មន្ត្រីរដ្ឋាភិបាលជាន់ខ្ពស់ ហ្វីលីពីន បានឲ្យដឹងកាលពីថ្ងៃអង្គារ ម្សិលមិញនេះថា មនុស្សប្រហែល ៥៤៧គ្រួសារ ត្រូវបានផ្លាស់ប្តូរទីលំនៅ ដោយសារទឹកជំនន់ ដែលបានកើតឡើង ត្រង់ចំណុចកណ្តាលនៃប្រទេស ហ្វីលីពីន ក្នុងខេត្ត Samar ស្របពេលដែលខ្យល់ព្យុះត្រូពិច មានឈ្មោះថា “Kong-Rey ឬ Nando” បានបោកបក់កាត់ប្រទេសហ្វីលីពីន។
នៅថ្ងៃទី២៨ ខែសីហា ឆ្នាំ២០១៣នេះ ទីភ្នាក់ងារសារព័ត៌មានចិន ស៊ិនហួ បានចុះផ្សាយដោយលើកឡើងនូវ សម្ដីរបស់អ្នកនាំពាក្យតំណាងប្រធានាធិបតីថា ក្រុមគ្រួសាររងគ្រោះ បានមកពីភូមិចំនួន ១១ ក្នុងខេត្ត Samar បានជ្រកកោននៅសាលា ដែលជាជំរុំ ភៀសខ្លួនបណ្តោះអាសន្ន។
អ្នកនាំពាក្យរូបនេះ បានបន្តថា ទោះបីជាយ៉ាងនេះក្តី រដ្ឋាភិបាលនៅតែបន្តក្រើនរំឭកបង្កើនការ ប្រុងប្រយ័ត្ន ចំពោះខ្យល់ព្យុះផ្សេងទៀត។
ភ្នាក់ងារអាកាសធាតុ បរិយាកាស ភូមិសាស្ត្រ និងតារាសាស្ត្រប្រទេស ហ្វីលីពីន “PAGASA” បាននិយាយថា ខ្យល់ព្យុះ Kong-Rey នៅតែមានកម្លាំងខ្លាំងក្លា និងបន្តបោកបក់ឆ្ពោះទៅរកខេត្ត Batanes ភាគខាងជើងប្រទេស។
PAGASA បានឲ្យដឹងថា ខ្យល់ព្យុះត្រូពិកបានបោកបក់ក្នុងកម្លាំង ៧៥គីឡូម៉ែត្រក្នុង១ម៉ោង ក្បែរតំបន់ភាគកណ្តាល និងមានការកើនឡើង រហូតដល់ ៩០គីឡូម៉ែត្រក្នុង១ម៉ោងទៀតផង៕
ព័ត៌មានជាតិ
មតិយោបល់