កាលពីថ្ងៃទី១០ខែកញ្ញា កន្លងទៅ ក្រុមហ៊ុន Apple បានរៀបចំព្រឹត្តិការណ៍បង្ហាញ iPhone ថ្មី ដែលធ្វើឲ្យមហាជនជាច្រើនរង់ចាំទស្សនា និងតាមដានពីភាពអស្ចារ្យនៃ iPhone ថ្មី ប៉ុន្តែផ្ទុយស្រឡះ ដោយសារតែ iPhone 5S គ្មានអ្វីដែលអស្ចារ្យជាង iPhone 5។
ក្រុមអ្នកវិភាគឯករាជ បានលើកឡើងថា ក្រុមហ៊ុន Apple អាចនឹងបាត់បង់ទីផ្សារស្មាតហ្វូនទាំងនៅសហរដ្ឋអាមេរិក និងចិន ព្រោះទាំងបណ្ដាប្រទេសជាច្រើនទៀត ព្រោះថា iPhone 5S និង iPhone 5C មិនបានធ្វើឲ្យអតិថិជន និងមហាជនចាប់អារម្មណ៍ក្នុងការប្រើប្រាស់។
តាមការស្ទង់មតិ ប្រជាពលរដ្ឋអាមេរិកជាង ៦៨ភាគរយ មិនចាប់អារម្មណ៍នឹងវត្តមាននៃ iPhone 5S នោះទេ ហើយគម្រោងដែលពួកគេគ្រោងនឹងទិញវា ក៏ប្រហែលជាត្រូវលុបចោលផងដែរ ព្រោះថា មានមិនខុសអ្វីពី iPhone 5 ប៉ុន្មានឡើយ។
ព្រមជាមួយគ្នានោះ ភាគហ៊ុនរបស់ Apple ក៏បានធ្លាក់ចុះជាង ៥ភាគរយផងដែរ នៅក្រោយពេលដែល Apple បង្ហាញ iPhone 5S ដល់សាធារណៈជន។
ក្រុមអ្នកគាំទ្រ Apple ជាច្រើនបាននិយាយថា ពួកគេហាក់ដូចជាបាត់បង់ទំនុកចិត្តលើក្រុមហ៊ុន Apple ព្រោះថាក្រោយពេលដែល Steve Jobs ស្លាប់ ក្រុមហ៊ុនមួយនេះ ហាក់ដូចជាគ្មានអ្វីដែលអស្ចារ្យសម្រាប់បង្ហាញដល់អតិថិជន និងពិភពលោកនោះទេ។
គួរបញ្ជាក់ផងដែរថា បើទោះបីជា Tim Cook នាយកប្រតិបត្តិ Apple នាពេលបច្ចុប្បន្នធ្លាប់ធ្វើការងារជាមួយ Steve Jobs ច្រើនឆ្នាំក្ដី ប៉ុន្តែសិល្បៈនៃការដឹកនាំមិនដូច Steve Jobs នោះទេ ជាពិសេសនៅពេលបង្ហាញផលិតផលថ្មីម្ដងៗ Steve Jobs មានសិល្បៈនៃការបង្ហាញ និងនិយាយល្អជាង Tim Cook ដែលធ្វើឲ្យអ្នកចូលរួមមានការចាប់អារម្មណ៍ និងសប្បាយរីករាយ៕
មតិយោបល់