ភ្នំពេញ ៖ បុរសម្នាក់ដែលស្រវឹងស្រាជោគជាំបានបើករថយន្តកូរ៉ូឡាមួយគ្រឿងលឿនដូចហោះ មកបុកម៉ូតូហុងដាឌ្រីមសេ១២៥ ពេញទំហឹងបណ្តាលឱ្យអ្នកបើកម៉ូតូរងរបួសធ្ងន់ ហើយអ្នករថយន្តបានព្យាយាមបើករត់គេចក៏ជ្រុលទៅបុកជាមួយស្លាកប៉ាណូនៅកណ្តាលសួនពុះចែកទ្រូងផ្លូវ បណ្តាលឱ្យបើកបោកក្បាលទៅនិងកញ្ចក់រថយន្តរងរបួសធ្ងន់ ។ ហេតុការណ៍នេះកើតឡើងកាលពីវេលាម៉ោង១០ និង៣០នាទីយប់ ថ្ងៃទី ២៩ កក្កដា២០១៤ នៅចំណុចទល់មុខស្នាក់ការគណបក្សប្រជាជនកម្ពុជា តាមបណ្តោយផ្លូវលេខ២០០៤ ស្ថិតក្នុងសង្កាត់ទឹកថ្លា ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តកូរ៉ូឡា ពណ៌ស្ករ មួយគ្រឿង ពាក់ស្លាកលេខភ្នំពេញ 2I-9931 បើកបរដោយបុរសស្រវឹងស្រាជោគជាំម្នាក់ តាមផ្លូវ២០០៤ ក្នុងទិសដៅពីលិចទៅកើត ដោយបើកលឿនដូចហោះនិងរេពេញផ្លូវ មកដល់ចំណុចកើតហេតុក៏បានជ្រុលចង្កូតទៅបុកពេញទំហឹងជាមួយម៉ូតូ ហុងដាឌ្រីម សេ១២៥ មួយគ្រឿង ពណ៌ខ្មៅ ពាក់ស្លាកលេខខេត្តព្រះសីហនុ1A-7498 បើកបរដោយបុរសម្នាក់ តាមផ្លូវ២០០៤ ក្នុងទិសដៅ ពីកើតទៅលិច (បញ្ច្រាសទិសគ្នា) បណ្តាលឱ្យបុរសបើកម៉ូតូរងរបួសធ្ងន់ បន្ទាប់មកអ្នកបើករថយន្តព្យាយាមបើករត់គេច ក៏បានទៅបុកជាមួយស្លាកប៉ាណូដែលនៅចំកណ្តាលសួន ពុះចែកទ្រូងផ្លូវ បោកក្បាលអ្នកបើករថយន្តទៅនិងកញ្ចក់រថយន្តរងរបួសធ្ងន់។
ក្រោយពេលកើតហេតុជនរងគ្រោះត្រូវរថយន្តសាមុយ ដឹកទៅសង្គ្រោះបន្ទាន់នៅមន្ទីរពេទ្យ ចំណែករថយន្ត និងម៉ូតូត្រូវសមត្ថកិច្ចយកទៅរក្សាទុកនៅអធិការខណ្ឌសែនសុខ រងចាំដោះស្រាយតាមផ្លូច្បាប់ ៕
មតិយោបល់