ភ្នំពេញ ៖ ជនសង្ស័យចំនួន ២នាក់ ត្រូវបាននគរបាលប៉ុស្ត៏ផ្សារដើមថ្កូវ ធ្វើការចាប់ឃាត់ខណ:ពេលដែលជនសង្ស័យទាំង
២នាក់ខាងលើ កំពុងធ្វើសកម្មភាពជួញដូរនិងប្រើប្រាស់គ្រឿងញៀន ហេតុការណ៏នេះបានកើតឡើងកាលពីវេលាម៉ោង ២២ និង ៣០នាទី យប់ថៃ្ងទី ១៤ ខែឧសភា ឆ្នាំ២០១៤ ស្ថិតនៅចំណុចផ្ទះសំណាក់ហាក់ឆៃហេង ផ្ទះលេខ៣៣ បន្ទប់លេខ ២០៣ តាមបណ្តោយផ្លូវលេខ ២៧១ ក្រុម៧ ភូមិ១ សង្កាត់ផ្សារដើមថ្កូវ ខណ្ឌចម្ការមន ។
សមត្ថកិច្ចនគរបាលប៉ុស្ត៏រដ្ឋបាលសង្កាត់ផ្សារដើមថ្កូវបានឲ្យដឹងថា ជនសង្ស័យទាំង ២នាក់ ដែលសមត្ថកិច្ចឃាត់ខ្លួនបានខាងលើទី១ មានឈ្មោះ ចាន់ សុជាតិ (ហៅរ៉ែម )ភេទប្រុស អាយុ៣៣ឆ្នាំ មានមុខរបរមិនពិតប្រាកដ ស្នាក់នៅផ្ទះជួលម្តុំផ្សាររន្ទះបាញ់ តាមបណ្តោយផ្លូវនរោត្តម សង្កាត់ទន្លេបាសាក់ ។ ចំណែក ជនសង្ស័យទី២មានឈ្មោះ ចេង សុភុត ភេទប្រុស អាយុ៣៣ឆ្នាំ មានមុខរបរមិនពិតប្រាកដ ស្នាក់នៅក្នុងអង្កការកសាង ភូមិត្នោតជ្រុំ សង្កាត់បឹងទំពុន ខណ្ឌមានជ័យ ។ វត្ថុតាងដែលសមត្ថកិច្ចដកហូតពីជនសង្ស័យខាងលើបានរួមមាន ថ្នាំញៀនប្រភេទក្រាមសថ្លា ចំនួន ២កញ្ចប់ និងឧបរករណ៏សម្រាប់ប្រើប្រាស់គ្រឿងញៀនមួយកំផ្លេរ ,ដេកកេះ០១ ,ទុយោសម្រាប់ជក់គ្រឿងញៀនចំនួន ២, លុយខ្មែរចំនួន ០៣ម៉ឺនរៀល ,ថង់ប្លាស្ទិចមួយចំនួន , និងកូនកន្ត្រៃចំនួន ០១ ។
សមត្ថកិច្ចនគរបាលប៉ុស្ត៏ផ្សារដើមថ្កូវបានបន្តឲ្យដឹងថា មុនពេលកើតហេតុ ម្ចាស់ផ្ទះសំណាក់យីហោ ហាក់ឆៃហេង បានរាយការណ៏មកកាន់សមត្ថកិច្ចថា នៅបន្ទប់លេខ ២០៣ ក្នុងផ្ទះសំណាក់របស់គាត់ មានជនសង្ស័យចំនួន ៣នាក់ កំពុងធ្វើសកម្មភាពប្រើប្រាស់គ្រឿងញៀន ។ បន្ទាប់ពីមានសេចក្កីរាយការណ៏ពីម្ចាស់ផ្ទះសំណាក់រួចមក នគរបាលប៉ុស្ត៏ផ្សារដើមថ្កូវ បានដឹកនាំកម្លាំងចុះទៅធ្វើការចាប់ខ្លួន ជនសង្ស័យខាងលើ នៅក្នុងបន្ទប់លេខ២០៣ បានចំនួន ២នាក់តែម្តង យកមកកាន់ប៉ុស្ត៏នគរបាលសង្កាត់ផ្សារដើមថ្កូវ ដើម្បីធ្វើការសាកសួរបន្ត ។
បច្ចុប្បន្នជនសង្ស័យខាងលើ ត្រូវបាននគរបាលប៉ុស្ត៏ផ្សារដើមថ្កូវ ធ្វើការបញ្ជូនខ្លួនទៅកាន់អធិការរដ្ឋាននគរបាលខណ្ឌចម្ការមន ដើម្បីធ្វើការឃុំខ្លួនបណ្តោះអាសន្ន និងកសាងសំណុំរឿងបញ្ជូនខ្លួនជនសង្ស័យខាងលើទៅកាន់សាលាដំបូងរាជធានីភ្នំពេញ ចាត់ការតាមនីតិវិធីច្បាប់ ៕
មតិយោបល់