ដំបូងឡើយ ក្រុមហ៊ុន Apple គ្មានគម្រោងបង្កើតនូវ iPhone និង iPad នោះទេ ប៉ុន្តែដោយសារមានការឌឺដង និងចង់បំពាក់ភាពអំនួតរបស់បុគ្គលិក Microsoft ទើបបង្កើតឧបករណ៍ទាំងពីរនេះឡើង។
បើតាមកំណត់ត្រារបស់លោក Walter Isaacson ជាអ្នកសរសេរសៀវភៅប្រវត្តិរបស់ស្ថាបនិក និងជាអតីតនាយកប្រតិបត្តិ Apple លោក Steve Jobs បានឲ្យដឹងថា ដោយសារតែភាពធុញទ្រាន់នឹងការអួតក្អេងក្អាងរបស់បុគ្គលិក Microsoft ទើបលោក Jobs បង្កើត iPhone និង iPad ឡើង។
Walter Isaacson បាននិយាយថា លោក Steve Jobs បានទៅចូលរួមនៅក្នុងកម្មវិធីខួបកំណើតនៅផ្ទះមិត្តភ័ក្តិរបស់ប្រពន្ធលោក ដែលបុរសម្នាក់នោះ ជាបុគ្គលិកធ្វើការនៅក្នុងក្រុម Microsoft Tablet។ នៅក្នុងកម្មវិធី បុរសម្នាក់នោះឧស្សាហ៍អួងពីសមត្ថភាពអស្ចារ្យរបស់ Microsoft Tablet ទៅកាន់ Steve Jobs ហើយជារឿយៗ គេតែងតែធ្វើបែបនេះជានិច្ច។ បុរសនោះមាននិយាយថែមទៀតថា វានឹងជំនួសកុំព្យូទ័រយូរដៃ ព្រមទាំងឲ្យជាយោបល់ថា Apple គួរតែទិញអាជ្ញាប័ណ្ណកម្មសិទ្ធិបញ្ញាពី Microsoft ទៅប្រើ។
មិនតិចជាង ១០លើកនោះទេ ដែលលោក Jobs បានញ៉ាំអាហារជាមួយបុរសនោះ ដោយស្ដាប់តែរឿងដដែលៗ ប៉ុន្តែ Jobs បានគិតថា វាមិនអស្ចារ្យទេ ព្រោះថា អ្វីដែលគេអួតនោះគឺប្រើ Keyboard និងប៊ិច តែនៅពេល Apple បង្កើតវិញ នឹងមិនប្រើ Keyboard និងប៊ិចឡើយ។
នៅព្រឹកមួយ ពេលគាត់ទៅដល់កន្លែងធ្វើការគាត់បានប្រាប់ទៅក្រុមការងារឲ្យបង្កើត Tablet ដែលប្រើ Multi-Touch ហើយរយៈពេល ៦ខែក្រោយមក គាត់ទទួលបាន Tablet មួយតាមការចង់បានរបស់គាត់ ហើយអ្វីដែលអស្ចារ្យនោះគឺថា Tablet នោះ មិនប្រើ Keyboard និងប៊ិចនោះទេ។ ក្រោយពីបង្កើតបានភ្លាម Steve Jobs មិនបានយកវាទៅបង្កើតជា iPad នោះទេ តែបែបជាពង្រួមទំហំ ហើយរចនាចេញជា iPhone ដ៏ស្រស់ស្អាតទៅវិញ។
គួរបញ្ជាក់ផងដែរថា យោងតាមសំដីរបស់ Steve Jobs ខាងលើ Microsoft ជាអ្នកបង្កើត Tablet មុន Apple ប៉ុន្តែទើបតែបង្ហាញខ្លួននៅឆ្នាំ ២០១២ ហើយចំណែក iPad ក៏កើតមុន iPhone ផងដែរ៕
មតិយោបល់