ភ្នំពេញ៖ សាលារាជធានីភ្នំពេញ បើកកិច្ចប្រជុំស្វែងរកដំណោះស្រាយប្រព័ន្ធលូទឹកនៅក្នុងរាជធានីភ្នំពេញ ដោយផ្ដោតសំខាន់លើដំណោះស្រាយជាក់ស្ដែងពីបញ្ហាជំនន់ទឹកភ្លៀងក្នុងទីក្រុង ខណៈដែលបញ្ហានេះកំពុងតែត្រូវបានចាប់អារម្មណ៍ និងមានការរិះគន់ពីសំណាក់ប្រជាពលរដ្ឋ។
នាព្រឹកថ្ងៃទី១៤ ខែកក្កដា ឆ្នាំ២០១៤ លោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បើកកិច្ចប្រជុំស្វែងករដំណោះស្រាយបញ្ហាស្ទះលូដោយសារជំនន់ទឹកភ្លៀង។ លោក អភិបាលរាជធានី បានណែនាំដល់មន្ត្រី ជំនាញ និងអាជ្ញាធរដែនដី ត្រូវសហការគ្នាធ្វើការងារជាកញ្ចប់ ជៀសវាងការឆ្លើយដាក់គ្នាដោយគ្មានការទទួលខុសត្រូវ។ “បញ្ហាលូ មិនមែនជារឿងថ្មីនោះទេ យើងបានរៀបចំ និងដាក់ផែនការរួចអស់ ហើយ តែសំខាន់នៅត្រង់ថាយើងធ្វើបានកំរិតណា”។ នេះជាសំដីរបស់លោកអភិបាលបានបន្ថែម។
កន្លងមក សាលារាជធានីភ្នំពេញ បានផ្តល់ថវិកាដល់សាលាខណ្ឌ៥លាន រៀលក្នុង១ខែ ដើម្បីបំរើឲ្យការងារថែទាំ និងស្តារប្រឡាយក្នុងភូមិសាស្ត្រដែលខ្លួនទទួលខុសត្រូវ។ ប៉ុន្តែទោះបីយ៉ាង ណា ការរំលោភអាងស្តុកទឹក និងប្រឡាយទឹកពីអ្នកមានប្រាក់ មានអំណាចនៅតែកើតមាន។
តំបន់ដែលមានទឹកលិច ខ្លាំងជាងគេក្នុងរាជធានីភ្នំពេញ រួមមាន តំបន់មុខអតីតរដ្ឋសភាចាស់ តំបន់ជុំវិញ វត្តភ្នំ ផ្លូវកម្ពុជាក្រោម ផ្លូវលេខ៣១៥ ផ្លូវលេខ ៥៩២ ផ្លូវម៉ៅសេទុងមុខស្ថានទូតចិន ផ្លូវសហព័ន្ធរុស្សីមុខផ្សារសេនជូរីផ្លាហ្សា និងតំបន់ផ្សារកណ្តាល ជាដើម ។ល។
លោកអភិបាលរាជធានីភ្នំពេញ ក៏បានធ្វើការស្តីបន្ទោសដល់ក្រុមហ៊ុនស៊ីនទ្រី ដែលជាក្រុមហ៊ុនម៉ៅការ ប្រមូលសំរាមតែមួយគត់ក្នុងរាជធានីភ្នំពេញ ពីភាពអសមត្ថភាពក្នុងការអនុវត្តការងារប្រមូលសំរាម និងមិនបានអនុវត្ត ឲ្យបានត្រឹមត្រូវតាមកិច្ចសន្យាជាមួយសាលារាជធានីភ្នំពេញ៕
មតិយោបល់