ភ្នំពេញ ៖ បុរសជនជាតិបរទេសម្នាក់ស្រវឹងបើករថយន្តបុករះម៉ូតូ៣គ្រឿងចតស្ងៀមមុខហាងកាហ្វេមួយកន្លែងទល់មុខសណ្ឋាគារភ្នំពេញបណ្ដាលអោយរងការខូចខាតតិចតួច តាមបណ្ដោយផ្លូវព្រះមុនីវង្ស ហើយព្យាយាមបើករត់មកដល់ចំណុចមុខធនាគារកាណាឌីយ៉ាបានបុករះរនាំងដែកពុះចែកទ្រូងផ្លូវបាក់អស់ចំនួន៥ផ្ទាំងនិងបង្គោលស្លាកសញ្ញាបង្ហាញទិសដៅចរាចរបាក់អស់មួយដើម កាលពីវេលាម៉ោង១១និង៣០នាទីយប់ថ្ងៃ៥ខែមេសាឆ្នាំ២០១៤ ត្រង់ចំនុចក្បែរស្តុបកាណាឌីយ៉ា ស្ថិតនៅក្នុងសង្កាត់ស្រះចក ខណ្ឌដូនពេញ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តមួយគ្រឿងម៉ាកតូយ៉ូតា ស៊ីនណា ពណ៌ទឹកប្រាក់ ពាក់ស្លាកលេខ ឍ០៥៧៣ ភព១ បើកបរដោយជនជាតិបរទេសម្នាក់បានធ្វើដំណើរយ៉ាងលឿនតាមបណ្ដោយផ្លូវព្រះមុនីវង្សក្នុងទិសដៅពីជើងទៅត្បូងស្រាប់តែមកដល់ចំណុចកើតហេតុក៏បានរេចង្កូតជ្រុលទៅបុករះម៉ូតូ៣គ្រឿងដែលចតមុខហាងកាហ្វេមួយកន្លែងទល់មុខសណ្ឋាគារភ្នំពេញ បណ្ដាលអោយរងការខូចខាតតិចតួច តែម្ចាស់រថយន្តបង្កហេតុខាងមិនព្រមឈប់រថយន្តធ្វើការដោះស្រាយជាមួយម្ចាស់ម៉ូតូរងគ្រោះទាំង៣គ្រឿងបែរជាព្យាយាមបើករថយន្តរត់គេចបានប្រមាណ១គីឡូម៉ែតមកចំណុចមុខធនាគារកាណាឌីយ៉ាក៏បានទៅបុកបាក់អស់រនាំងដែកពុះចែកទ្រូងផ្លូវ៥ផ្ទាំងនិងបង្គោលស្លាកសញ្ញាចរាចរមួយដើមទៀត ធ្វើអោយរថយន្តបង្កហេតុខាងលើរងការខូចខាតយ៉ាងដំណំដោយផ្ទុះបែកពោងសុវត្តិភាពនិងរងការខូចខាតមួយកំណាត់មុខធ្វើអោយរថយន្តបើកទៅមុខលែងរួច។
ក្រោយពេលកើតហេតុរថយន្តបង្កហេតុខាងលើត្រូវប៉ូលិសចរាចរធ្វើការវាស់វែងស្ទូចយកទៅរក្សាទុកនៅការិយាល័យចរាចរជើងគោកស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់៕
មតិយោបល់