ប្រធានាធិបតីរុស្ស៊ី លោកវ្ល៉ាឌីមៀ ពូទីន បានបញ្ជាក់យ៉ាងមុតមាំនៅក្នុងកិច្ចប្រជុំកំពូល G20 កាលពីថ្ងៃសុក្រ កន្លងទៅនេះថា រុស្ស៊ីនឹងបន្តជួយស៊ីរីដល់ទីបញ្ចប់ បើទោះបីជាប្រទេសនេះ កំពុងក្លាយជាផ្ទាំងស៊ិបក្នុងការវាយប្រហារក្ដី។
លោក ពូទីន បាននិយាយថា រុស្ស៊ីនៅតែបន្តផ្គត់ផ្គង់សព្វាវុធ និងរក្សាកិច្ចសហការសេដ្ឋកិច្ចជាមួយនឹងប្រទេសស៊ីរី ហើយនៅពេលនេះ រុស្ស៊ីកំពុងពិចារណាបង្កើនជំនួយមនុស្សធម៌ដល់ប្រជាជនដែលរស់នៅក្នុងប្រទេសស៊ីរី បន្ទាប់ពីសង្គ្រាមផ្ទៃក្នុងអូសបន្លាយអស់រយៈពេល២ឆ្នាំ។
នៅជំនួបកាលពីថ្ងៃថ្មីៗនេះ លោកប្រធានាធិបតីរុស្ស៊ីបាននិយាយថា លោកបានជួបពិភាក្សាជាមួយប្រធានាធិបតីអាមេរិក លោកបារ៉ាក់ អូបាម៉ា អំពីបញ្ហាស៊ីរីតែថា ជំនួបនេះមិនបានបញ្ចប់ការខ្វែងគំនិតគ្នាទេ។
ពូទីនបានប្រាប់អ្នកយកព័ត៌មានថា “កិច្ចពិភាក្សាមានលក្ខណៈស្ថាបនា មានន័យនិងរាក់ទាក់ តែពួកយើងម្នាក់ៗរក្សាជំហររៀងៗខ្លួន”។
លោកពូទីននិងមន្ត្រីរបស់លោកកាលពីពេលមុននេះបាននិយាយថារដ្ឋាភិបាលក្រុងមូស្គូមិនមានបំណងចូលពាក់ព័ន្ធនៅក្នុងជម្លោះនេះទេ តែទោះជាយ៉ាងណា រុស្សីបានបង្កើនវត្តមានកងទ័ពជើងទឹករបស់ខ្លួននៅសមុទ្រមេឌីទែរ៉ាណេ ដែលនាយសេនាធិការរបស់វិមានក្រឹមឡាំងបាននិយាយថា អាចជួយជម្លៀសពលរដ្ឋរុស្ស៊ីចេញពីស៊ីរី បើចាំបាច់៕
មតិយោបល់