រាជធានីភ្នំពេញរៀបចំពិធីបួងសួងសុំសេចក្តីសុខក្នុងព្រះរាជពិធី បុណ្យដង្ហែរព្រះបរមរតនៈកោដ្ឋ

សាលារាជធានីភ្នំពេញ បានរៀបចំពិធីសាសនាបួងសួងសុំសេចក្តីសុខ ក្នុងព្រះរាជពិធីបុណ្យដង្ហែរព្រះសព ព្រះមហាវិរ:ក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរព្រះបរមរតនកោដ្ឋ នាថ្ងៃទី១ និងថ្វាយ ព្រះភ្លើងនៅថ្ងៃទី៤ ខែកុម្ភ: ឆ្នាំ២០១៣ ខាងមុខនេះ។ ពិធីនេះត្រូវបានធ្វើឡើងនារសៀលថ្ងៃទី១៥ ខែមករា ឆ្នាំ ២០១៣ នៅរមណីយដ្ឋានវត្តភ្នំ ជាពិសេសនៅបូជនីយដ្ឋានដូនពេញដែលជាស្ថាបនិករាជធានីភ្នំពេញដើម្បីសុំម្ចាស់ទឹកម្ចាស់ដី រៀបចំពិធីដង្ហែរព្រះបរមសព ព្រះបរមរតន:កោដ្ឋឲ្យដំណើរការទៅដោយរលូនប្រកបដោយកិត្តិយសតាមប្រពៃណី វប្បធម៌ជាតិ។ ពិធីបុណ្យបួងសួងនេះប្រព្រឹត្តទៅដោយមានការអញ្ជើញចូលរួមពី លោកជំទាវ ជុំ សាមីន ប្រធានសមាគមនារីដើម្បីសន្តិភាព និងអភិវឌ្ឃន៏រាជធានីភ្នំពេញ តំណាងដ៏ខ្ពង់ខ្ពស់ ឯកឧត្តម កែប ជុតិមា អភិបាលរាជធានីភ្នំពេញ ឯកឧត្តម ឃួង ស្រេង អភិបាលរងរាជធានីភ្នំពេញ ព្រមទាំងមន្ត្រីរាជការក្រោម ឧិវាទសាលារាជធានីភ្នំពេញជាច្រើនផងដែរ។

គួបញ្ជាក់ដែរថា ព្រះរាជពិធីដង្ហែរព្រះបរមសពនឹងធ្វើឡើងនាថ្ងៃទី១ ខែកុម្ភ: ឆ្នាំ ២០១៣ ដោយដង្ហែរតាមវិថី ព្រះស៊ីសុវត្ថិ ផ្លូវបក្សីចាំក្រុង ជុំវិញវត្តភ្នំ និងតាមមហាវិថីព្រះនរោត្តម មកដល់វិមានឯករាជ្យបត់តាមផ្លូវព្រះសីហនុ ឡើងទៅផ្លូវសុធារស និងឆ្ពោះទៅវាលព្រះមេរុដែលព្រះបរមរតន:កោដ្ឋនឹងត្រូវតំកល់នៅទីនោះរហូត ដល់ថ្ងៃទី៤ កុម្ភ: ឆ្នាំ ២០១៣ ដែលជាថ្ងៃថ្វាយព្រះភ្លើងព្រះបរមរតន:កោដ្ឋ។ ក្នុងនាមជាម្ចាស់ផ្ទះ សាលារាជធានីភ្នំពេញមានភារកិច្ច មមាញឹកក្នុងការចូលរួមរៀបចំព្រះរាជពិធីខាងលើនេះឲ្យប្រព្រឹត្តទៅប្រកបដោយភាពវិសេសវិសាល និងឧត្តុង្គឧត្តមដោយបានចាត់វិធានការជាបណ្តើរៗមកហើយ ដើម្បីធានាឲ្យការប្រារព្វពិធីបុណ្យឲ្យប្រព្រឹត្តទៅដោយរលួនតាមការ គ្រោងទុក ក្នុងនោះមានការពង្រឹងសន្តិសុខសណ្តាប់ធ្នាប់ របៀបរៀបរយសាធារណ: បរិស្ថាន និងសោភ័ណភាពក្នុង រាជធានីភ្នំពេញ រួមទាំងការកាត់ខ្សែភ្លើង ខ្សែទូរសព្ទ័ ខ្សែកាបល្ល៏ដែលតកាត់ទទឹងផ្លូវ ក៏ដូចជាការកាប់លះមែកឈើ មិនឲ្យប៉ះពាល់ និងរំខានដល់ការដង្ហែរព្រះបរមសព៕