នាព្រឹកថ្ងៃទី២១ខែ មេសា ឆ្នាំ២០១៤នេះ នៅសាលប្រជុំរដ្ឋបាលសាលាខេត្ត មានបើកមហាសន្និបាតពង្រីកសមាគមក្រុមប្រឹក្សាក្រុងស្រុក ឃុំ សង្កាត់ខេត្តសៀមរាប ក្រោមអធិបតីភាពរបស់ឯ.ឧអ៊ឹង ហឿនប្រធាន ក្រុមប្រឹក្សាខេត្តនិង ឯ.ឧប៊ុន ថាប្ញទ្ធិអភិបាលរងនៃគណៈអភិបាលខេត្តសៀមរាបដោយមានការអញ្ជើញចូល រួមពីសំណាក់ឯកឧត្តម លោកជំទាវជាសមាជិកក្រុមប្រឹក្សាខេត្ត អស់លោក លោកស្រី ក្រុមការងារថ្នាក់ជាតិ និង ជាសមាជិកក្រុមប្រឹក្សាក្រុង ស្រុក ឃុំ សង្កាត់ទូទាំងខេត្តសៀមរាបសរុបចំនួន ២៥១នាក់ ។
ក្នុងកិច្ចស្វាគមន៍របស់លោកហង់ ហឿមប្រធានសមាគមក្រុមប្រឹក្សាឃុំសង្កាត់ខេត្តសៀមរាបបានឲ្យ ដឹងថា សមាគមក្រុមប្រឹក្សាឃុំសង្កាត់ ត្រូវបានបង្កើតឡើងពីឆ្នាំ២០០៥ ហើយបានបង្កការងារខ្លួន បន្ទាប់ក្រុមប្រឹក្សារាជធានី ខេត្ត ក្រុង ខណ្ឌ ត្រូវបានបង្កើតឡើងដោយការបោះឆ្នោតអសកល កាលពីខែឧសភា ឆ្នាំ២០០៩កន្លងមកហើយសម្ព័ន្ធភាពជាតិ ឃុំ សង្កាត់ ក៏ដូចជាក្រសួងមហាផ្ទៃ បានផ្តួចផ្តើមដោយបង្កើតក្រុមប្រឹក្សារាជធានីខេត្ត ដោយឡែកសមាគមក្រុមប្រឹក្សា ឃុំ សង្កាត់ ត្រូវពង្រីកបន្ថែមជាមួយក្រុមប្រឹក្សាក្រុងស្រុក ។ ការបង្កើតសមាគមនេះ ជាបន្តបន្ទាប់អាស្រ័យដោយក្រសួងមហាផ្ទៃ និង សម្ព័ន្ធភាពជាតិឃុំសង្កាត់ ក្នុងគោលបំណងផ្តល់នូវអត្ថប្រយោជន៍ ក្នុងការលើកកម្ពស់ អភិវឌ្ឍន៍សមត្ថភាពក្រុងស្រុក ឃុំ សង្កាត់ ក្នុងការផ្តល់សេវាជូនប្រជាជននិង ការពារផលប្រយោជន៍ និង គុណប្រយោជន៍ស្របច្បាប់របស់សមាជិកការកសាងភាពជាដៃគូជាមួយក្រសួង ស្ថាប័នពាក់ព័ន្ធ ដើម្បីអភិវឌ្ឍន៍មូលដ្ឋានពង្រឹងនីតិរដ្ឋ និង ជម្រុញលទ្ធិប្រជាធិបតេយ្យនៅកម្ពុជា ។
ក្នុងនោះដែរលោកម៉ែន សិរីអនុប្រធានក្រុមការងារថ្នាក់ជាតិ ក៏បានបញ្ជាក់ថា អនុលោមតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលតម្រូវឲ្យបង្កើតឡើងនូវក្រុមប្រឹក្សារដ្ឋបាលថ្នាក់ក្រោមជាតិតាមរយៈការបោះឆ្នោតអសកលដោយក្រុមប្រឹក្សាឃុំ សង្កាត់ ។ ម្យ៉ាងទៀត យើងធ្វើយ៉ាងណាឲ្យសមាគមក្រុមប្រឹក្សាឃុំ សង្កាត់ ដំណើរការទៅឲ្យប្រកបបានជោគជ័យ ហើយតាមរយៈអង្គមហាសន្និបាតនេះ នឹងសម្រេចបានទៅដោយជោគជ័យ តាមរយៈនៃការបោះឆ្នោតរបស់សមាជិកសមាគមក្រុមប្រឹក្សាឃុំ សង្កាត់ ។
មានប្រសាសន៍បើកមហាសន្និបាតនោះឯ.ឧអ៊ឹង ហឿនបានគូសបញ្ជាក់ថាអង្គមហាសន្និបាតពង្រីកសមាគមក្រុមប្រឹក្សាឃុំ សង្កាត់នេះ គឺជាសក្ខីភាពដែលឆ្លុះបញ្ចាំងពីការប្តេជ្ញាចិត្តរបស់សមាជិកក្រុមប្រឹក្សាក្រុង ស្រុក ឃុំ សង្កាត់ ក្នុងការបង្កើតឲ្យមានអង្គការមួយដែលជាតំណាង និង ការពារផលប្រយោជន៍រួមរបស់ក្រុមប្រឹក្សាក្រុង ស្រុក ឃុំ សង្កាត់ ដើម្បីលើកកម្ពស់គុណភាព នៃជីវភាពរស់នៅ និង សុខុមាលភាពរបស់ប្រជាពលរដ្ឋ តាមរយៈអភិបាលកិច្ចល្អ និងតាមបែបវិមជ្ឈការ និងវិសហមជ្ឈការដើម្បីអភិវឌ្ឍសមត្ថភាព និង បង្កើនប្រសិទ្ធភាព នៃការផ្តល់សេវាដល់ប្រជាពលរដ្ឋនៅមូលដ្ឋាន។ ឯកឧត្តមប្រធានក៏បានលើកឡើងថាមហាសន្និបាតនាពេលនេះរៀបចំ ឡើងក្នុងគោលបំណងពិនិត្យ ពិភាក្សា និងអនុម័តសេចក្តីព្រាងលក្ខន្តិកៈ និងបទបញ្ជាផ្ទៃក្នុងរបស់សមាគមនិងដំណើរការបោះឆ្នោតជ្រើសរើសអង្គអភិបាលកិច្ចរបស់សមាគម ផងដែរ។
ឯ.ឧអ៊ឹង ហឿនក៏លើកឡើងពីកិច្ច ដំណើរការអនុវត្តគោលនយោបាយវិមជ្ឈការ និង វិសហមជ្ឈការនេះ រាជរដ្ឋាភិបាលកម្ពុជាដែលដឹកនាំដោយសម្តេច តេជោ ហ៊ុន សែន នាយករដ្ឋមន្ត្រី មានគំនិតផ្តួចផ្តើមក្នុងការបង្កើតឲ្យមានស្ថាប័នមួយដែលជាតំណាងឲ្យក្រុមប្រឹក្សាឃុំ សង្កាត់ទាំងនៅថ្នាក់ខេត្ត និងនៅថ្នាក់ជាតិហើយរាជរដ្ឋាភិបាល បានចាត់ទុកស្ថាប័នតំណាងនេះ ថាជាស្ថាប័ន មួយដែលដើរតួនាទី និងជាដៃគូយ៉ាងសំខាន់នៅក្នុងការជម្រុញដំណើរការកំណែទម្រង់វិមជ្ឈការ និងវិសហមជ្ឈការនិង ការអនុវត្ដអភិបាលកិច្ចនៅមូលដ្ឋាននៃកម្ពុជា។ទន្ទឹមនឹងនេះរាជរដ្ឋាភិបាលយល់ឃើញថាសមាគមក្រុម ប្រឹក្សាក្រុង ស្រុក ឃុំ សង្កាត់ដែលត្រូវបង្កើតឡើងនៅពេលនេះក៏ដើរតួនាទីយ៉ាងសំខាន់ដូចជាសម្ព័ន្ធភាពជាតិឃុំ សង្កាត់ដែរ។ឯ.ឧ អ៊ឹង ហឿន បាន លើកឡើងថា “ការគាំទ្ររដ្ឋបាលថ្នាក់ក្រោមជាតិឲ្យមានលទ្ធភាពបំពេញមុខងារបានប្រកបដោយប្រសិទ្ធភាព មានស្វ័យភាព និងមានគណនេយ្យភាព ចាំបាច់ត្រូវបង្កើតស្ថាប័នគាំទ្រនានា ដើម្បីជួយពង្រឹងអាណត្តិតាមផ្លូវច្បាប់ និងកិច្ចប្រតិបត្តិការរបស់រដ្ឋបាលទាំងនោះ ។ការលើកឡើងបែបនេះ គឺជាការទទួលស្គាល់តួនាទីដ៏សំខាន់របស់សមាគមក្រុមប្រឹក្សារដ្ឋបាលថ្នាក់ក្រោមជាតិ ដែលជាដៃគូរបស់រដ្ឋាភិបាលនៅក្នុងដំណើរការកំណែទម្រង់វិមជ្ឈការ និងវិសហមជ្ឈការនៅកម្ពុជា។ ក្នុងន័យនេះ សូមឲ្យអស់លោក លោកស្រី ជាប្រតិភូរបស់ក្រុមប្រឹក្សាក្រុង ស្រុក ឃុំ សង្កាត់ ក្នុងមហាសន្និបាតនេះ មេត្តាយកចិត្តទុកដាក់ស្តាប់ និង ចូលរួមពិនិត្យ ពិភាក្សា និងអនុម័តលក្ខន្តិកៈ និងបទបញ្ជាផ្ទៃក្នុងនេះ ក្នុងបំណងបង្កើនការយល់ដឹងឲ្យកាន់តែស៊ីជម្រៅអំពីតួនាទី ភារកិច្ច គោលបំណង និងដំណើរការរបស់សមាគមក្នុងការការពារផលប្រយោជន៍របស់ក្រុមប្រឹក្សាក្រុង ស្រុក ឃុំ សង្កាត់ ៕
មតិយោបល់