ភ្នំពេញ ៖ សន្តិសុខ២នាក់របស់ក្រុមហ៊ុនវីអាយភី(VIP) ដែលពាក់ព័ន្ឋនឹងការបើកដៃ អោយចោរចូលលួចកុំព្យូទ័រឡេបថប២គ្រឿង និង ទូដែកមួយ ក្នុងក្រុមហ៊ុនឯកជនដែលខ្លួន កំពុងការពារសុវត្ថិភាពនោះ បានត្រូវចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពី រសៀលថ្ងៃទី២ មេសា ២០១៤ ឃុំខ្លួនដាក់ពន្ឋនាគារបណ្តោះអាសន្នដើម្បីរង់ចាំការស៊ើបអង្កេតបន្តទៀត។
សន្តិសុខទាំង២នាក់នេះឈ្មោះឈាង លួត អាយុ៤៥ឆ្នាំ មានទីលំនៅក្នុងសង្កាត់ដង្កោ ខណ្ឌដង្កោ និងឈ្មោះ ឯក ឆើត ភេទប្រុស អាយុ២១ឆ្នាំ មានទីលំនៅក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ បានត្រូវសមត្ថកិច្ចប៉ូលិសខណ្ឌសែនសុខ ឃាត់ខ្លួនកាលពីថ្ងៃទី ៣០ ខែមីនា ឆ្នាំ២០១៤ ដោយយោងលើពាក្យបណ្តឹងរបស់ឈ្មោះ ផុន ឆាយហុង ភេទស្រី អាយុ២៨ឆ្នាំ ជានាយកក្រុមហ៊ុន។
ក្នុងពាក្យបណ្តឹងបានបញ្ជាក់ថា នៅថ្ងៃកើតហេតុគាត់បានចេញទៅហូបបាយថ្ងៃត្រង់ជាមួយភ្ញៀវនៅខាងក្រៅក្រុមហ៊ុន មួយសន្ទុះក្រោយមកបុគ្គលិកបានទូរស័ព្ទប្រាប់ថា បាត់កុំព្យូទ័រឡេបថបចំនួន២គ្រឿង និងទូដែកខ្នាតតូចមួយ តែក្នុងទូដែកនោះពុំមានប្រាក់ទេ មានតែងឯកសារ និងលិខិតឆ្លងដែនរបស់បុគ្គលិកចំនួន២៩ក្បាល។
ពេលនោះគាត់បានទៅត្រួតពិនិត្យនៅលើប្រព័ន្ធកាមេរ៉ាសុវត្ថិភាពក៏ឃើញមានមនុស្សចម្លែក២នាក់ ជិះម៉ូតូចូលមកលួចយកឥវ៉ាន់ទាំងអស់នោះ ហើយឃើញបុគ្គលិកសន្ដិសុខ VIP ទាំង២នាក់ដែលក្រុមហ៊ុនជួលមកយាមការពារសុវត្ថិភាពនៅជាមួយនឹងជនសង្ស័យទាំងនោះទៀតផង ។
ចំណែកសន្តិសុខទាំង២នាក់នេះ បានបដិសេធថា ពួកគេពុំបានប្រព្រឹត្តដូចការចោទ ប្រកាន់នេះទេ ពោលគឺពួកគេពុំបានឃុបឃិត ឬ ចូលដៃចូលជើងជាមួយនឹងចោរឡើយ។ ប៉ុន្តែ ពួកខ្លួនពិតជាបានឈរនៅក្បែរមនុស្សទាំង២នាក់នេះមែន ព្រោះស្មានថាមនុស្សទាំង២នាក់ នេះជាបុគ្គលិកឬបងប្អូនរបស់នាយកក្រុមហ៊ុន ដែលគាត់ប្រើឱ្យមកយកកុំព្យូទ័រ និង ទូដែក៕
មតិយោបល់