សិង្ហបុរី និងហុងកុងជាប់ចំណាត់ថ្នាក់ជាកន្លែងសម្រាប់ធ្វើពាណិជ្ជកម្មល្អបំផុតនៅលើពិភពលោក ខណៈដែលចិនធ្លាក់ទៅនៅបាតតារាង។ នេះបើយោងតាមការអង្កេតពីការប្រកួតប្រជែងប្រចាំឆ្នាំ ដែលត្រូវបានធ្វើឡើងដោយធនាគារពិភពលោក។
ទីភ្នាក់ងារព័ត៌មានចិន ស៊ិនហួ បានចុះផ្សាយថា ទីក្រុងកំពង់ផែពាណិជ្ជកម្មអន្តរជាតិ និងជាមជ្ឈមណ្ឌលហិរញ្ញវត្ថុទាំងពីរនេះ បានជាប់ចំណាត់ថ្នាក់កំពូលនៅក្នុងការអង្កេតអស់រយៈពេល៨ឆ្នាំពេញ ក្នុងនោះប្រទេសនូវែលហ្សេឡង់ អាមេរិក និងដាណឺម៉ាក ជាប់នៅក្នុងចំណោមប្រទេសកំពូលទាំង៥ កាលពីមួយឆ្នាំមុន។
ស៊ិនហួ បានបន្តទៀតថា ចិនដែលជាប្រទេសមានសេដ្ឋកិច្ចធំបំផុតទី២ក្នុងពិភពលោក បានជាប់ចំណាត់ថ្នាក់ទី៩១ កាលពីឆ្នាំមុន នៅពេលនេះត្រូវបានធនាគារពិភពលោកទម្លាក់ចំណាត់ថ្នាក់ទៅទី៩៦ វិញ ជំនួសដោយប្រទេសរុស្ស៊ី។
ទិន្នន័យនេះត្រូវបានផ្អែកទៅលើការអង្កេតរបស់អ្នកជំនាញជាង១០.០០០នាក់ ដែលភាគច្រើនជាប្រជាជន ដែលជួយផ្តល់ដំបូន្មានពីបញ្ហាច្បាប់ និងបទបញ្ញត្តិផ្សេងៗនៅក្នុងប្រទេស ។ គួរបញ្ជាក់ផងដែរ ការផ្ដល់ចំណាត់ថ្នាក់នេះ ត្រូវបានផ្តល់ពិន្ទុទៅលើទំហំនៃបញ្ហា រាប់ចាប់ពីរយៈពេលប៉ុន្មានថ្ងៃ និងនីតិវិធីបែបណាដែលខ្លួនត្រូវធ្វើ ដើម្បីចាប់ផ្តើមពាណិជ្ជកម្ម ៕
មតិយោបល់