ភ្នំពេញ ៖ រថយន្តមួយគ្រឿងជិះដោយបុរសជនជាតិកូរ៉េ២នាក់បានបុករះរថយន្តនិងម៉ូតូ៣កន្លែងផ្សេងៗពីគ្នា ហើយរថយន្តបង្កក៏ត្រូវប្រជាពលរដ្ឋរួមទាំងសមត្ថកិច្ចឃាត់បានផងដែរ ហេតុការណ៍នេះបានកើតឡើងកាលពីវេលាម៉ោង១០និង៤០នាទីយប់ថ្ងៃទី២៣ខែមិថុនាឆ្នាំ២០១៤ ត្រង់ចំណុចមុខក្រសួង៣ស្ថាប័ន តាមបណ្ដោយផ្លូវលេខបេតុងលេខ១០៧ ស្ថិតក្នុងសង្កាត់ទួលសង្កែ ខណ្ឌឫស្សីកែវ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកហ៊ីយ៉ន់ដាយ សាន់តា ពណ៌ទឹកប្រាក់ ពាក់ស្លាកលេខ ភ្នំពេញ 2X-1920 ជិះដោយបុរសជនជាតិកូរ៉េ២នាក់ក្នុងស្ថានភាពស្រវឹង ធ្វើដំណើរតាមបណ្ដោយលេខ១៨៤ បំរុងបត់ចូលផ្ទះ ក៏បានប៉ះរថយន្តមួយគ្រឿងម៉ាកតូយ៉ូតាកាមរី ពណ៌ទឹកប្រាក់ ពាក់ស្លាកលេខ កំពង់ចាម 2A-3291 ធ្វើអោយឆ្កូតថ្នាំរថយន្តបន្តិចបន្តួច ហើយរថយន្តបង្កភ័យពេកក៏បានរថយន្តរត់គេច តាមបណ្ដោយផ្លូវព្រះនរោត្ដម មកដល់ចំណុចក្បែរក្រុមហ៊ុនទូរស័ព្ទBeeline ក៏បានគៀរម៉ូតូមួយគ្រឿងម៉ាក ឌូក ពណ៌សលាយទឹកក្រូច អត់មានស្លាកលេខជិះដោយបុរសម្នាក់បណ្ដាលអោយដួលរងរបួសស្រាល ហើយរថយន្តបង្កនៅតែបន្តដំណើរទៅមុខរត់គេចតាមបណ្ដោយផ្លូវកម្ពុជាក្រោម រហូតមកចំណុចមុខសណ្ឋាគាររីហ្គែល ក៏បានគៀម៉ូតូមួយ ម៉ាកគុបជិះដោយនារីម្នាក់បណ្ដាលអោយដួលរងរបួសធ្ងន់ចំជើងខាងឆ្វេង រថយន្តបង្កនៅតែបន្តដំណើរទៅមុខរត់គេចទៀត ដោយមានប្រជាពលរដ្ឋឃើញហេតុការណ៍ដេញតាមពីក្រោយរហូត រថយន្តបង្កបានបើករត់តាមផ្លូវនានាក្នុងរាជធានីភ្នំពេញ រហូតដល់ចំណុចផ្លូវលេខ១០៧ មុខក្រសួង៣ស្ថាប័ន ក៏ត្រូវប្រជាពលរដ្ឋនិងសមត្ថកិច្ចឃាត់រថយន្តបង្ករួមទាំងអ្នកបើកបរដែលជាជនជាតិកូរ៉េបានតែម្ដង។ បន្ទាប់ពីកើតហេតុសមត្ថកិច្ចបានស្វែងរកជនរងគ្រោះទាំងអស់និងបានយករថយន្តបង្កយកទៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយតាមនីតិវិធីច្បាប់៕
ព័ត៌មានជាតិ
មតិយោបល់