រុង ហើយសេវា 3.75G ក៏មាន 24 ខេត្តក្រុង នៃព្រះរាជាណាចក្រកម្ពុជាផងដែរ។ បុគ្គលិក Smart Mobile មានចំនួនជាង 450 នាក់ ក្នុងនោះមានទាំងអ្នកជំនាញក្នុងប្រទេស និង ក្រៅប្រទេស៕
មតិយោបល់