ទីភ្នាក់ងារព័ត៌មានក្យូដូរបស់ជប៉ុនរាយកាណ៍ ថា ក្រុងព្យុងយ៉ាងទំនងជានឹងជូនដំណឹងដល់ក្រុងតូក្យូ ពី ការបង្កើតក្រុមមួយរបស់ខ្លួនដើម្បីទទួល ធ្វើការស៊ើបអង្កេតថ្មី នៅក្នុងការចាប់ពង្រត់ជនជាតិជប៉ុន ។
ក្យូដូបាននិយាយថា កិច្ចប្រជុំពីរថ្ងៃនឹងចាប់ផ្តើមនៅថ្ងៃទី១ ខែកក្កដា ហើយលោក សុង អ៊ីល ហូ (Song IL Ho) ឯកអគ្គរដ្ឋទូតរបស់កូរ៉េខាងជើង សម្រាប់កិច្ចចរចា ធ្វើឱ្យមានទំនាក់ទំនងជា ប្រក្រតីឡើងវិញជាមួយជប៉ុនគេរំពឹងថា នឹងពន្យល់នូវរចនាសម្ព័ន្ធរបស់ក្រុមនេះ ដល់លោក ជូនីស៊ី អ៊ីហារ៉ា ( Junichi Ihara ) អគ្គនាយកការិយាល័យកិច្ចការអាស៊ី និងអូសេអានី នៅឯក្រសួងការបរទេសជប៉ុន ។
ជប៉ុន និងកូរ៉េខាងជើងបានព្រមព្រៀងគ្នា កាលពីចុងខែឧសភាថា កូរ៉េខាងជើងនឹងបង្កើត គណៈកម្មាធិការមួយ ដើម្បីធ្វើការស៊ើបអង្កេតឡើងវិញនូវ ទីកន្លែងនៃជនជាតិជប៉ុន ដែលគេចាប់ពង្រត់ហើយជាការឆ្លើយតបវិញ ជប៉ុននឹងលុបចោលទណ្ឌកម្មជាឯកតោភាគីខ្លះ ដែលបានដាក់លើកូរ៉េខាងជើង ។
កាលពីឆ្នាំ២០០២ កូរ៉េខាងជើងបានទទួលស្គាល់ថា មានការចាប់ពង្រត់ជនជាតិជប៉ុន ១៣នាក់ នៅក្នុងទសវត្សឆ្នាំ១៩៧០ និង១៩៨០ ប៉ុន្តែបាន និយាយដដែលៗ ចាប់តាំងពីនោះមកថា បញ្ហានេះគេបានដោះស្រាយរួចហើយជាមួយប្រទេសជប៉ុន ដោយមានអ្នកដែលគេចាប់ពង្រត់៥ នាក់ ត្រូវ បានគេអនុញ្ញាតឱ្យត្រឡប់ទៅស្រុកវិញនៅប្រទេសជប៉ុន ហើយអ្នកនៅសល់៨នាក់ ត្រូវបានគេប្រកាសថា ស្លាប់ ៕
មតិយោបល់