ភ្នំពេញ ៖ បុរសម្នាក់ស្រវឹងស្រាជិះម៉ូតូក្នុងល្បឿនលឿនក៏ជ្រុលទៅបុករថយន្តកូរ៉េមួយគ្រឿងបត់ឆ្លងផ្លូវ បណ្ដាលអោយដួលម៉ូតូរងរបួសសន្លប់ស្ដូកស្ដឹង ហេតុការណ៍នេះបានកើតឡើងកាលពីវេលាម៉ោង១រំលងអាធ្រាត្រឈានចូលថ្ងៃទី២៣ខែកក្កដាឆ្នាំ២០១៤ ត្រង់ចំណុចមុខមជ្ឈមណ្ឌលកម្សាន្តរ៉ុក តាមបណ្ដោយផ្លូវព្រះមុនីវង្ស ស្ថិតក្នុងសង្កាត់បឹងត្របែក ខណ្ឌចំការមន។
ជនរងគ្រោះឈ្មោះ មាស សារ៉ាន់ឌី អាយុប្រហែល២៥ឆ្នាំជាបុគ្គលិកអគ្គិសនីកម្ពុជា មានទីលំនៅភូមិតាង៉ូវ សង្កាត់និរោធ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ ភ្នំពេញ 1CH-4252 ជិះធ្វើដំណើរតាមបណ្ដោយផ្លូវព្រះមុនីវង្សយ៉ាងលឿនក្នុងស្ថានភាពស្រវឹង ទិសដៅពីជើងទៅត្បូង ស្រាប់តែមកដល់ចំណុចកើតហេតុក៏មានរថយន្តកូរ៉េមួយគ្រឿង ពណ៌ខៀវ មិនចាំស្លាកលេខ ធ្វើដំណើរតាមបណ្ដោយផ្លូវព្រះមុនីវង្ស ទិសដៅពីត្បូងទៅជើងច្រាស់ទិសគ្នា ហើយបានបត់ឆ្វេងឆ្លងផ្លូវ ក៏ត្រូវម៉ូតូបុកចំកន្ទុយរថយន្តពេញទំហឹងដួលអូសរងរបួសសន្លប់ស្ដូកស្ដឹង ចំណែករថយន្តក៏បានបន្ថែមល្បឿនទៅមុខបាត់។
បន្ទាប់ពីកើតហេតុជនរងគ្រោះត្រូវបានរថយន្តសាមុយមន្ទីរពេទ្យឯកជនមកដឹកយកទៅព្យាបាល ស្រាប់តែជនរងគ្រោះដឹងខ្លួនក៏សុំចុះពីរថយន្តសាមុយមកវិញដោយប្រាប់ថាចាំអោយបងប្អូនរបស់គាត់មកទទួលយកវិញ។ ក្រោយកើតហេតុជនរងគ្រោះក៏ត្រូវបានម្ដាយនិងប្អូនមកទទួលយកត្រឡប់ទៅផ្ទះវិញផងដែរ៕
មតិយោបល់