អាជ្ញាធរចិន បានឃាត់ខ្លួនមនុស្សប្រមាណជា ៣៨០នាក់ ដោយសង្ស័យជាជំហានដំបូងថា ក្រុមមនុស្សទាំងនេះ ជាប់ពាក់ព័ន្ធនឹងអំពើភេរវកម្ម ខណៈដែលអាជ្ញាធរប្រឈមនឹងការដោះស្រាយបញ្ហាអំពើហិង្សា ដែលកើតចេញពីក្រុមកាន់សាសនាអ៊ីស្លាមនៅខេត្ត ស៊ីជាំង។
ទូរទស្សន៍រដ្ឋចិនបានផ្សព្វផ្សាយថា មនុស្សទាំងជាង ៣៨០នាក់នោះ ជាប់ពាក់ព័ន្ធនឹងករណីហិង្សាភេរវកម្ម ចំនួន៣២លើក នៅតាមតាមផ្សារក្នុងទីក្រុង Urumqi នៃខេត្តស៊ីជាំង ហើយការឃាត់ខ្លួននេះ ត្រូវបានធ្វើឡើងបន្ទាប់ពីអាជ្ញាធរបើកយុទ្ធនាការស៊ើបអង្កេតជិត១ឆ្នាំ។
កាលពីខែឧសភាកន្លងទៅនេះ ក្រុមសកម្មប្រយុទ្ធបានចូលក្នុងរថយន្តចំនួន២ ហើយបានសម្លាប់មនុស្សអស់៣៩នាក់។ ករណីវាយប្រហារនោះ មន្ត្រីជាន់ខ្ពស់រដ្ឋាភិបាលចោទប្រកាន់ទៅលើក្រុមសកម្មប្រយុទ្ធនៅក្នុងខេត្តស៊ីជាំង។
ខណៈពេលស៊ើបអង្កេត អាជ្ញាធរបានរឹបអូសយកបានឧបករណ៍ចំនួន ២៦៤ប្រភេទ និងសារធាតុផលិតអាវុធជាតិផ្ទុះចំនួន៣,១៥តោន។
គួរបញ្ជាក់ផងដែរថា ស៊ីជាំង គឺជាកន្លែងទឹកដីកំណើតនៃជនជាតិដើមអ៊ុយហួរ កាន់សាសនាអ៊ីស្លាម។ ជាញឹកញាប់ តែងកើតមានហិង្សាពីក្រុមជនជាតិដើមទាំងនោះ ដើម្បីទាមទារសិទ្ធិសេរីភាព៕
មតិយោបល់