សុវត្ថិភាពម្ហូបអាហារគឺជារឿងមួយដែលមានសារៈសំខាន់ខ្លាំងណាស់ ព្រោះវាពាក់ព័ន្ធដល់សុខភាពរបស់ក្រុមគ្រួសារអ្នកទាំងមូល។ ការធ្វេសប្រហែលដោយមិនបានធ្វើអនាម័យផ្ទះបាយ និងសំភារៈឲ្យបានត្រឹមត្រូវអាចមានផលប៉ះពាល់ដល់សុខភាពយ៉ាងធ្ងន់ធ្ងរដល់សុខភាព។
មិនបានលាងដៃ
ការលាងដៃគឺជាគោលការណ៍យ៉ាងសំខាន់ណាស់ នៅពេលដែលអ្នកចាប់ផ្តើមធ្វើម្ហូបអាហារ។ ការភ្លេច ឬខ្ជិលលាងដៃរបស់អ្នក នៅពេលដែលចូលផ្ទះបាយ នឹងធ្វើឲ្យប៉ះពាល់ដល់សុខភាពក្រុមគ្រួសារទាំងមូល ប្រសិនបើអ្នកយកដៃកខ្វក់ទៅប៉ះពាល់ឧបករណ៍ផ្សេង។ នេះជាកត្តាដែលធ្វើឲ្យឆ្លងចូលទៅក្នុងម្ហូបអាហារ ហើយធ្វើឲ្យប៉ះពាល់ដល់សុខភាពនៅពេលដែលអ្នកបរិភោគ។ ដូច្នេះហើយអ្នកគួរតែលាងដៃជាមួយនឹងសាប៊ូឲ្យបានស្អាតមុនពេលយកដៃទៅប៉ះពាល់ បន្លែ ឬសាច់នៅពេលធ្វើម្ហូប។
អាវសម្រាប់ពាក់ធ្វើម្ហូបមានភាពកខ្វក់
ប្រហែលជាមានមនុស្សច្រើនណាស់ដែលមិនយកចិត្តទុកដាក់ទៅលើអាវសម្រាប់ពាក់នៅពេលចូលផ្ទះបាយនោះទេ។ ការពាក់អាវដែលមិនស្អាតធ្វើឲ្យធូលី ឬបាក់តេរីបើងចូលទៅក្នងម្ហូបអាហារ ដែលវាអាចបង្កឲ្យក្លាយទៅជារោគផ្សេងៗ។ នេះគឺជាហេតុផលមួយទៀត ដែលធ្វើឲ្យប៉ះពាល់ដល់សុខភាពរបស់អ្នក។
មិនបានលាងសម្អាតជ្រុញ ឬកាំបិត
ជាធម្មតាយើងតែងតែទម្លាប់ប្រើប្រាស់ជ្រុញ ឬកាំបិត ដោយមិនបានសម្អាតជាមុន។ ទិដ្ឋភាពនេះគឺប៉ះពាល់សុខភាពទាំងស្រុងដោយសារតែធាតុកខ្វក់នៃបាត់តេរី, ផ្សិត… ជាពិសេសនៅពេលដែលអាកាសធាតុសើម។ ដូច្នេះដើម្បីធានាបាននូវសុវត្ថិភាព អ្នកត្រូវសម្អាតសំភារៈនៅក្នុងផ្ទះបាយឲ្យបានស្អាត មុននឹងប្រើប្រាស់។
អាហារឆៅ និងឆ្អិនចែកមិនដាច់ពីគ្នា
នៅពេលដែលអ្នកប្រើឧបករណ៍ដួសម្ហូបលាយឡំគ្នា វានឹងធ្វើឲ្យមេរោគដែលនៅជាប់នឹងម្ហូបឆៅឆ្លងចូលទៅម្ហូបដែលឆ្អិនហើយ។ ការធ្វើបែបនេះធ្វើឲ្យលោកអ្នកឈឺពោះ ជំងឺរាគរួស… ជាងនេះទៅទៀតអាចធ្វើឲ្យមានជំងឺធ្ងន់ធ្ងរនៃការលាកក្រពះ ឬពោះវៀន។
ផ្ទះបាយមានភាពកខ្វក់
ផ្ទះបាយដែលកខ្វក់អាចធ្វើឲ្យម្ហូអាហាររបស់លោកអ្នកគ្មានអនាម័យ បើទោះជាអ្នកចម្អិនបានល្អយ៉ាងណាក៏ដោយ។ ដូច្នេះអ្នកត្រូវធ្វើអនាម័យផ្ទះបាយឲ្យបានស្អាតដើម្បីធានាសុវត្ថិភាព ជាពិសេសត្រូវសម្អាតឧបករណ៍ទាំងអស់ បន្ទាប់ពីចម្អិនអាហាររួច៕
មតិយោបល់