ផ្ទះឆ្ងាយពីសាលារៀន ឬកន្លែងធ្វើការ ទទួលទានដំណេកជ្រុលម៉ោងចង់សម្រកទម្ងន់ និងមានអារម្មណ៍មិនសូវឃ្លានពេលព្រលឹមគឺជាហេតុផលចម្បងដែលធ្វើឲ្យមនុស្សមិនយកចិត្តទុកដាក់នឹងរបបអាហារពេលព្រឹកដែលជាក់ស្ដែងដើរតួនាទីយ៉ាងសំខាន់ចំពោះសុខភាព។
បើទោះជាអ្នកប្រញាប់ប្រញាល់ ជូនកូនៗទៅសាលាក៏ដោយ សូមប្រាកដថា អ្នកត្រូវមានអាហារពេលព្រឹកជាលក្ខណៈក្រុមគ្រួសារ ហើយសមាជិកម្នាក់ៗមិនត្រូវបំបាត់ចោលម៉ោងអាហារមួយនេះទេ។
ក្រោយពីធ្វើការស្រាវជ្រាវមូលនិធិ Nemours របស់សហរដ្ឋអាមេរិក បាននិយាយថា ការចាប់ផ្ដើមថ្ងៃថ្មីជាមួយនឹងអាហារពេលព្រឹកអាចផ្ដល់នូវអត្ថប្រយោជន៍ជាច្រើនលើសពីការស្មាន។
បន្ទាប់ពីដំណេកអស់ជាង៧ម៉ោង អាហារពេលព្រឹកជួយឲ្យរាងកាយមានថាមពលគ្រប់គ្រាន់សម្រាប់ប្រើប្រាស់នៅថ្ងៃថ្មី។
ជីវជាតិទទួលបានពីអាហារពេលព្រឹក ទំនងនឹងធ្វើឲ្យក្មេងៗ មានរាងកាយសកម្ម មានគំនិតច្នៃប្រឌិតមិននៅធ្មឹងៗអាប់ប្រាជ្ញា ដែលជំរុញឲ្យកុមារឧស្សាហ៍ហើយងាយចងចាំចាប់បានការពន្យល់នៅសាលា។
របបអាហារពេលព្រឹកដែលរួមមានបន្លែ និងគ្រាប់ធញ្ញជាតិ អាចជួយដល់ការរំលាយអាហារ អារម្មណ៍ និងរក្សាតុល្យភាពកម្រិតថាមពល។
ការស្រូបយកសារធាតុបំប៉នពីអាហារពេលព្រឹក អាចគ្រប់គ្រងការឃ្លានញឹកញាប់ដែលឈានទៅរកការហូបអាហារសម្រន់ដែលមានជាតិកូឡេស្ទេរ៉ូលខ្ពស់ថែមទៀតផង៕
មតិយោបល់