នៅរសៀលថ្ងៃទី ២៤ ខែ មេសា ឆ្នាំ២០១៤ នៅក្នុងសាលប្រជុំសាលាខេត្តកំពង់ឆ្នាំង មានពិធីប្រកាស និងចូលកាន់មុខតំណែង ព្រះរាជអាជ្ញាអមសាលាដំបូង ខេត្តកំពង់ឆ្នាំង ក្រោមអធិបតីភាព ឯកឧត្តម ហ៊ី សោភា រដ្ឋលេខាធិការក្រសួងយុត្តិធម៌ ឯកឧត្តម ឈួរ ច័ន្ទឌឿន អភិបាលនៃ
គណៈអភិបាលខេត្តកំពង់ឆ្នាំង ឯកឧត្តម យូ ប៊ុនឡេង ប្រធានសាលាឧទ្ធរណ៍ ឯកឧត្តម អ៊ុក សាវុធ អគ្គព្រះរាជអាជ្ញាអមសាលាឧទ្ធរណ៍ ឯកឧត្តម កែវ សុផល អនុរដ្ឋលេខាធិការក្រសួងយុត្តិធម៌ ព្រមទាំងមន្ត្រីរាជការ កងកំលាំងប្រដាប់អាវុធ ប្រធាន អនុប្រធានមន្ទីរជុំវិញខេត្តកំពង់ឆ្នាំង ។
លោក ពេញ វិបុល ព្រះរាជអាជ្ញាអមសាលាដំបូង បានអានពីប្រវត្តការងារ ដែលបានអនុវត្តន៍ នៅក្នុងខេត្ត រួចមក ក៏ត្រូវបានប្រកាស ផ្លាស់ប្តូរមុខតំណែង អានព្រះរាជក្រឹត្យតែងតាំងដោយ លោក ទិត្យ សារឿន ប្រធាននាយកដ្ឋានកិច្ចការបុគ្គលិក នៃក្រសួងយុត្តិធម៌ ឲ្យលោក ពេញ វិបុល ទៅបំពេញការងារនៅ ក្រសួងយុត្តិធម៌ លោក យូ ទិត្យវឌ្ឍនៈ ព្រះរាជអាជ្ញារង នៃអយ្យកា អមសាលា ដំបូង ខេត្តព្រះសីហនុ មកបំពេញការងារជាព្រះរាជអាជ្ញា នៃអយ្យកាអមសាលាដំបូងខេត្តកំពង់ឆ្នាំង លោក ទៀង ស៊ីថា ប្រធានសាលាដំបូង ខេត្តកំពង់ឆ្នាំង ទៅបំពេញការងារជា ប្រធាន តុលាការនៅខេត្តព្រះវិហារ លោក តេង រតនា បំពេញការងារ ជាប្រធានសាលាដំបូង ខេត្តកំពង់ឆ្នាំង។ ឯកឧត្តម ឈួរ ច័ន្ទឌឿន អភិបាល នៃគណៈអភិបាលខេត្តកំពង់ឆ្នាំង បានមានប្រសាសន៍ បានសម្តែងនូវការស្វាគមន៍ របស់លោកព្រះរាជអាជ្ញាសាលាដំបូងខេត្តកំពង់ឆ្នាំង ដែលទើបតែមកកាន់ តំណែងថ្មី សូមឲ្យទទួលនូវ លទ្ធផលជោគជ័យ ក្នុងការងារ និងអនុវត្តន៍ ការងារប្រកបដោយ សច្ចះធម៌ ស្មោះត្រង់ និងយុត្តិធម៌ ជាទីពឹង ជាខ្នងបង្អែកសម្រាប់ បងប្អូនប្រជាពលរដ្ឋ ក្នុងនាមជាអ្នកអនុវត្តន៍ច្បាប់ ត្រូវប្រកាន់ភ្ជាប់នូវភាពយុត្តធម៌ និង ជាទីជម្រករបស់ប្រជាពលរដ្ឋ ។
ឯកឧត្តម ហ៊ី សោភា រដ្ឋលេខាធិការក្រសួងយុត្តិធម៌ បានមានប្រសាសន៍ ផ្តាំផ្ញើរ ដល់លោក យូ ទិត្យវឌ្ឍនៈ ដែល ត្រូវបានរាជរដ្ឋាភិបាល ប្រគល់តួនាទីភារៈកិច្ច មកបំពេញការងារជាព្រះរាជអាជ្ញា អមសាលាដំបូង ខេត្តកំពង់ឆ្នាំង ឲ្យប្រឹងប្រែងអនុវត្តន៍ការងារ អនុវត្តន៍ច្បាប់ឲ្យមានប្រសិទ្ធិភាព និងតម្លាភាព ស្មោះត្រង់ចំពោះជាតិ ចំពោះ ព្រះមហាក្សត្រ និងប្រជាពលរដ្ឋ រក្សានូវវិន័យសេចក្តីថ្លៃថ្លូរ របស់ស្ថាប័នច្បាប់ មិនយកអំណាចទៅប្រើប្រាស់ នូវអំពើខុសច្បាប់ និងជាបង្គោលយុត្តិធម៌របស់ប្រជាពលរដ្ឋ ៕
មតិយោបល់