ខេត្តកំពង់ធំ ៖ លោកធីវ វណ្ណធី ប្រធានមន្ទីរកសិកម្មខេត្តកំពង់ធំ ត្រូវបានមន្ត្រីក្រោមឪវាទមួយចំនួនធំរិៈគន់ថាជាមេពូកែស៊ីមិនប្រណីតែមិនសូវចេះធ្វើ ចេះតែកឹបកេងថវិកាជាតិនិងថវិកាកម្មវិធីលើគ្រប់ជំពូក ធ្វើឲ្យរដ្ឋបាត់បង់ថវិកាក្នុងមួយឆ្នាំៗរាប់រយលានទៅលើការកឹបកេងថវិកានេះ។
តាមសេចក្តីរាយការណ៍បានឲ្យដឹងថា ចាប់តាំងពីលោកធីវ វណ្ណធី ត្រូវបានតែងតាំងជាប្រធានមន្ទីរកសិកម្មខេត្តកំពង់ធំមក រូបគាត់បានបង្កើតបក្ខពួកប្រព្រឹ្តអំពើពុករលួយទាំងការកឹបកេងថវិកាជាតិនិងថវិកាកម្មវិធីរួមនិងបណ្តែតបណ្តោយឲ្យមន្ត្រីពេទ្យសត្វ ដើរធ្វើព្យុះភ្លៀងជំរិតទារប្រាក់ខុសច្បាប់ពីឈ្មួញនៅតាមទីសត្តឃាតនិងតាមរថយន្តដឹកគោ ក្របី មាន់ ទារ និងជ្រូក ដើម្បីជាប្រយោជន៍របស់គាត់និងបក្ខពួក ជាហេតុធ្វើឲ្យបះពាល់ដល់គោលនយោបាយរបស់រាជរដ្ឋាភិបាល ស្តីពីការលុបបំបាត់អំពើពុករលួយយ៉ាងធ្ងន់ធ្ងរ។
តាមប្រភពដដែលបានឲ្យដឹងថាដោយសារតែរូបលោកធីវ វណ្ណធី ជាមនុស្សពូកែស៊ី ពូកែគាបសង្កត់ឈ្មួញ តែមិនពូកែធ្វើនោះ បានបង្កឲ្យមន្ត្រីក្រោមឪវាទជាច្រើន កើតការក្តៅក្រហាយនិងប្រុងផ្ទុះរឿងចេញមកក្រៅ ប៉ុន្តែមន្ត្រីខ្លះដែលចេះតែខំទប់ដើម្បីរងចាំថ្ងៃចូលនិវត្តន៍ មិនចង់មានរឿងវែងឆ្ងាយ។ តាមប្រភពបានបញ្ជាក់ថានៅឆ្នាំ២០១៣ កន្លងទៅមន្ទីរកសិកម្មខេត្តកំពង់ធំបានចំណាយថវិកាសរុបអស់ចំនួន១,៦៤៥,៤លានរៀល ដោយក្នុងនោះចំណាយនៅជំពូក៦០អស់ចំនួន២៧២,៧លានរៀល ចំណាយលើជំពូក៦១អស់ចំនួន២៩៨,៥លានរៀល ចំណាយលើជំពូក៦២អស់ចំនួន៨៨លានរៀល ចំណាយលើជំពូក៦៤អស់ចំនួន៧២០,៩លានរៀល ចំណាយលើជំពូក៦៥អស់២៦២,៩លានរៀល ចំណាយលើជំពូក៦៣អស់ចំនួន២,២លានរៀល។
សម្រាប់ការចំណាយទាំងនេះត្រូវបានលោកធីវ វណ្ណធី និងបក្ខពួកកឹបកេងថវិកាអស់រាប់រយលានរៀល ហើយបានធ្វើការបំប៉ោងការចំណាយនានាដើម្បីបង្រប់ចំនួនដែលគាត់និងបក្ខពួកបានដកយកថវិកាជាតិមកប្រើប្រាស់។ ហើយសម្រាប់ឆ្នាំ២០១៤នេះលោកធីវ វណ្ណធី បានលេងល្បិចកឹបកេងថវិកាជាតិមួយឈុតថែមទៀត ដោយយករូបមន្តរបៀបកឹបកេងថវិកាជាតិដូចឆ្នាំ២០១៣ដែរ។
នៅក្នុងឆ្នាំ២០១៤នេះគឺមន្ទីរកសិកម្មមានគម្រោងចាយថវិកាចំនួន១,៦៧៨,២លានរៀល ដោយក្នុងនោះនៅជំពូក៦០មានថវិកា២០០,៨លានរៀល ជំពូក៦១មានថវិកា១៩៤,៧លានរៀល ជំពូក៦២មានថវិកា៩៩,៥លានរៀល ជំពូក៦៤មានថវិកាចំនួន៩៣០,៦លានរៀលជំពូក៦៥មានថវិកា២៥០,០លានរៀល និងជំពូក៦៣មានថវិកា២,៦លានរៀល។
សម្រាប់ថវិកាឆ្នាំ២០១៤ រហូតមកដល់ពេលនេះគឺគេមិនទាន់ចាយអស់ទាំងស្រុងទេ ហើយនៅពេលបញ្ចប់ការចាយវាយថវិកាសម្រាប់ឆ្នាំ២០១៤ គឺថវិកាមួយចំនួននិងត្រូវគេបន្សល់ទុកខ្លះដើម្បីថាពួកគេបានចាយថវិកាសន្សំសំចៃនិងតម្លាភាពក្នុងបំណងបន្លំភ្នែកក្រុមអធិការកិច្ចជើងប្រាំ។
បើនិយាយអំពីរឿងអាស្រូវនៅមន្ទីរកសិកម្មខេត្តកំពង់ធំគឺមានច្រើនករណី ដោយមិនអាចមានពេលរាប់រាបក្នុងរយៈពេលខ្លីបាន សូមចាំតាមដានព័ត៌មានលម្អិតស្តីពីអំពើពុករលួយដែលគេរួមដៃគ្នាកឹបកេងថវិកាជាតិ តាមជំពូក តាមគណនេយ្យ និងអនុគណនេយ្យានានានៃខ្ទង់ចំណាយថវិកាជាតិជាបន្តទៀត៕
មតិយោបល់