សាកថ្មស្មាតហ្វូនរួចដាក់ក្បែរនៅកន្លែងដេក វាមិនមែនជារឿងល្អនោះទេ ជាក់ស្ដែងដូចជាក្មេងស្រីម្ចាស់ស្មាតហ្វូន Samsung Galaxy S4 មួយនេះជាឧទាហរណ៍។
នៅសប្ដាហ៍មុន Samsung Galaxy S4 របស់ក្មេងស្រីវ័យ ១៣ឆ្នាំម្នាក់ រស់នៅក្នុងរដ្ឋតិចសាសបានផ្ទុះឡើងកណ្ដាលរាត្រី ប៉ុន្តែមិនបណ្ដាលឲ្យនាងរងរបួសនោះទេ។
បើយោងតាមសំដីរបស់ក្មេងស្រីបានឲ្យដឹងថា នៅមុនពេលកើតហេតុ នាងមានអារម្មណ៍ថាធំក្លិនអ្វីម្យ៉ាង រួចក៏ដើររកមើល ពេលនោះស្រាប់តែឃើញមានផ្សែងហុយចេញពីក្រោមខ្នើយរបស់នាង ទើបនាងដឹងថា គឺ Samsung Galaxy S4 បានឆេះ។
ឪពុករបស់ក្មេងស្រីបានឲ្យដឹងថា លោកបានទិញ Samsung Galaxy S4 ឲ្យកូនស្រីប្រើ ប៉ុន្តែមិននឹកស្មានថា វាអាចបង្កជាគ្រោះថ្នាក់ដល់ជីវិតសោះ នេះសំណាងហើយដែលវាមិនផ្ទុះឆេះខ្លាំង។
បញ្ហាដែលកើតមានឡើងនេះ ត្រូវបានគេប៉ាន់ប្រមាណថា មកពីថ្ម Samsung Galaxy S4 វាក្ដៅ នៅពេលសាកថ្ម ហើយដាក់នៅក្រោមខ្នើយទៀត។
នេះជាមេរៀនមួយសម្រាប់អ្នកប្រើប្រាស់ស្មាតហ្វូនទាំងអស់គួរយល់ដឹងផងដែរ ដូច្នេះសូមប្រុងប្រយ័ត្ន ត្រូវទុកដាក់ស្មាតហ្វូនរបស់អ្នកឲ្យនៅឆ្ងាយពីកន្លែងដេក ព្រោះថាវាអាចកើនមានដូចករណីខាងលើ។
គួរបញ្ជាក់ផងដែរថា នេះមិនមែនជាលើកទីមួយនោះទេ ដែលកើតមានករណីបែបនេះនោះ កាលពីមុន ក្មេងស្រីម្នាក់រស់នៅសហរដ្ឋអាមេរិក ក៏ជិតដាច់ភ្លៅដោយសារតែ Samsung Galaxy របស់នាងផ្ទុះឡើងដែរ ខណៈដែលនាងកំពុងតែលេងនៅក្នុងសួនច្បារមុខផ្ទះ៕
មតិយោបល់