អត្ថប្រយោជន៍នៃការធ្វើលំហាត់ប្រាណគឺជួយសម្រួលដល់ចរន្តឈាមដើរបានស្រួល ជួយសម្អាតកាកសំណល់នៃជាតិប្រេងលើស្បែក ជួយឲ្យស្បែកទន់រលោង បំបាត់ស្នាមអុចខ្មៅនិងជាតិពុលនៅលើស្បែក។ ការធ្វើលំហាត់ប្រាណមិនត្រឹមតែជួយសម្រក់ទម្ងន់ រាងស្អាត និងជួយឲ្យសុខភាពល្អប៉ុណ្ណោះទេ ថែមទាំងជួយឲ្យស្បែករបស់អ្នកស្អាតម៉ដ្ឋរលោងថែមទៀត។ មានហេតុផលទាំង ៦ យ៉ាងដែលអ្នកគួរតែធ្វើលំហាត់ប្រាណ៖
១. ដើម្បីជួយសម្អាតកាកសំណល់សារធាតុខ្លាញ់លើស្បែក
ការបញ្ចេញញើសច្រើនអាចជួយបង្កើនផលិតផលខ្លាញ់ធម្មជាតិលើស្បែក ជួយកំចាត់កាកសំណល់ខ្លាញ់ដែលមាននៅលើស្បែកចេញ ជួយឲ្យស្បែកស្អាតស្រស់ថ្លា។ ទោះជាយ៉ាងណាក៏ដោយ អ្នកត្រូវតែជូតសម្អាតស្បែករបស់អ្នកចេញបន្ទាប់ពីធ្វើលំហាត់ប្រាណរួច ចៀសវាងកុំឲ្យញើសជ្រាបចូលទៅក្នុងស្បែកវិញអាចបណ្តាលឲ្យកើតមុន។
២. ជួយឲ្យចរន្តឈាមដើរបានស្រួល
សម្រាប់អ្នកដែលមានមុនច្រើនឬក៏មានជម្ងឺសើស្បែក ការធ្វើលំហាត់ប្រាណគឺអាចជួយឲ្យចរន្តឈាមដើរបានស្រូលមានន័យថាវានឹងផ្តល់ឲ្យនូវអុកស៊ីសែននិងសារធាតុចិញ្ចឹមច្រើនដើម្បីឲ្យស្បែកកាន់តែស្អាត។ សម្រាប់អ្នកដែលមានស្បែកធម្មតា ចរន្តឈាមនឹងជួយចិញ្ចឹមកោសិកាស្បែកឲ្យបានល្អ។
៣. កាត់បន្ថយភាពតានតឹងក្នុងចិត្ត
ការកាត់បន្ថយភាពតានតឹងក្នុងចិត្តអាចជួយបានច្រើនដល់ជម្ងឺលើស្បែកដូចជា ជម្ងឺមុន ជម្ងឺសើស្បែក…។ តាមការសិក្សាមួយចំនួនបានបង្ហាញថា ក្រពេញបញ្ចេញសារធាតុខ្លាញ់ធ្វើការផលិតសារធាតុខ្លាញ់ដែលមានទំនាក់ទំនងយ៉ាងខ្លាំងជាមួយនឹងអរម៉ូនដែលមានភាពតានតឹង។ ដូច្នេះនៅពេលអ្នកមានភាពតានតឹងក្នុងចិត្ត ស្បែករបស់អ្នកនឹងកាន់តែមានបញ្ហាធ្ងន់ធ្ងរ។
៤. ការពង្រឹងសាច់ដុំ
ការលើកដុំដែកនឹងអាចជួយដល់សុខភាពស្បែករបស់អ្នកឲ្យបានល្អ កាន់តែមានភាពរីករាយ។
៥. បញ្ចេញជាតិពុលចេញពីស្បែក
ការធ្វើលំហាត់ប្រាណគឺជាមធ្យោបាយមួយដ៏ល្អដើម្បីបញ្ចេញជាតិពុលនិងធាតុវិទ្យុសកម្មចេញពីស្បែកដែលធ្វើឲស្ទះរន្ធញើស។
៦. គេងច្រើននាំឲ្យសម្រស់អ្នកកាន់តែស្អាត
ការសិក្សាជាច្រើនបានបង្ហាញថា ការធ្វើលំហាត់ប្រាណជួយលោកអ្នកឲ្យគេងបានស្រួល។ សកម្មភាពរបស់រាងកាយអាចជួយអ្នកឲ្យមានអារម្មណ៏ងងុយគេងនិងគេងលក់បានស្រួល។ នៅពេលដែលក្រោកពីគេង ភ្នែករបស់អ្នកនឹងមិនហើមហើយរង្វង់ភ្នែកក៏មិនខ្មៅដែរ៕
ចុចទីនេះមើលប្រភពដើមសហការជាមួយនឹងដំណឹង
មតិយោបល់