ការថែរក្សាសម្រស់ឲ្យស្អាតតាមបែបធម្មជាតិមានការលំបាកបន្តិច ព្រោះអ្នកត្រូវចំណាយពេលវេលាច្រើន និងការព្យាយាមធ្វើវាជារៀងរាល់ថ្ងៃ។ ក្មេងស្រីមួយចំនួនគិតថាការ Make up ធ្វើឲ្យពួកគេមានភាពស្រស់ស្អាត ប៉ុន្តែការគិតបែបនេះខុសហើយ ចំពោះការ Make up អាចជួយឲ្យស្រស់ស្អាតតែផ្នែកខាងក្រៅប៉ុណ្ណោះ ផ្ទុយទៅវិញប្រសិនបើមានភាពស្រស់ស្អាតដោយមិនចាំបាច់ពឹងផ្អែកទៅលើការ Make up វិញគឺប្រសើរជាង។ សូមអនុវត្តតាមវិធីសាមញ្ញ ៥ ចំណុចដែលធ្វើឲ្យអ្នកឈានទៅរកភាពស្រស់ស្អាតតាមបែបធម្មជាតិ។
១. សម្អាតផ្ទៃមុខជារៀងរាល់ថ្ងៃ
អ្នកត្រូវសម្អាតផ្ទៃមុនជារៀងរាល់ថ្ងៃ យ៉ាងហោចណាស់មួយថ្ងៃឲ្យបានពីរដង គឺនៅក្នុងកំឡុងពេលព្រឹក និងមុនពេលចូលគេង។ ការធ្វើបែបនេះជួយឲ្យសម្អាតជាតិខ្លាញ់ ឬធូលីនៅលើផ្ទៃមុខរបស់អ្នកឲ្យបានស្អាត ដោយប្រើប្រាស់ជាមួយផលិតផលដែលត្រូវនឹងប្រភេទស្បែករបស់អ្នក។ ប្រសិនបើមិនមានអ្នកអាចប្រើសាប៊ូសម្រាប់ទារកក៏បាន តែប្រសិនបើស្បែករបស់អ្នកមានជាតិខ្លាញ់សូមប្រើប្រាស់ផលិតផល ដែលមានជាតិប្រេង ប៉ុន្តែបើស្បែករបស់អ្នកស្ងួតសូមប្រើប្រាស់ផលិតផលផ្សេងទៀត។
២. ថែរក្សាធ្មេញរបស់អ្នកឲ្យសស្អាត
គ្មានអ្វីដែលអាចជួយមុខរបស់អ្នកឲ្យស្អាតជាជាងស្នាមញញឹមពណ៌សភ្លឺនោះទេ។ អ្នកត្រូវដុសធ្មេញយ៉ាងតិចពីរដងក្នុងមួយថ្ងៃ ដោយប្រើប្រាស់ថ្នាំដុសធ្មេញដែលអាចជួយឲ្យធ្មេញសស្អាត នឹងរឹងមាំបំផុត។
៣. ផឹកទឹក ៨ កែវក្នុងមួយថ្ងៃ
រាងកាយរបស់យើងត្រូវការទឹក ៧៥ ភាគរយ ហើយគ្មាននណាម្នាក់ដែលរស់នៅដោយគ្មានជាតិទឹកនៅក្នុងខ្លួនបានយូរអង្វែងនោះទេ។ ដូច្នេះហើយអ្នកត្រូវតែទទួលទានទឹកឲ្យបាន ៨ កែវគឺស្មើនឹង ២ លីត្រនៅក្នុងមួយថ្ងៃដើម្បីរក្សាស្បែក នឹងរាងកាយរបស់អ្នកឲ្យបានស្អាត។ គ្រាន់តែព្យាយាមផឹកទឹកឲ្យបាន ៨ កែវក្នុងមួយថ្ងៃក្នុងរយៈពេល ២ សប្តាហ៍អ្នកនឹងឃើញលទ្ធផលដោយខ្លួនឯង។
៤. ញ៉ុំបន្លែ ឬផ្លែឈើឲ្យបានប្រាំមុខក្នុងមួយថ្ងៃ
ការបរិភោគផ្លែឈើ និងបន្លែមានសារៈសំខាន់ខ្លាំងណាស់សម្រាប់រាងកាយព្រមទាំងស្បែករបស់អ្នក ព្រោះសារធាតុដែលនៅក្នុងបន្លែ និងផ្លែឈើផ្សេងគ្នាអាចជួយធ្វើឲ្យស្បែករបស់អ្នកមានភាពស្រស់ថ្លា។
៥.ហាត់ប្រាណ
ការហាត់ប្រាណជាប្រចាំរៀងរាល់ថ្ងៃអាចជួយបញ្ចេញនូវជាតិពុល និងជួយរំលាយជាតិខ្លាញ់នៅក្នុងរាងកាយរបស់អ្នក។ ព្រោះអាហារដែលអ្នកបរិភោគរាល់ថ្ងៃសម្បូរទៅដោយជាតិគីមី ប្រសិនបើអ្នកមិនបានហាត់ប្រាណដើម្បីបញ្ចេញជាតិពុលទាំងនោះមកវិញទេ វាអាចជួយធ្វើឲ្យសុខភាពស្បែករបស់អ្នកមានបញ្ហា៕
ប្រភព៖ ចុចទីនេះមើលទំព័រដើម www.mungkulkar.com សហការជាមួយនឹងដំណឹង
មតិយោបល់