ភ្នំពេញ ៖កាលពីថ្ងៃទី២៧ ខែឧសភា ឆ្នាំ២០១៤ ម្សិលមិញ សម្ដេចអគ្គមហាសេនាបតីតេជោ ហ៊ុន សែន បានជំរុញឲ្យធ្វើ កំណែទម្រង់លើវិស័យ អប់រំត្រូវធ្វើជាបន្តទៀត ដោយក្នុងនោះផ្នែកមួយដ៏សំខាន់គឺកំណែ ទម្រង់ក្នុងក្របខណ្ឌឧត្ដម សិក្សាតែម្ដង។
ក្នុងពិធីប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញចំនួន ៣ ០៣៨នាក់នាព្រឹកថ្ងៃទី ២៧ ខែឧសភា ឆ្នាំ ២០១៤ នៅមជ្ឈមណ្ឌលសន្និបាត និងពិព័រណ៍កោះពេជ្រ សម្ដេចតេជោនាយករដ្ឋមន្ត្រីថ្លែងថា “ប៉ុន្មានថ្ងៃមុននេះឯកឧត្ដមរដ្ឋមន្ត្រី ក្រសួងអប់រំបានប្រកាស ទាក់ទិនជាមួយនិងការផ្អាកការបង្កើតសាកលវិទ្យាល័យថ្មីៗ ខ្ញុំមិនច្បាស់ពីបញ្ហានេះទេ ក៏ប៉ុន្តែ ខ្ញុំក៏យល់ស្របថាអ្វី ដែលជាការខិតខំរបស់យើងក្នុងពេលនេះ គឺពង្រឹងនូវគុណភាពនៃសាកលវិទ្យាល័យ ដែលមានស្រាប់ ដែលរហូតមកដល់ពេលនេះមានជាង ១០០ សាកលវិទ្យា ល័យទាំងរដ្ឋ និងឯកជន ដូច្នេះត្រូវពង្រឹងសាកលវិទ្យាល័យទាំងនេះ”។
សម្ដេចតេជោមានប្រសាសន៍ថា យើងត្រូវដាក់ចេញនូវគោលដៅពង្រឹងផែនការនេះដែលចែកចេញជា ៥ ផ្នែកគឺទីមួយ លើកកម្ពស់ជីវភាព និងសមត្ថភាពសាស្ត្រាចារ្យ មន្ត្រី និងបុគ្គលិក ។ ទីពីរ លើកកម្ពស់គុណភាពសិក្សារបស់និស្សិត ។ ទីបី ជំរុញសកម្មភាពរៀន និងបង្រៀនឲ្យប្រសើរជាងមុន ។ ទីបួន ជំរុញការស្រាវជ្រាវឲ្យកាន់តែទូលំទូលាយ និងមាន គុណភាពជាងមុន និងទីប្រាំ បង្កើនសកម្មភាព ចុះជួយសហគមន៍ឲ្យកាន់តែជិតស្និទ្ធ និងទូលំ ទូលាយជាងមុន ដើម្បីផ្សារភ្ជាប់ទ្រឹស្ដីទៅ និងការអនុវត្តជាក់ស្ដែង ។ ឥឡូវគ្រប់សាកលវិទ្យា ល័យទាំងអស់ ទាំងរដ្ឋ ទាំងឯកជនត្រូវផ្ដោតការយកចិត្តទុកដាក់ទៅ លើការពង្រឹងគុណភាព ហើយបើសិនអាចធ្វើទៅបាន យើងអាចនឹងតម្រង់ទិសនៃមុខវិជ្ជា ដើម្បីឲ្យស្របទៅ និងទីផ្សារ ការងារ តម្រូវការរបស់សង្គម ដែលចេះតែកើនឡើងនូវអ្នកបច្ចេកទេស ឬអ្នកចេះដឹងលើផ្នែក ខ្លះ ដែលយើងមិនទាន់មាន៕
មតិយោបល់