របាយការណ៍ស្តីពីស្ថានភាពនាំចេញអង្ករបានឲ្យដឹងថា មានក្រុមហ៊ុននាំចេញអង្ករដែលកំពុងប្រតិបត្ដិការរកស៊ីនៅកម្ពុជាសរុបចំនួន ៨៤ ក្រុមហ៊ុន ដែលក្នុងឆមាសទី ១ ឆ្នាំ២០១៤ នេះសម្រេចបាន ១៧៧ ៩២៨ តោន កើនឡើង ១% បើធៀបនឹងឆ្នាំ ២០១៣ ក្នុងរយៈពេលដូចគ្នាមានចំនួន ១៧៥ ៩៥៩ តោន។
ក្រុមហ៊ុននាំចេញទាំងនោះបានព្យាករណ៍ថា នឹងអាចនាំចេញឲ្យបានក្នុងបរិមាណ ៦ សែនតោននៅក្នុងឆ្នាំនេះ ដែលជាតួលេខមួយខិតជិតដល់គោលដៅនាំចេញអង្ករចំនួន ១លានតោនត្រឹមឆ្នាំ ២០១៥ ស្របតាមផែនការរបស់រាជរដ្ឋាភិបាលកម្ពុជា។
ក្នុងឆមាសទី ១ នេះ ក្រុមហ៊ុននាំចេញអង្ករ AMRU RICE(CAMBODIA) CO., LTD ឈរនៅលំដាប់លេខ ១ នៃការនាំចេញអង្ករ ដោយសម្រេចបាន ២៥ ០៩៩ តោន ។ ក្រុម ហ៊ុននាំចេញអង្ករ KHMER FOOD CO., LTD ឈរនៅលំដាប់លេខ២ មានចំនួន ២៣ ៧៧១តោន ។ លំដាប់លេខ ៣ បានទៅលើក្រុមហ៊ុន GOLDEN RICE (CAMBODIA) CO., LTDដែលនាំចេញបានចំនួន ១២ ៦២៩ តោន ។ អ្នកឈរលេខរៀងទី ៤ គឺក្រុមហ៊ុនLORAN GROUP LPC បានធ្វើការនាំចេញ ១១ ១៩០ តោន។ ចំណែកក្រុមហ៊ុនក្រៅពីនោះគឺសម្រេចការនាំចេញបានតែត្រឹមក្នុងកម្រិតទាបនៅឡើយ។
ប្រទេសដែលជាគោលដៅនៃការនាំចេញអង្ករកម្ពុជាក្នុងឆមាសទី ១ នេះមាន ៥៤ប្រទេស ដូចជាប្រទេសនៅសហភាពអឺរ៉ុប ចិន សមាគមអាស៊ាន តំបន់អាស៊ី និងអាហ្រិ្វក ក្នុងនោះមានតែប្រទេសប៉ូឡូញ បារាំង ហូឡង់ និងម៉ាឡេស៊ី តែប៉ុណ្ណោះដែលធ្វើការនាំចេញ បានច្រើនជាងគេ។
អង្ករដែលកម្ពុជាបានធ្វើការនាំចេញក្នុងរយៈពេល ៦ ខែនេះ គឺមានប្រភេទជាអង្ករក្រអូបចម្រុះចំនួនជាង ១០ ៣៦៩ តោន អង្ករក្រអូបនាងម្លិះជាង ៨ ៧៩០ តោន អង្ករក្រអូបសូមាលីចំនួន ២ ៣៣៧ តោន អង្ករក្រអូបផ្កាម្លិះ/ផ្ការំដួលមានចំនួន ៦៦ ៣៤១ តោន អង្ករក្រអូបសរីរាង្គចំនួន ១៣៦ តោន អង្ករក្រអូបភ្លឺ ៤០៤ តោន អង្ករចម្រុះគ្រាប់វែង ៦៥ ៤៦០ តោន អង្ករសប្រណិតចំនួន ១២ ៩៨៦ តោន និងអង្ករចំហុយគ្រាប់វែងចំនួន ១១ ១០៤ តោន។
លោក គឹម សាវុធ ប្រធានសម្ព័ន្ធអ្នកនាំចេញអង្ករកម្ពុជា និងជាប្រធានក្រុមហ៊ុននាំចេញអង្ករខ្មែរហ្វ៊ូត(Khmer Food)បានឲ្យដឹងថា នាពេលចុងក្រោយនេះអង្ករក្រអូបរបស់កម្ពុជានៅ លើទីផ្សារអន្តរជាតិមានតម្លៃ ៧៥០ ដុល្លារអាម៉េរិកក្នុងមួយតោន ។ ចំណែកអង្ករចម្រុះលក់ បានក្នុងតម្លៃ ៤៤០ ដុល្លារអាម៉េរិកក្នុងមួយតោន។
ក្នុងឆមាសទី ៦ ឆ្នាំ ២០០៩ កម្ពុជានាំចេញអង្ករចំនួន ៣ ៧៧៩ តោន ឆ្នាំ ២០១០ នាំចេញបាន ៥៥ ៧៧៨ តោន ឆ្នាំ ២០១១ នាំចេញបាន ៨០ ៨៧៧ តោន ឆ្នាំ ២០១២ នាំចេញបាន ៧៨ ០០៧ តោន ឆ្នាំ ២០១៣ នាំចេញបាន ១៧៥ ៩៥៩ តោន និង ៦ ខែឆ្នាំ ២០១៤ នេះនាំចេញបាន ១៧៥ ៩៥៩ តោន។
ដើម្បីរួមចំណែកជំរុញប្រសិទ្ធភាពការនាំចេញអង្ករបន្ថែមទៀត ស្របតាមគោលនយោ បាយរាជរដ្ឋាភិបាលនាំចេញអង្ករឲ្យបាន ១ លានតោននៅឆ្នាំ ២០១៥ នោះ កាលពីដើមខែ ឧសភា ក្រសួងសេដ្ឋកិច្ច និងហិរញ្ញវត្ថុបានសម្រេចយល់ព្រមលើកលែងកាតព្វកិច្ចបង់កម្រៃបែបបទគយចំពោះការនាំចេញទំនិញអង្ករផងដែរ ៕
មតិយោបល់