ធនាគារកណ្ដាលរបស់អូស្ត្រាលី ត្រូវបានរងការវាយប្រហារពីសំណាក់ Hacker អនាមិក ប៉ុន្តែបើយោងតាមសម្ដីរបស់អ្នកនាំពាក្យធនាគារ ថាពុំមានការបាត់បង់ទិន្នន័យនោះទេ។
យោងតាមទីភ្នាក់ងារព័ត៌មាន Reuters បានឲ្យដឹងថា ធនាគាររក្សាទុកប្រាក់បម្រុងរបស់អូស្ត្រាលី មិនបានបញ្ចេញមតិអ្វីលើការចុះផ្សាយរបស់ប្រព័ន្ធផ្សព្វផ្សាយនោះទេ ហើយក៏មិនបានចោទប្រកាន់ថា Hacker ដែលវាយប្រហារនោះ មកពីចិនផងដែរ។
ស្ថាប័នរដ្ឋ និងអង្គភាពជាច្រើននៅក្នុងសហរដ្ឋអាមេរិកសុទ្ធសឹងតែរងការវាយប្រហារពីសំណាក់ Hacker ដែលគេជឿជាក់ថា អ្នកនៅពីក្រោយខ្នងនៃការវាយប្រហារគឺចិន ប៉ុន្តែក្រោយពីមានការចោទប្រកាន់បែបនេះ រដ្ឋាភិបាលប៉េកាំងមិនឆ្លើយបដិសេធ និងចោទរដ្ឋាភបាលទីក្រុងវ៉ាស៊ីនតោនថា ចោទប្រកាន់គេដោយគ្មានភស្តុតាងច្បាស់លាស់។
ឯកសាររបស់ធនាគារបានបង្ហាញឲ្យដឹងថា មេរោគដែលវាយប្រហារមកលើធនាគារនេះគឺចូលតាមរយៈអ៊ីមេលមួយមានឈ្មោះថា “Strategic Planning FY2012” ដែលបានផ្ញើចេញពីថ្នាក់ដឹកនាំជាន់ខ្ពស់របស់បុគ្គលិក ទៅកាន់បុគ្គលិករបស់ធនាគាររក្សាប្រាក់បម្រុង ដែលមានបុគ្គលិកចំនួន ៦នាក់បានបើមើលអ៊ីមេលមួយនេះ ទើបធ្វើឲ្យមេរោគមានឱកាសចូលប្រព័ន្ធកុំព្យូទ័របាន ប៉ុន្តែត្រូវបានកម្មវិធីកម្ចាត់មេរោគរបស់ធនាគារចាប់បាន។
គួរបញ្ជាក់ផងដែរថា កាលពីខែកុម្ភៈ កន្លងទៅ បណ្ដាលក្រុមហ៊ុនធំៗនៅសហរដ្ឋអាមេរិក រងការវាយប្រហារពីសំណាក់មេរោគ ដែលត្រូវបានគេជឿថា មានប្រភពមកពីចិន ប៉ុន្តែចិនបានចេញមុខ ដោយបំភ្លឺថា ខ្លួនទេជាអ្នករងគ្រោះនោះ ក្នុងមួយថ្ងៃមានការវាយប្រហារមកលើគេហទំព័ររបស់ក្រសួងការពារជាតិខ្លួនចំនួន ១៤.០០០ដង៕
មតិយោបល់