ក្រុមហ៊ុនផលិតរថយន្ត Ford Motor Co នៅថ្ងៃព្រហស្បតិ៍ ម្សិលមិញនេះ បានរាយការណ៍ថា ប្រាក់ចំណេញរបស់ខ្លួននៅត្រីមាសទី៣ ខ្ពស់ជាការរំពឹងទុក។
យោតាមទីភ្នាក់ងារព័ត៌មាន Reuters ចុះផ្សាយនៅថ្ងៃទី២៤ខែតុលា បានឲ្យដឹងថា ប្រាក់ចំណូលសុទ្ធរបស់ Ford បានធ្លាក់ចុះជាង ២២ភាគរយ ដោយចុះមកនៅត្រឹម ១,២៧ពាន់លានដុល្លារអាមេរិក ឬស្មើនឹង ៣១សេនក្នុងមួយភាគហ៊ុន ដោយសារមានការចំណាយជាពិសេសមួយជិត ៥០០លានដុល្លារអាមេរិក រួមបញ្ចូលទាំង ២៥០លានដុល្លារអាមេរិកទៅលើការធ្វើកំណែទម្រង់រោងចក្រនៅតំបន់អឺរ៉ុប។
ក្រុមហ៊ុនបាននិយាយថា ប្រសិនបើមិនរាប់បញ្ចូលទៅលើការចំណាយខាងលើនោះទេ ក្រុមហ៊ុន Ford បានរាយការណ៍ថា ប្រាក់ចំណេញនឹងមាន ៤៥សេនក្នុងមួយភាគហ៊ុន ពោលគឺខ្ពស់ជាងក្រុមអ្នកវិភាគ ដោយបានរំពឹងថា មានត្រឹមតែ ៣៨សេនក្នុងមួយភាគហ៊ុនប៉ុណ្ណោះ។
គួរបញ្ជាក់ផងដែរថា ប្រាក់ចំណូលរបស់ Ford នៅក្នុងត្រីមាសទី៣ កើនឡើង ១២ភាគរយ ស្មើនឹង ៣៦ពាន់លានដុល្លារអាមេរិក៕
មតិយោបល់