កាលពីថ្មីៗនេះ ភាគហុនិករបស់ក្រុមហ៊ុន Nokia បានសម្រេចបោះឆ្នោតលក់អាជីវកម្មទូរស័ព្ទចល័តទៅឲ្យក្រុមហ៊ុន Microsoft ដោយវិនិយោគិនទាំងអស់មានបានរំពឹងទុកថា វានឹងល្អប្រសើរនៅក្រោយពេលលក់អាជីវកម្មមួយនេះ។ ប៉ុន្តែបុគ្គលិកដែលបម្រើការងារនៅក្នុងក្រុមហ៊ុនហ្វាំងឡង់មួយនេះ មិនបានសប្បាយរីករាយនោះទេ។
សារព័ត៌មានចិន Weibo បានចុះផ្សាយថា កម្មករដែលធ្វើការនៅក្នុងរោងចក្រមួយរបស់ Nokia នៅក្នុងប្រទេសចិន បាននាំគ្នាធ្វើកូដកម្ម ដោយកាន់បដាមានសរសេរអក្សរថា “កម្មករគឺមិនមែនជាទំនិញ ឥវ៉ាន់ ឬទាសករនោះទេ។ សូមមេត្តាកុំលក់ពួកយើង។ យើងមានសេចក្ដីថ្លៃថ្នូរ និងសិទ្ធិ”។
ហេតុផលដែលនៅពីក្រោយនៃការធ្វើកូដកម្មនេះគឺដោយសារតែក្រុមហ៊ុន Nokia បានផ្អាក់ការងារបណ្ដោះអាសន្ននៃរោងចក្រ Donggun ហើយកម្មករមិនបានសប្បាយចិត្តទៅលើការកាត់ប្រាក់ខែ ខណៈពេលដែលពួកគេមិនបានធ្វើការ។ ប៉ុន្តែក្រុមហ៊ុន Nokia បានឲ្យដឹងថា រោងចក្រផ្សេងទៀតនៅដំណើរការដូចធម្មតា ដូច្នេះមានន័យថា មានតែរោងចក្រមួយនេះនោះទេដែលផ្អាកដំណើរការ ព្រោះអាចជាប់ពាក់ព័ន្ធនឹងការទិញលក់រវាង Microsoft និង Nokia។ រោងចក្ររបស់ក្រុមហ៊ុន Nokia ត្រូវបានគេរំពឹងថានឹងផ្ទេរទៅឲ្យ Microsoft ទៅតាមកិច្ចព្រមព្រៀង ដូច្នេះហើយក៏ជាផ្នែកមួយដែលនាំឲ្យកម្មករធ្វើកូដកម្មផងដែរ។
គួរបញ្ជាក់ផងដែរថា ក្រុមហ៊ុន Nokia បានលក់អាជីវកម្មទូរស័ព្ទចល័តទៅឲ្យក្រុមហ៊ុន Microsoft ក្នុងតម្លៃជាង ៧ពាន់លានដុល្លារអាមេរិក៕
ប្រភព៖ ubergizmo
មតិយោបល់