ភ្នំពេញ៖ កាលពីពេលថ្មីៗនេះ ខេមមីស (CAMEMIS) កម្ពុជា រួមជាមួយ សាកលវិទ្យាល័យឡឺហាយ សហរដ្ឋអាមេរិក (Lehigh University) បានចុះកិច្ចព្រមព្រៀងរួមគ្នាក្នុងភាពជាដៃគូលើគម្រោងដើម្បីអភិវឌ្ឍ ប្រព័ន្ធគ្រប់គ្រងព័ត៌មានអប់រំលើមុខងារសុខភាពសិស្ស (Health Student) និងមុខងារគ្រប់គ្រងអតីតសិស្សបញ្ចប់ការសិក្សា (Alumni Module) សម្រាប់អង្គការ Caring for Cambodia ។
លោក ស៊ុន រ៉ាពីដ តំណាង ខេមមីស (CAMEMIS) កម្ពុជា បានរៀបរាប់ថា ប្រព័ន្ធគ្រប់គ្រងព័ត៌មានអប់រំ ខេមមីស (CAMEMIS) ដែលជាប្រព័ន្ធមួយផ្តល់អត្ថប្រយោជន៍យ៉ាងច្រើន ចំពោះសាលារៀន សាកលវិទ្យាល័យ ឬស្ថាប័នអប់រំនានា ក្នុង ព្រះរាជាណាចក្រកម្ពុជា ដើម្បីគ្រប់គ្រងការងាររដ្ឋបាលសំខាន់ៗ របស់សាលារៀនទាំងមូលដូចជា ការគ្រប់គ្រងសិស្ស គ្រូ បង្រៀន ម៉ោងបង្រៀន ការបង់ថ្លៃរបស់សិស្ស ការបង់ប្រាក់ខែគ្រូបង្រៀន មុខវិជ្ជា គ្រប់គ្រងថ្នាក់រៀននិងបរិក្ខារសិក្សា កាល វិភាគសិក្សា វិន័យ វត្តមាន ពិន្ទុ សៀវភៅសិក្ខាគារិកជាដើម។
លោកបានបន្ថែមថា ជាការពិតណាស់ ប្រទេសកម្ពុជានៅមិនទាន់មានសាលារៀន ឬសាកលវិទ្យាល័យណាមួយ ដែលដាក់អោយប្រើប្រាស់ប្រព័ន្ធគ្រប់គ្រងព័ត៌មានអប់រំ ដែលមានលក្ខណៈស្របតាមបទដ្ឋានអន្តរជាតិ និងអាចប្រើប្រាស់បាននៅលើបណ្តាញអីនធឺណែតនោះទេ បើទោះបីជាមានការប្រើប្រាស់កម្មវិធីគ្រប់គ្រងសិស្ស ឬគណនេយ្យខ្លះៗ តែពិតជាមានតិចតួចណាស់។ ហេតុដូចនេះហើយ បានជាខេមមីស (CAMEMIS) ត្រូវបានអភិវឌ្ឍឡើង ដែលនឹងលើកប្រសិទ្ធិភាពការងារ ក៏ដូចជាកាត់បន្ថយការចំណាយ និងពេលវេលា ព្រមទាំងដោះស្រាយបញ្ហាស្មុគស្មាញរដ្ឋបាលរបស់សាលារៀន ឬសាកលវិទ្យាល័យនានា ហើយដែលនឹងជួយជំរុញលើកស្ទួយវិស័យអប់រំនៅកម្ពុជាយើង។
លោកសាស្ត្រាចារ្យ Ronald Crane អ្នកដឹកនាំគម្រោងរបស់សាកលវិទ្យាល័យ ឡឺហាយ សហរដ្ឋអាមេរិក (Lehigh University) បានមានប្រសាសន៍ថា បច្ចុប្បន្ននេះ សាកលវិទ្យាល័យមានគម្រោងសហប្រតិបត្តិការជាមួយអង្គការ Caring for Cambodia ដើម្បីបង្កើតប្រព័ន្ធគ្រប់គ្រងអប់រំសម្រាប់ បម្រើអោយសាលារៀនក្នុងខេត្តសៀមរាបទាំង ២៣ កន្លែង ដែលមានចំនួនសិស្សប្រមាណ ៦៥០០នាក់។ បន្ទាប់ពី ក្រុមអ្នកជំនាញរបស់សាកលវិទ្យាល័យ បានចុះដោយផ្ទាល់ដើម្បីប្រមូលព័ត៌មាន វិភាគពីតម្រូវការរបស់សាលារៀនទាំងនោះ ក្រុមអ្នកជំនាញរបស់សាកលវិទ្យាល័យបានផ្តល់អនុសាស្ត្រ និងជ្រើសរើសការប្រើប្រាស់ ប្រព័ន្ធគ្រប់គ្រងព័ត៌មានអប់រំ ខេមមីស (CAMEMIS) ដោយហេតុថារាល់មុខងាររបស់ ខេមមីស (CAMEMIS) បានបំពេញសេចក្តីត្រូវការទាំងស្រុងសម្រាប់គ្រប់គ្រងសាលារៀន និងមានជម្រើសជាច្រើនភាសា ជាពិសេសភាសា អង់គ្លេស និងខ្មែរ ហើយក្រុមអ្នកជំនាញនឹងធ្វើការអភិវឌ្ឍបំពេញបន្ថែមប្រព័ន្ធនេះលើមុខងារសុខភាពសិស្ស និងមុខងារគ្រប់គ្រងអតីតសិស្សបញ្ចប់ការសិក្សា។
មុខងារសុខភាពសិស្ស (Health Student) គ្រប់គ្រងលើប្រវត្តិសុខភាពរបស់សិស្សនីមួយៗ ព័ត៌ចាក់ថ្នាំវ៉ាក់សាំង កំណត់ត្រាអំពីបញ្ហាធ្មេញ ពេលវេលាណាត់ជួបជាមួយគ្រូពេទ្យនាថ្ងៃអនាគត។ល។ ចំពោះ មុខងារគ្រប់គ្រងអតីតសិស្សបញ្ចប់ការសិក្សា (Alumni Module) គ្រប់គ្រងលើលទ្ធផលក្រោយការសិក្សារបស់សិស្ស ព្រមទាំងកត់ត្រានូវព័ត៌មានក្រោយបញ្ចប់ការសិក្សា ដូចជា ការងារ ជាដើម។
សូមជម្រាបថា បន្ទាប់ពីប្រកាសដាក់អោយប្រើប្រាស់ ប្រព័ន្ធគ្រប់គ្រងព័ត៌មានអប់រំ ខេមមីស (CAMEMIS) តាមប្រព័ន្ធផ្សព្វផ្សាយនានារួចមក ខេមមីស (CAMEMIS) កម្ពុជា បានទទួលការស្នើសុំចុះឈ្មោះប្រើប្រាស់ជាបន្តបន្ទាប់ពីសាលារៀន និងសាកលវិទ្យាល័យនានា។ ខេមមីស (CAMEMIS) កម្ពុជា បាននឹងកំពុងរៀបចំបទបង្ហាញ ក៏ដូចជាវគ្គបណ្តុះបណ្តាលនេះជាបន្តបន្ទាប់ទៀតទៅតាមសំណូមពររបស់គ្រឹះស្ថានអប់រំនានា ៕
មតិយោបល់