តើអ្នកជាមនុស្សម្នាក់ក្នុងចំណោមមនុស្ស១.៣០០លាននាក់ ដែលធាត់ ឬមានទម្ងន់លើសមែន ឬទេ? ប្រសិនបើមែននោះពិតជា គួរឱ្យព្រួយបារម្ភបន្តិចដែរ ព្រោះតាមការសិក្សាថ្មីៗនេះ បានរកឃើញថា ប្រសិនប្រៀបធៀបចំនួនភ្នាសកោសិកាខួរក្បាល ជាមួយអ្នកដែលមានទម្ងន់ប្រក្រតីឃើញថា មនុស្សធាត់ (អ្នកដែលមាន BMI ច្រើនជាង៣០%) មានតិចជាងដល់ទៅ៨% ហើយមនុស្សដែលមានទម្ងន់លើស (អ្នកដែលមាន BMI ច្រើនជាង២៥%) មានតិចជាង៤% ដោយខួរក្បាលរបស់មនុស្សទាំងពីរក្រុមនឹងចាស់ជាងអាយុពិតប្រាកដ ដល់ទៅ១៦ឆ្នាំ និង៨ឆ្នាំ តាមលំដាប់។
ការខូចខាតនៃភ្នាសកោសិកាខួរក្បាលដូចខាងលើនេះ អាចបង្កើនការប្រឈមនឹងការកើតជំងឺ វង្វេងវង្វាន់ ភ្លេចភ្លាំង និងជំងឺខួរក្បាល ផ្សេងៗទៀត មិនតែប៉ុណ្ណោះ ជំងឺធាត់ ក៏ជាមូលហេតុនៃជំងឺ បេះដូង ទឹកនោមផ្អែមប្រភេទ២ ជំងឺលើសឈាម និងជំងឺមហារីកប្រភេទខ្លួន។ ទំព័រមុនគេហទំព័រ.ស៊ីវិល័យ បានចុះផ្សាយពីការប្រឈមនៃជំងឺមហារីកសុដន់ចំពោះស្ត្រី ដែលលើសពីនេះក៏អាចបណ្តាលឱ្យបុរសធាត់ ឬដុះក្បាលពោះ ជាក់ស្តែងនៅក្នុងទំព័រនេះ ស៊ីវិល័យ ចង់ឱ្យមិត្តយុវវ័យយល់ដឹងពីអារម្មណ៍តានតឹងរបស់មនុស្សធាត់ ឬដុះក្បាលពោះថា តើពួកគេទាំងនោះមានសភាពយ៉ាងណាទៅ?
ជាការពិតណាស់ គ្មាននរណាម្នាក់ចង់ធាត់ពេក ឬដុះក្បាលពោះនោះទេ ជាពិសេស គឺសុភាពនារីតែងតែមានការខ្លាចរអាលនឹងអាការ:ធាត់ដុះក្បាលពោះនេះ។ មួយក្នុងចំណោមការឈឺចាប់បំផុតនៃការធាត់ អាចជាអារម្មណ៍តានតឹងដែលបណ្តាលមកពីការធាត់។ ជាទូទៅមនុស្សផ្តោតសំខាន់ណាស់ចំពោះរូបរាង ជារឿយៗយុវវ័យចាប់អារម្មណ៍នឹងរាងដែលស្លីម និងមានសាច់ដុំ។ ជាងនេះទៅទៀត មនុស្សធាត់ត្រូវបានគេចាត់ទុកថា ជាអ្នកញ៉ាំច្រើន ខ្ជិល ឬទាំងញ៉ាំច្រើនទាំងខ្ជិល។ មនុស្សធាត់ ជាញឹកញាប់ត្រូវប្រឈមមុខនឹងការប្រកាន់ ឬរើសអើងនៅកន្លែងការងារ សាលារៀន ពេលស្វែងរកការងារ និងនៅក្នុងស្ថានភាពសង្គមផ្សេងៗ។
អារម្មណ៍ដែលត្រូវគេមិនទទួលយក អាចមានដូចជា ៖ ខ្មាស់អៀន ខកចិត្ត ក្រៀមក្រំ ដែលអាចនាំឱ្យកើតមានជំងឺផ្សេងៗទៀត។ ប៉ុន្តែដំណោះស្រាយ មិនមែនត្រូវអង្គុយរង់ចាំទទួលយកអារម្មណ៍បែបនោះទេ តែត្រូវងាកមករកការគ្រប់គ្រងអារម្មណ៍ខ្លួនឯង ក្នុងការញ៉ាំ និងព្យាយាមធ្វើលំហាត់ប្រាណ ឬទៅជួបពិគ្រោះជាមួយវេជ្ជបណ្ឌិត បើពុំដូច្នោះទេ មានតែវិធីមួយគត់ដែលអាចគេចផុតពីអារម្មណ៍តានតឹង គឺទទួលស្គាល់ភាពធាត់របស់ខ្លួនឯង និងគិតថា នេះជារូបរាងដែលយើងត្រូវមាន (I am what I have to be!) ៕
//i1272.photobucket.com/albums/y389/domneng/fat-chick_zpsaae8a074.jpg
មតិយោបល់