ឯកឧត្តម ស ខេង ឧបនាយករដ្ឋមន្ត្រីបានទទួលជួបពិភាក្សាការងារជាមួយឯកឧត្តម Yuji Kumamaru ឯកអគ្គរាជទូតជប៉ុនប្រចាំកម្ពុជា កាលពីថ្ងៃទី ២៩ ខែ មករា ឆ្នាំ ២០១៤ ។
ក្នុងជំនួបពិភាក្សាការងារ ដែលធ្វើឡើងនៅទីស្តីការក្រសួងមហាផ្ទៃនោះដែរ ឯកឧត្តម ស ខេង បានអះអាងសារជាថ្មី ថា ការបោះឆ្នោតលើកនេះ គឺជាការបោះឆ្នោតដែលល្អជាងការបោះឆ្នោតលើកមុនៗ ទាំងអស់ ព្រោះថាសម្រាប់ការបោះឆ្នោតលើកនេះ គ្មានអំពើហិង្សា និងប្រកបដោយតម្លាភាព និងសេរី ។ សម្រាប់លោក សម រង្សី ដែលបានបោះបង់ ចោលនូវអ្វីដែលបានឯកភាពជាមួយនឹង រដ្ឋាភិបាលបច្ចុប្បន្ន កន្លងមក ដោយក្នុងនោះគាត់បានទាមទារឲ្យ មានការត្រួតពិនិត្យ ការបោះឆ្នោតឡើងវិញ សារជាថ្មី ។
ដោយឡែកសម្រាប់ លោក Yuji Kumamaru ឯកអគ្គរាជទូតជប៉ុនប្រចាំកម្ពុជា បានជម្រាបឲ្យដឹងផងដែរថា ស្ថានភាពការនយោបាយនៅកម្ពុជាលោកពិតជាចាប់អារម្មណ៍ខ្លាំងណាស់ ដោយលោកខ្លាចការចរចារនោះ មិនឈានទៅរកចំណុចប្រសើរ តែបែរជាកើតអំពើហិង្សា ដែលនាំឲ្យមានផលប៉ះពាល់ដល់សង្គមទាំងមូល ។ លោកក៏បានបន្តថា សូមឲ្យរដ្ឋាភិបាលដោះស្រាយឲ្យបានឆាប់ៗ។
ទន្ទឹមជាមួយនឹងគ្នានោះដែរ ឯកឧត្តម ស ខេង ក៏បានបញ្ជាក់ថា សកម្មភាពរបស់ មេដឹកនាំគណបក្សប្រឆាំង សង្គ្រោះជាតិ គឺជាសកម្មភាព ផ្តួលរំលំរដ្ឋាភិបាល ដោយ ច្រានចោលលទ្ធផលបោះឆ្នោត ។ បើទោះបីជាខាងរដ្ឋាភិបាល នៅរក្សាគោលជំហរ ដោយបើកឲ្យមានការចរចារ ក៏ដោយនោះ ហើយការទាមទារបោះឆ្នោតឡើងវិញ ជាការទាមទារមួយ ដែល រដ្ឋាភិបាលមិនអាចទទួលយកបាន៕
មតិយោបល់