ភ្ញៀវទេសចរណ៍ជាតិនិងអន្តជាតិមកកម្សាន្តលេងនៅខេត្តមណ្ឌលគិរីក្នុងរយ:ពេល៦ខែ ដើម ឆ្នាំ២០១៤ មាន ចំនួនយ៉ាងច្រើនកុះករគួរឲ្យកត់សម្គាល់ដោយភ្ញៀវទេសចរ លេង មានភាពសប្បាយរីករាយពួកគាត់មកស្រូបយកខ្យល់អាកាសដ៏បរិសុទ្ធ និងគយគន់ទេសភាពជួរភ្នំតូចធំព្រៃប្រឹក្សាខៀវស្រងាត់ ប្រៀបបានទៅនឹងផ្ទៃសមុទ្រសាគរ ទិដ្ឋភាពទាំងនេះក៏បានធ្វើឲ្យពួកគាត់ធូរស្បើយអារម្មណ៍រំសាយរាល់ទុក្ខកង្វល់ផងដែរ ។
បើតាមរបាយការណ៏ពីមន្ទីរទេសចរណ៍ខេត្តមណ្ឌលគិរី បានឲ្យដឹងថា ក្នុងរយ:ពេល៦ខែដើមឆ្នាំ២០១៤នេះ ភ្ញៀវទេសចរណ៍ជាតិ និងអន្តរជាតិដែលបានមកលេងកម្សាន្តខេត្តមណ្ឌលគិរី សរុបមានចំនួន ៧៣,៥៩៤នាក់ ក្នុងនោះ ភ្ញៀវជាតិ មានចំនួន ៧០,៥៩៧នាក់ ភ្ញៀវអន្តរជាតិមានចំនួន៣០០២នាក់ ហើយតួលេខនេះបើធៀបទៅ នឹងរយ:ពេល៦ ខែដើមឆ្នាំដូចគ្នា ក្នុងឆ្នាំ២០១៣កន្លងទៅ ចំនួនភ្ញៀវទេសចរណ៍សរុបមានការកើនឡើង ៧៥៩៥នាក់ ស្មើនឹង១១,៥០% ភ្ញៀវជាតិកើនឡើង ៧៥២៦នាក់ ស្មើនឹង១១,៩៨% ភ្ញៀវអន្តរជាតិកើនឡើង៤៤នាក់ ស្មើនឹង១,៤៨% ។ ចំពោះរមណីយដ្ឋានដែលជាគោលដៅទីមួយ របស់បងប្អូនភ្ញៀវទេសចរណ៍និយមទៅលេងកម្សាន្តនោះ គឺ រមណីយដ្ឋានទឹកជ្រោះប៊ូស្រា ក្រៅពីនោះខេត្តមណ្ឌលគិរី ក៏នៅមានរមណីយដ្ឋានដែលមានភាពទាក់ទាញជាច្រើនទៀត ផងដែរ ដូចជារមណីយដ្ឋាន សមុទ្រឈើ ចម្ការកាហ្វេ ទឹកជ្រោះដំណាក់ស្ដេច ទឹកជ្រោះរមនា ទឹជ្រោះជ្រៃធំ ទឹកជ្រោះ ក្បាលព្រះ ភ្នំណាំលៀ នឹងរមណីយដ្ឋានវប្បធម៌ ភ្នំដោះក្រមុំ ជាដើម ។
ប្រធានមន្ទីរទេសចរណ៏ខេត្តមណ្ឌលគិរី លោក ងិនសុវិមានក៏បានបញ្ជាក់ផងដែរថា មន្ទីរទេសចរណ៍មិនមានគម្រោងនឹងបង្កើតរមណីយដ្ឋានថ្មីទេ ប៉ុន្តែមន្ទីរនឹងរៀបចំកែលំអរនិង អភិវឌ្ឍន៍រមណីយដ្ឋានដែលមានក្នុងពេលបច្ចុប្បន្នចំនួន១៧រមណីយដ្ឋានឲ្យមានភាពស្រស់ស្អាតនឹងមានសោភណ្ឌ័ភាពក្នុងកាទាក់ទាញអារម្មណ៍ជាងនេះទៅទៀត ៕
មតិយោបល់