កាលពីរសៀលថ្ងៃទី ២៦ ខែ ឧសភា ឆ្នាំ ២០១៤ ម្សិលមិញនេះ លោក LE QUOC KHANH អគ្គនាយករងកាសែតប្រជាជនវៀតណាមបានជម្រាបនៅ ក្នុងជំនួបពិភាក្សាជាមួយឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន នារសៀលថ្ងៃទី ២៦ ខែឧសភា ឆ្នាំ ២០១៤នៅទីស្តីការក្រសួងព័ត៌មានថា កាសែតប្រជាជនវៀតណាមនឹងបង្កើត ការិយាល័យតំណាងរបស់ខ្លួនប្រចាំនៅកម្ពុជានា ពេលឆាប់ៗ ខាងមុខនេះ។
លោកអគ្គនាយករងក៏បានស្នើសុំការគាំទ្រពីឯកឧត្តមរដ្ឋមន្ត្រីក្រសួងព័ត៌មាន ក្នុងការ ជួយសម្រួលដល់ការងារក្នុងបង្កើតការិយាល័យតំណាងនេះផងដែរ ដើម្បីចូលរួមចំណែកកិច្ច សហការគ្នាផ្សព្វផ្សាយព័ត៌មាន បម្រើដល់ផលប្រយោជន៍នៃប្រទេសទាំងពីរវៀតណាម-កម្ពុជា ។ លោកអគ្គនាយករងបានបញ្ជាក់ថា នៅពេលកាសែតប្រជាជនវៀតណាមបើកការិយាល័យ តំណាងរបស់ខ្លួនប្រចាំនៅកម្ពុជា កាសែតប្រជាជនវៀតណាមនឹងអនុវត្តន៍ឲ្យបានត្រឹមត្រូវតាម ច្បាប់របស់ប្រទេសកម្ពុជា និងគោរពនូវក្រមសីលធម៌វិជ្ជាជីវៈសារព័ត៌ មានរបស់កម្ពុជា ពិសេស ការផ្សព្វផ្សាយឲ្យស្របតាមជំនាញរបស់សារព័ត៌មាន ។ លោកអគ្គនាយករងបានជម្រាបផង ដែរថា កាសែត ប្រជាជនវៀតណាម បច្ចុប្បន្នមានការិយាល័យតំណាងប្រចាំប្រទេសចំនួន ៤ រួមមានៈ ប្រចាំប្រទេសបារាំង ចិន ថៃ និងឡាវ ហើយបាន ធ្វើការបោះពុម្ពផ្សាយជា ៥ ផ្នែក ផ្សេងៗគ្នាជាភាសាចិន អង់គ្លេស និងភាសារបស់ខ្លួន ហើយនៅឆ្នាំ ២០១៤ នេះកាសែត ប្រជាជន វៀតណាម គ្រោងនឹងផ្សាយជាទូរទស្សន៍ផងដែរ ។
ឯកឧត្តម ខៀវ កាញារីទ្ធ បានសម្តែងនូវការគាំទ្រ និងអនុញ្ញាតឲ្យកាសែតប្រជាជន វៀតណាមបង្កើតការិយាល័យតំណាងរបស់ខ្លួនប្រចាំនៅកម្ពុជា ដែលក្រសួងព័ត៌មានត្រៀម ជួយសម្រួលដល់កិច្ចការងារផ្សេងៗក្នុងបង្កើតការិយាល័យតំណាងនេះ ។ ឯកឧត្តមរដ្ឋមន្ត្រីក៏ បានរំលឹកថា បច្ចុប្បន្នមានការិយាល័យតំណាងរបស់ទូរទស្សន៍ វិទ្យុ និងទីភ្នាក់ងារសារព័ត៌ មានរបស់វៀតណាមប្រចាំនៅកម្ពុជាហើយ តែនៅខ្វះតែការិយាល័យតំណាងរបស់កាសែត ប្រជាជនវៀតណាមប៉ុណ្ណោះ ។ ដូច្នេះនៅពេលខាងមុខនេះ នឹងមានការិយាល័យតំណាង របស់កាសែតប្រជាជនវៀតណាមប្រចាំកម្ពុជា ដែលជាផ្នែកមួយយ៉ាងសំខាន់ក្នុងរួមចំណែក ផ្សព្វផ្សាយព័ត៌មានពីកម្ពុជាទៅឲ្យប្រជាជនវៀតណាមបានដឹង និងផ្សាយព័ត៌មានពីវៀតណាម មកឲ្យប្រជាជនកម្ពុជាបានដឹងផងដែរ ។
ឯកឧត្តមរដ្ឋមន្ត្រីបានបញ្ជាក់ផងដែរថា កាសែតកម្ពុជា និងកាសែតប្រជាជន ដែលជា កាសែតរបស់រដ្ឋនោះមិនបានចេញផ្សាយទៀតទេ ដោយកាសែតកម្ពុជាបានប្តូរទៅជាទស្សន វដ្តីកម្ពុជាវិញ ហើយក្រសួងព័ត៌មានបានផ្តោតទៅលើការផ្សព្វផ្សាយ តាមរយៈទូរទស្សន៍ វិទ្យុ និងទីភ្នាក់ងារសារព័ត៌កម្ពុជា “AKP” ដោយទុកឲ្យកាសែតឯកជនធ្វើការប្រឡងប្រណាំងគ្នា ដើម្បីទាក់ទាញអតិថិជនមិត្តអ្នកអាន ព្រោះបច្ចុប្បន្ននៅកម្ពុជាមានការប្រឡងប្រណាំងគ្នា ក្នុង ការផ្សព្វផ្សាយនូវព័ត៌មានល្អ លឿន ប្លែក និងប្រកបដោយវិជ្ជាជីវៈ និងក្រមសីលធម៌ ៕
ប្រភព៖ AKP
មតិយោបល់