នាយកដ្ឋានជំនួយមនុស្សធម៌និងការពារ ជនស៊ីវិល (ECHO) របស់សហភាពអឺរ៉ុបនឹង ផ្ដល់ទឹកប្រាក់ចំនួន ៦០ ម៉ឺនអឺរ៉ូ (ប្រមាណជា ៨៣២ ០០០ ដុល្លារអាម៉េរិក) ដើម្បីជួយកាត់ បន្ថយហានិភ័យនៃជំងឺឆ្លង តាមរយ:ទឹក កខ្វក់ ដែលកើតឡើងលើកុមារកម្ពុជា ដែលងាយរង គ្រោះ និងគ្រួសាររបស់ពួកគេនៅអំឡុងពេល និងក្រោយពេលគ្រោះទឹកជំនន់។
គ្រោះទឹកជំនន់ដែលកើតមានជាបន្ដបន្ទាប់ និងជារៀងរាល់ឆ្នាំនៅក្នុងប្រទេសកម្ពុជា បង្កឲ្យមានផលប៉ះពាល់ដល់ខេត្តចំនួន ១៩ លើខេត្តទាំង ២៥ នៃប្រទេស។ នៅក្នុងឆ្នាំ ២០១៣ គ្រោះទឹកជំនន់បានប៉ះពាល់ដល់ប្រជាពលរដ្ឋកម្ពុជា យ៉ាងហោចណាស់ចំនួន ១,៥ លាននាក់ ដែលក្នុងនោះរួមមានការបាត់បង់ជីវិត ការខូចខាតហេដ្ឋារចនាសម្ព័ន្ធទឹកស្អាត និងអនាម័យ (រួមមានអណ្ដូងទឹកបរិភោគ ប្រមាណ ១២ ០០០ កន្លែង) និងការបំផ្លិចបំផ្លាញផលដំណាំ និង មុខរបរចិញ្ចឹមជីវិតរបស់ប្រជាពលរដ្ឋផងដែរ។
យោងតាមសេចក្តីប្រកាសព័ត៌មានរបស់សហភាពអឺរ៉ុបចុះថ្ងៃទី ២២ ខែឧសភា ឆ្នាំ ២០១៤ ឲ្យដឹងថា មូលនិធិរបស់សហភាពអឺរ៉ុប នេះនឹងផ្ដល់លទ្ធភាពដល់អង្គការយូនីសេហ្វ ក្នុងការជួយពង្រឹងលទ្ធភាពត្រៀមបង្ការ និងកសាងនូវភាពធន់របស់សហគមន៍ នៅតាមតំបន់ ងាយរងគ្រោះដោយសារទឹកជំនន់ តាមរយៈការបន្សុទ្ធទឹកដោយប្រើប្រាស់សារធាតុក្លរីន និង ការស្ដារអណ្ដូង នៅក្នុងឃុំចំនួន ៥០ ។ ដើម្បីធានាឲ្យមានការអនុវត្ដសកម្មភាពទាំងនេះឲ្យ បានគ្រប់គ្រាន់ គម្រោងនឹងផ្ដល់ការបណ្ដុះបណ្ដាល ដល់មន្ដ្រីថ្នាក់ក្រោមជាតិចំនួន ១០០ នាក់ មកពីមន្ទីរអភិវឌ្ឍន៍ជនបទខេត្ដចំនួន ៥ និងការិយាល័យស្រុកចំនួន ១៨ ដែលស្ថិតក្រោម ឱវាទក្រសួងអភិវឌ្ឍន៍ជនបទ។
លោកស្រី Rana Flowers តំណាងអង្គការយូនីសេហ្វប្រចាំប្រទេសកម្ពុជាបានមានប្រ សាសន៍ថា “ថវិការបស់សហភាពអឺរ៉ុបនេះ នឹងផ្ដល់លទ្ធភាពឲ្យយូនីសេហ្វរៀបចំសកម្មភាព កម្រិតស្ថាប័នក្នុងការសម្អាតអណ្តូងឲ្យបានត្រឹមត្រូវ ក្រោយពេលគ្រោះទឹកជំនន់ និងកាន់តែ សំខាន់ជាងនេះទៅទៀត គឺធ្វើការកែសម្រួលគម្របអណ្ដូង និងលើកផ្ទៃជុំវិញអណ្តូងឲ្យខ្ពស់ និងជិតល្អជាងមុន ដើម្បីកុំឲ្យទឹកជំនន់អាចជ្រាបចូលអណ្ដូងបាន ។ ការធ្វើបែបនេះនឹងជួយធ្វើ ឲ្យមានភាពខុសប្លែកគ្នាយ៉ាងធំធេង នៅក្នុងការកាត់បន្ថយហានិភ័យ ដែលអាចកើតមាន ចំពោះកុមារ នៅក្នុងពេលដែលមានគ្រោះទឹកជំនន់កើតឡើង។”
គម្រោងក៏នឹងបណ្ដុះបណ្ដាលមន្ដ្រីថ្នាក់ភូមិចំនួន ៥០០ នាក់អំពីរបៀបលើកកម្ពស់ អនាម័យមូលដ្ឋាន ដើម្បីអប់រំដល់ប្រជាពលរដ្ឋតាម គ្រួសារឲ្យយល់ដឹងពីសារសំខាន់ នៃអនា ម័យ សម្រាប់បង្ការជំងឺនានាដូចជាជំងឺរាករូសជាដើម ។ នៅក្នុងប្រទេសកម្ពុជាមានកុមារ ប្រមាណ ២ ៣០០ នាក់បានស្លាប់ជារៀងរាល់ឆ្នាំ បង្កដោយជំងឺ ដែលគេអាចបង្ការបានដូច ជាជំងឺរាករូសជាដើម ។ ការបណ្ដុះបណ្ដាលនេះ នឹងមានដាក់បញ្ចូលការសាកល្បងប្រើប្រាស់ បង្គន់បណ្ដែតទឹកចល័តបែបធម្មជាតិ ដែលអាចស្តុកលាមក និងទឹកនោមប្រកបដោយអនា ម័យ និងបំលែងទៅជាជីកំប៉ុស្ដិ៍ក្នុងអំឡុង ពេលមានគ្រោះទឹកជំនន់ ហើយដែលក្រោយមក គេអាចយកមកវាមកប្រើជាជីកសិកម្មប្រកបដោយសុវត្ថិភាព។
លោក Bernard Jaspers Faijer អ្នកគ្រប់គ្រងកម្មវិធីរបស់ ECHO ប្រចាំប្រទេសកម្ពុជា បានមានប្រសាសន៍ថា “សហភាពអឹរ៉ុបធ្វើ សកម្មភាព នៅពេលមានតម្រូវការជំនួយសង្គ្រោះ បន្ទាន់ ។ ប្រទេសកម្ពុជា ជាញឹកញាប់ទទួលរងផលប៉ះពាល់ ពីគ្រោះមហន្ដរាយ ទឹកជំនន់។ នៅ ពេលដែលតម្រូវការមនុស្សធម៌មានកម្រិតលើសពីសមត្ថភាពនៅមូលដ្ឋាន ដែលអាចផ្តល់ បាន យើងបានត្រៀមខ្លួន រួចជាស្រេច ដើម្បីជួយដល់អ្នកដែលរងផលប៉ះពាល់ដោយសារ គ្រោះមហន្ដរាយនានា ។
ការងាររបស់អង្គការយូនីសេហ្វមានសារសំខាន់យ៉ាងធំធេង ក្នុងការ គាំទ្រប្រជាពលរដ្ឋឲ្យចេះត្រៀមខ្លួនឲ្យបានកាន់តែប្រសើរជាងមុន ក្នុងការទប់ទល់នឹងគ្រោះ ទឹកជំនន់នាពេលអនាគត”។
មូលនិធិនេះ ក៏នឹងប្រើប្រាស់ផងដែរ ដើម្បីបណ្ដុះបណ្ដាលមន្ដ្រីថ្នាក់ក្រោមជាតិអំពី របៀបប្រើប្រាស់ទូរស័ព្ទដៃប្រកបដោយ ភាពច្នៃប្រឌិត ដើម្បីបញ្ជូនព័ត៌មានអំពីការវាយតម្លៃ ការខូចខាតអណ្ដូង ដែលរងផលប៉ះពាល់ដោយ សារទឹកជំនន់ទៅកាន់ មូលដ្ឋានទិន្នន័យថ្នាក់ ជាតិ ក្នុងអំឡុង និងក្រោយពេលដែលមានគ្រោះអាសន្នកើតឡើង ។ ព័ត៌មាននេះនឹងផ្ដល់ឲ្យ រដ្ឋាភិបាល អង្គការសហប្រជាជាតិ និងទីភ្នាក់ងារផ្ដល់ជំនួយដទៃទៀតនូវព័ត៌មានសំខាន់ៗ ឲ្យ បានទាន់ពេលវេលា ដូចជាព័ត៌មានអំពីគ្រួសារ និងតំបន់រងផលប៉ះពាល់ ដែលពុំមានទឹកស្អាត បរិភោគ ដើម្បីឲ្យស្ថាប័នទាំងនោះអាចចាត់វិធានការឆ្លើយតបជាបន្ទាន់បាន៕
ប្រភព៖ AKP
មតិយោបល់