ភ្នំពេញ៖ ថ្ងៃទី២០ ខែឧសភា ឆ្នាំ២០១៤ ក្រោមកិច្ចសហការជាមួយអង្គការ WWF កម្ពុជា មន្ទីរទេសចរណ៍ខេត្តមណ្ឌលគិរី បាន ប្រារព្ធពិធីដាក់ឲ្យប្រើប្រាស់ជាផ្លូវការនូវ ផែនការយុទ្ធសាស្ត្រអភិវឌ្ឍន៍ ទេសចរណ៍ខេត្តមណ្ឌល គិរីសម្រាប់ឆ្នាំ ២០១៤-២០១៨ ក្នុងគោលបំណងជំរុញការ ឮអភិវឌ្ឍវិស័យ ទេសចរណ៍ប្រកប ដោយនិរន្តរភាព ដែលនឹងផ្តល់ផលប្រយោជន៍ដល់ប្រជាជនដែលរស់នៅក្នុងខេត្តមណ្ឌលគិរី ក៏ដូចជាចូលរួមចំណែកក្នុងការអភិរក្ស ការពារ និងថែរក្សាទ្រព្យសម្បត្តិវប្បធម៌ និងធនធាន ធម្មជាតិ ហើយនិងដោះស្រាយបញ្ហាបម្រែបម្រួលអាកាសធាតុផងដែរ។
យោងតាមសេចក្តីប្រកាសព័ត៌មានរបស់អង្គការ WWFកម្ពុជា ឲ្យដឹងថា ឯកឧត្តម យីម លុច្ស អភិបាលរងខេត្តមណ្ឌលគិរីបាន មានប្រសាសន៍ក្នុងសុន្ទរកថា បើកកម្មវិធីកាលពីចុងសប្តាហ៍ ថា វិស័យទេសចរណ៍ត្រូវបានរាជរដ្ឋាភិបាលកម្ពុជាចាត់ទុកជាវិស័យ ដែលមានអាទិភាព ចម្បងមួយ ដែលជួយដល់ការអភិវឌ្ឍសេដ្ឋកិច្ចជាតិ បន្ទាប់ពីឧស្សាហកម្មស្រូវ ។ វិស័យទេស ចរណ៍បានចូលរួម ចំណែកអភិរក្សធនធានធម្មជាតិ វប្បធម៌ និងប្រវត្តិសាស្ត្រ កាត់បន្ថយភាព ក្រីក្រ ក៏ដូចជាជួយទប់ស្កាត់បម្រែបម្រួលអាកាសធាតុ ។ កម្មវិធីក្នុងថ្ងៃនេះមានគោលបំណង ផ្តល់នូវការយល់ដឹងអំពីកាលានុវត្តភាព នៃផែនការយុទ្ធសាស្ត្រអភិវឌ្ឍន៍ទេសចរណ៍ និងអំពី ទំនាក់ទំនងរវាងការងារអភិរក្ស និងវិស័យទេសចរណ៍ទៅដល់ភាគីពាក់ព័ន្ធដើម្បីទាក់ទាញ ចំណាប់អារម្មណ៍ និងកិច្ចសហការ ផងដែរ។
ចក្ខុវិស័យនៃផែនការយុទ្ធសាស្ត្រសម្រាប់ការអភិវឌ្ឍន៍ទេសចរណ៍ធម្មជាតិនេះគឺត្រឹមឆ្នាំ ២០១៨ ចំនួនភ្ញៀវទេសចរនឹងកើនឡើងដល់ ៣ សែននាក់ ដើម្បីជួយទ្រទ្រង់ដល់ជីវភាពនិងសុខុមាលភាពរបស់ប្រជាពលរដ្ឋនៅក្នុងខេត្ត ។ ចក្ខុវិស័យនេះនឹងសម្រេចបាន តាមរយ: ការប្រើប្រាស់ធនធានធម្មជាតិ និងវប្បធម៌ប្រកបដោយភាពសមប្រកប ការបង្កើតទេសចរ ធម្មជាតិខ្នាតតូច និងការផ្តល់ ការបណ្តុះបណ្តាលវិជ្ជាជីវ:ដល់សហគមន៍មូលដ្ឋាន ការបង្កើត នូវផលិតផល និងសេវាកម្មទេសចរណ៍ដ៏សម្បូរបែប ការបង្កើនការ យល់ដឹងអំពីសេវាកម្ម ទេសចរណ៍ដែលមានគុណភាព និងការពង្រឹងកិច្ចសហការទេសចរណ៍រវាងភាគីពាក់ព័ន្ធ នានា។
ក្រោមការឧបត្ថម្ភថវិកាពីអង្គការ WWF-Denmark និង DANIDA អង្គការ WWF កម្ពុជា បានជួយគាំទ្រមន្ទីរទេសចរណ៍ ខេត្តមណ្ឌល គិរីក្នុងការចងក្រងផែនការយុទ្ធសាស្ត្រទេស ចរណ៍ខេត្ត ដែលនឹងបង្កើតភាពជាដៃគូសហការអភិរក្សរវាងសហគមន៍ វិស័យឯកជន រដ្ឋាភិបាលថ្នាក់ជាតិ និងថ្នាក់ខេត្ត និងភាគីពាក់ព័ន្ធ ក្នុងការការពារតំបន់ទេសភាពខ្ពង់រាបភាគ ខាងកើត និងជីវចម្រុះយ៉ាងមាន ប្រសិទ្ធភាព។ ការងារអភិរក្សមានសារសំខាន់ក្នុងការបង្កើត ឲ្យមាន និងផ្សព្វផ្សាយអំពីផលិតផល និងសេវាកម្មទេសចរណ៍ ដូច្នេះហើយការធ្វើឲ្យមាន តុល្យភាពរវាងការអភិវឌ្ឍន៍សេដ្ឋកិច្ច និងការអភិរក្ស តាមរយ:ការអនុវត្តផែនការនេះមាន សារសំខាន់ណាស់។
លោក ឈិត សំអាត នាយកអង្គការ WWF កម្ពុជា បានមានប្រសាសន៍ថា ទេស ចរណ៍ធម្មជាតិដែលមាននិរន្តភាព និងភាពទទួល ខុសត្រូវ មានសារសំខាន់ក្នុងការរួមចំណែក ថែរក្សា និងអភិរក្សធនធានធម្មជាតិដ៏សម្បូរបែបនៅក្នុងប្រទេសកម្ពុជា ។ ក្រៅពីការជួយដល់ បរិស្ថាន និងការងារអភិរក្សទេសចរណ៍ធម្មជាតិក៏ជួយផ្តល់ជាប្រភពចំណូលសម្រាប់ប្រជាជន មូលដ្ឋាន និងកាត់បន្ថយភាពក្រីក្រ ។ អង្គការ WWF បាន និងកំពុងគាំទ្រដល់ផែនការយុទ្ធ សាស្ត្រ ៥ ឆ្នាំរបស់ខេត្តមណ្ឌលគិរី តាមរយ: ការពង្រឹងនូវសមត្ថភាពសហគមន៍ព្រៃឈើ និង សហគមន៍តំបន់ព្រៃការពារ ព្រមទាំងផ្តល់នូវជំនួយបច្ចេកទេសក្នុងការរឹតបន្តឹង គុណភាព ផលិតផលនិងសេវាកម្មទេសចរណ៍ ។ ទន្ទឹមនិងផែនការយុទ្ធសាស្ត្រទេសចរណ៍នេះ សហ គមន៍មូលដ្ឋាននឹងដើរតួនាទី ជាភ្នាក់ងារចម្បងមួយ ហើយជីវភាពប្រជាជនក៏នឹងរីកចម្រើន តាមរយ:ការកើនឡើងនៃឱកាសការងារ និងការរកប្រាក់ចំណូល ។ ពួកគាត់ក៏នឹងទទួលបាន ការបង្ហាត់បង្រៀន និងការគាំទ្រ ដើម្បីធានាឲ្យបាននូវការផ្តល់សេវាកម្មទេសចរណ៍យ៉ាង មានគុណភាព ។ គម្រោងនេះនឹងជាយន្តការដ៏សំខាន់សម្រាប់ការអភិរក្ស និងការការពារធន ធានធម្មជាតិ និងវប្បធម៌របស់ប្រជាជន ដែលបានទទួលការគំរាមកំហែងពីការកាប់បំផ្លាញ ធនធានធម្មជាតិ ។
គោលបំណងនៃផែនការនេះគឺផ្តល់នូវប្រយោជន៍រយ:ពេលវែងដល់ប្រ ជាជន និងសេដ្ឋកិច្ចមូលដ្ឋានតាមរយ:ការលើក ស្ទួយនូវសារសំខាន់ និងតម្លៃនៃវប្បធម៌ សេដ្ឋ កិច្ច និងបរិស្ថានរបស់តំបន់ទេសភាពនៃខេត្តមណ្ឌលគិរីនេះ និងជីវចម្រុះរបស់វា។
លោក ស៊ីម វ៉ាន់ថា លេខាទូទៅនៃផ្ទះស្នាក់ ដេអេ និងប្រធានក្រុមល្បាត បានមាន ប្រសាសន៍ថា សេវាកម្មទេសចរណ៍ ធម្មជាតិនៅក្នុង សហគមន៍របស់គាត់បានចាប់ផ្តើមក្នុងឆ្នាំ ២០០៧ និងចាប់តាំងពីពេលនោះមកជីវភាពរបស់ប្រជាជននៅទីនោះក៏មានភាពប្រសើរ ឡើងស្របពេលទៅនឹងការកើនឡើងនៃឱកាសការងារ និងការរកប្រាក់ចំណូលពីផ្ទះស្នាក់ ការនាំភ្ញៀវ និងការលក់ផលិតផលទឹកឃ្មុំ និងវត្ថុបុរាណ ។ តាមរយ:ទេសចរណ៍ធម្មជាតិប្រ ជាជននៅក្នុងសហគមន៍របស់ខ្ញុំមានការងារធ្វើ និងអាចរកប្រាក់ចំណូល បានច្រើនជាងមុន ។ សកម្មភាពកាប់ឈើខុសច្បាប់ ក៏ត្រូវបានកាត់បន្ថយ ហើយភ្ញៀវទេសចរជាតិ និងអន្តរជាតិ មានតំបន់ទស្សនា ច្រើនជាងមុន ។ ទន្ទឹមនិងការដាក់ឲ្យប្រើប្រាស់នូវផែនការយុទ្ធសាស្ត្រទេស ចរណ៍នេះ ខ្ញុំរំពឹងថា ភ្ញៀវទេសចរនឹងមានការយល់ ដឹងច្រើនអំពីធម្មជាតិ និងសេវាកម្មដែលវា បានផ្តល់ឲ្យ ។ ខ្ញុំក៏ចង់សំណូមពរឲ្យមាន ការបន្តការគាំទ្រដល់ប្រជាជន ក្នុងការរៀន ភាសាបរ ទេសដើម្បីស្រួលប្រាស្រ័យទាក់ទងជាមួយភ្ញៀវអន្តរជាតិ ។ កម្មវិធីដាក់ឲ្យប្រើប្រាស់ផែនការ យុទ្ធសាស្ត្រនេះ បានប្រារព្ធ ឡើងស្របពេលជាមួយ និងការសម្ពោធហាងកាហេ្វហាហ្វីឡុម ដែលគាំទ្រដោយអង្គការ WWF, ELIE, WCS, និងNOMAD ។
ហាងកាហេ្វនេះត្រូវបានបង្កើត ឡើងជាមជ្ឈមណ្ឌលទេសចរណ៍នៃខេត្តមណ្ឌលគិរី សម្រាប់ភ្ញៀវទេសចរទទួលបាននូវព័ត៌ មានស្តីពីតំបន់ទេសចរណ៍ធម្មជាតិក្នុងខេត្តនេះផ្ទាល់។ ជាផ្នែកមួយនៃការផ្សព្វផ្សាយកម្មវិធីនេះ អង្គការ WWF កម្ពុជាបានសហការ ជាមួយក្រុមហ៊ុនឯកជន Flying Bikes 2 ដើម្បីរៀបចំ ការប្រណាំងកង់ជំនាញតំបន់ភ្នំ និងការជិះកង់កម្សាន្ត ក្រោមប្រធានបទ ការជិះកង់ ដើម្បីប្រ ជាជន វប្បធម៌ និងធម្មជាតិក្នុងគោលបំណងបង្កើនការយល់ដឹងស្តីអំពីសារ សំខាន់នៃផលិត ផលទេសចរណ៍ ធម្មជាតិដែលមានស្រាប់ និងត្រូវការការអភិរក្សក្នុងខេត្តមណ្ឌលគិរី ដែលក្នុង នោះមានការចូលរួមពីអ្នកជិះកង់ប្រមាណ ១២០ នាក់មកពីគ្រប់ទិសទីក្នុងប្រទេសកម្ពុជា៕
ប្រភព៖ AKP
មតិយោបល់