ថៃបានកាត់បន្ថយអត្រាការប្រាក់គោលជាលើកទី២ នៅឆ្នាំនេះ ខណៈដែលក្រុមតវ៉ាប្រឆាំងរដ្ឋាភិបាល លោកស្រីយ៉ីងឡាក់ ស៊ីណាវ៉ាត្រា កំពុងរីកធំឡើងដោយបានគំរាមកំហែង ដល់ទំនុកចិត្តអ្នកវិនិយោគទុន។
សារព័ត៌មានក្នុងស្រុកបាននិយាយថា ធនាគារកណ្ដាលថៃបានធ្វើការកាត់បន្ថយតម្លៃនៃការទិញមូលបត្របំណុលរយៈពេលមួយថ្ងៃមកនៅ ២,២៥ភាគរយ ដោយសំឡេងឆ្នោតរបស់សមាជិកគណៈកម្មាធិការគោលនយោបាយរូបិយវត្ថុ ៦សំឡេង ទល់ ១សំឡេង ដើម្បីគាំទ្រសេចក្ដីសម្រេចនេះ។
ក្រុមបាតុករតវ៉ាថៃ នៅសប្ដាហ៍នេះ បានឡោមព័ទ្ធក្រសួងរដ្ឋាភិបាលជាច្រើន និងបានជំរុញឲ្យមន្ដ្រីរាជការឲ្យចូលរួមបណ្ដេញលោកស្រីយ៉ីងឡាក់ ចេញពីតំណែង ពោលគឺចង់ផ្ដាច់ពូជលោកថាក់ស៊ីនតែម្ដង។ សេដ្ឋកិច្ចបានកើនឡើងតិចជាងការព្យាករ ១,៣ ភាគរយនៅក្នុងត្រីមាសទីបីធៀបនឹងរយៈពេលបីខែមុន។
គួរបញ្ជាក់ផងដែរថា របាយការណ៍ជាផ្លូវការមួយបានបង្ហាញថា ប្រទេសថៃបានបាត់បង់ភ្ញៀវទេសចរណ៍បរទេសជាង ៣០ម៉ឺននាក់ ដែលគិតជាទឹកប្រាក់ជិត ៥០០លានដុល្លារអាមេរិក ហើយបើសិនជាការតវ៉ានៅតែបន្តនោះនៅឆ្នាំក្រោយថៃនឹងរងផលប៉ះពាល់ជាច្រើនទាំងសេដ្ឋកិច្ច និងវិស័យទេសចរណ៍៕
មតិយោបល់