គ្រប់គ្នាប្រហែលជាមិនទាន់បំភ្លេចនូវការស្លាប់របស់តារាសម្ដែង Paul Walker កំពូលអ្នកប្រណាំងរថយន្តនៅក្នុងរឿង Fast & Furious នៅក្នុងគ្រោះថ្នាក់ចរាចរណ៍មួយកាលពីថ្ងៃទី៣០ខែវិច្ឆិកា ឆ្នាំ ២០១៣។ នៅពេលនេះ ការស្លាប់របស់ Walker នៅមិនទាន់មានសេចក្ដីរាយការណ៍ជាផ្លូវការនោះទេ ប៉ុន្តែប្រភពក្រៅផ្លូវការបានបង្ហើបឲ្យដឹងថា រថយន្តដែល Paul Walker និង Roger Rodas ជិះខណៈពេលជួបគ្រោះថ្នាក់ចរាចរណ៍នោះបានបើកល្បឿនលឿនជាងការកំណត់។
យោងតាមព័ត៌មានដែលបានចុះផ្សាយដោយ Hollywood Reporter បានឲ្យដឹងថា រថយន្តម៉ូដែល Porsche Garrera GT ដែលលោក Paul Walker និង Roger Rodas ជិះ បានបើកក្នុងល្បឿនជាង ១៦០គីឡូម៉ែត្រក្នុងមួយម៉ោង ហេតុនេះហើយទើបធ្វើឲ្យ Rodas ដែលជាអ្នកបើក មិនអាចគ្រប់គ្រងបាន ទើបរេចង្កូតទៅបុកបង្គោលភ្លើងតែម្ដង។
គួរបញ្ជាក់ផងដែរថា ក្រោយពេលកើតហេតុប៉ូលិសបាននិយាយថា ទាំងពីរខាងលើមិនបានស្ថិតនៅក្រោមឥទ្ធិពលគ្រឿងញៀន ឬស្រវឹងក្នុងពេលបើកបរឡើយ ហើយសម្រាប់អនាគតនៃរឿង Fast & Furious ត្រូវបាន Vid Diesel ដែលជាតួឯកនៅក្នុងរឿងបានបញ្ជាក់ថា នឹងចេញនៅខែមេសា ឆ្នាំ ២០១៥ ដោយត្រូវលើកពេល១ឆ្នាំ ព្រោះត្រូវកែប្រែសាច់រឿង៕
មតិយោបល់