ភ្នំពេញ ៖ បុរសម្នាក់ស្រវឹងស្រាជោគជាំជិះម៉ូតូបោះពួយក្នុងល្បឿនលឿនក៏ជ្រុលទៅបុករថយន្តតាក់ស៊ីមួយគ្រឿងបត់ឆ្លងផ្លូវចូលបុរី បណ្ដាលអោយដួលម៉ូតូអូសជាង១០ម៉ែត្ររងរបួសធ្ងន់ ហេតុការណ៍នេះបានកើតឡើងកាលពីវេលាម៉ោង១២និង៥០នាទីរំលងអាធ្រាត្រឈានចូលថ្ងៃទី២៣ខែកក្កដាឆ្នាំ២០១៤ ត្រង់ចំណុចមុខក្រសួងមហាផ្ទៃ តាមបណ្ដោយផ្លូវព្រះនរោត្ដម ស្ថិតក្នុងសង្កាត់ទន្លេបាសាក់ ខណ្ឌចំការមន។
ជនរងគ្រោះឈ្មោះ គីម សីហា អាយុ២៥ឆ្នាំមានទីលំនៅបុរី៩៩៩ សង្កាត់ចាក់អង្រែលើ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកស៊ុយស៊ូគី លែត ពណ៌ខ្មៅលាយក្រហម ពាក់ស្លាកលេខ ភ្នំពេញ 1CF-7419 ជិះធ្វើដំណើរតាមបណ្ដោយផ្លូវព្រះនរោត្ដយ៉ាងលឿនក្នុងស្ថានភាពស្រវឹង ទិសដៅពីជើងទៅត្បូង ស្រាប់តែមកដល់ចំណុចកើតហេតុក៏មានរថយន្តតាក់ស៊ីមួយគ្រឿង ពាក់ស្លាកលេខ ភ្នំពេញ 2D-4142 ធ្វើដំណើរតាមបណ្ដោយផ្លូវលេខ៤៦៦ ទិសដៅពីលិចទៅកើត ហើយបានបើកឆ្លងផ្លូវព្រះនរោត្ដមចូលទៅក្នុងបុរីឧទ្យានបាសាក់ ក៏ត្រូវម៉ូតូបុកចំរថយន្តជំហៀងខាងឆ្វេងពេញទំហឹងដួលអូសជាង១០ម៉ែត្ររងរបួសធ្ងន់ ចំណែករថយន្តក៏បានឈប់នៅកន្លែងកើតហេតុផងដែរ។ បន្ទាប់ពីកើតហេតុជនរងគ្រោះត្រូវបានរថយន្តសាមុយមន្ទីរពេទ្យឯកជនមកដឹកបញ្ជូនទៅសង្គ្រោះភ្លាមៗ
ហើយសមត្ថកិច្ចក៏បានទំនាក់ទំនងទៅរកក្រុមគ្រួសារជនរងគ្រោះអោយមកធ្វើការដោះស្រាយជាមួយម្ចាស់រថយន្តដើម្បីបញ្ចប់រឿងនៅកន្លែងកើតហេតុតែម្ដង៕
មតិយោបល់