ប្រហែលជាមុននេះ ១សប្ដាហ៍ មានលេចឮព័ត៌មានថា ទស្សនាវដ្ដីរបស់អាមេរិក Time នឹងកាត់បន្ថយបុគ្គលិក ប៉ុន្តែព័ត៌មាននោះមិនត្រូវបានបញ្ជាក់ពីខាងទស្សនាវដ្ដីនោះទេ។
យោងតាមការចុះផ្សាយរបស់គេហទំព័រ Bloomberg នៅថ្ងៃពុធ ទី៣០ ខែមករា ឆ្នាំ ២០១៣ ម្សិលមិញនេះ បានឲ្យដឹងថា Time បានធ្វើការសម្រេចចិត្តកាត់បន្ថយបុគ្គលិកប្រមាណជា ៥០០នាក់ ស្មើនឹង ៦ភាគរយនៃកម្លាំងពលកម្មសរុប បន្ទាប់ពីការផ្សព្វផ្សាយពាណិជ្ជកម្ម (Advertising) ធ្លាក់ចុះ។
នាយកប្រតិបត្តិក្រុមហ៊ុន Time Inc អ្នកស្រី Laura Lang បានថ្លែងតាមរយៈអ៊ីមេលប្រាប់ Bloomberg ថាបុគ្គលិកដែលត្រូវកាត់បន្ថយនេះគឺមានគ្រប់ផ្នែក។ សញ្ញាណអវិជ្ជមាន តម្រូវឲ្យ Time ត្រូវតែសម្រេចចិត្តកាត់បន្ថយកម្លាំងពលកម្ម ដើម្បីឲ្យក្រុមហ៊ុនមានភាពល្អប្រសើរ ម្យ៉ាងទៀតនេះជាយុទ្ធសាស្ត្រសម្រាប់ឆ្នាំថ្មីផងដែរ។
ការផ្សព្វផ្សាយនៅលើទស្សនាវដ្ដី នាពេលបច្ចុប្បន្ន មានការធ្លាក់ចុះ ដោយសារតែ ប្រព័ន្ធផ្សព្វផ្សាយតាមរយៈអនឡាញមានច្រើន ដោយម្ចាស់ក្រុមហ៊ុនភាគច្រើនបានងាកមកផ្សព្វផ្សាយផលិតផល ឬសេវាកម្មរបស់ខ្លួននៅលើបណ្ដាញអ៊ីនធើណែតវិញ ព្រោះថាវារហ័ស ចំណាយតិច និងគុណសម្បត្តិច្រើន៕
មតិយោបល់