កំពង់ឆ្នាំង៖ បុរសម្នាក់បានសន្លប់និងរបួសធ្ងន់ធ្ងរ ក្រោយពីរូបគេបានបើកម៉ូតូយ៉ាងលឿនក្នុងភាពស្រវឹងមិនបានមើលទៅមុខ ក៍បានបុករថយន្តហាយឡេនដ័របោកក្បាលនឹងថ្នល់។ហេតុការណ៍នេះបានកើតឡើងនៅវេលាម៉ោង៥និង១០នាទីល្ងាចថ្ងៃទី២៤ ខែកញ្ញា ឆ្នាំ២០១៤ លើផ្លូវកៅស៊ូក្នុងភូមិចំការតាម៉ៅ ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។
នគរបាលចរាចរណ៍ស្រុករលាប្អៀរបានអោយដឹងថា៖ជនរងគ្រោះនោះឈ្មោះ ជាង សារី អាយុ៣០ឆ្នាំ រស់នៅភូមិសន្ទូច ឃុំស្រែថ្មី ស្រុករលាប្អៀរ។
សាក្សីនៅកន្លែងគ្រោះថ្នាក់បានឃើញហេតុការណ៍នេះបានអោយដឹងថា៖ មុនពេលកើតហេតុគេបានឃើញ ជនរងគ្រោះបានបើកម៉ូតូម៉ាកហុងដាឌ្រីម១២៥ ពណ៌ខ្មៅ ពាក់ស្លាកលេខ កំពង់ស្ពឺ 1C-7270 បើកបរពីទិសខាងលិចទៅកើត ចេញពីផ្ទះខ្លួនបំរុងទៅផ្សារ ខណៈមកដល់ចំណុចកើតហេតុ គេក៍បានងាកមើលខាងស្តាំដៃ ដោយមិនបានមើលផ្លូវខាងមុខឡើយ ហើយក៍បានទៅបុកចំចង្កៀងនិងកង់ខាងឆ្វេងរថយន្តហាយឡេនដ័រពណ៌ទឹកប្រាក់ ពាក់ស្លាកលេខភ្នំពេញ 1AA-1563 ដែលកំពុងបើកច្រាស់ទិសគ្នាក្នុងល្បឿនយឺត បណ្តាលអោយបុរសរងគ្រោះខ្ទាតផ្លោងឡើងលើ ហើយធ្លាក់បោកក្បាលនឹងថ្នល់សន្លប់ និងរងរបួសធ្ងន់ធ្ងរ។
ក្រោយពេលកើតហេតុ អ្នកស្គាល់គ្នាបានដឹកបុរសនោះ យកទៅសង្គ្រោះនៅមន្ទីរពេទ្យខេត្តកំពង់ឆ្នាំង ដើម្បីអោយក្រុមគ្រូពេទ្យជួយសង្គ្រោះព្យាបាល នៅក្នុងហេតុការណ៍នេះគេឃើញម្ចាស់រថយន្តហាយឡេនដ័រមិនបានបើករថយន្តគេចទៅណាឡើយ។
អ្នកឃើញហេតុការណ៍រង់ចាំមើល ថាតើសមត្ថកិច្ចនគរបាលចរាចរណ៍ ដោះស្រាយរបៀបណា ខណៈអ្នកបង្កបានបើកម៉ូតូមានល្បឿនលឿន ហើយបានទៅបុករថយន្តគេនៅខាងឆ្វេងដៃខ្លួន ក្នុងភាពស្រវឹងទៀតផង។ប្រជាពលរដ្ឋនៅកន្លែងនោះបានសំណូមពរផងដែរដល់លោកប្រធានមន្ទីរសាធារណៈការខេត្ត មេត្តាជួយពិនិត្យមើលដីដែល ទឹកភ្លៀងបានហូរគ្របលើចំណែកថ្នល់មួយចំហៀងទៅហើយនោះ ករណីនេះក៍អាចបង្កជាគ្រោះថ្នាក់ដល់អ្នកបើកបរផងដែរ។
ដោយឡែកនៅក្នុងល្ងាចថ្ងៃដដែរនេះ ក៏មានហេតុការណ៍គ្រោះថ្នាក់ចរាចរណ៍មួយទៀតបានកើតឡើងនៅវេលាម៉ោង៥និង០៥នាទីថ្ងៃទី២៤ ខែកញ្ញា ឆ្នាំ២០១៤ទៀតដែរ នៅចំណុចបឹងកៅ ស្ថិតក្នុងភូមិក្រាំងតាមុំ ស្រុកទឹកផុស ខេត្តកំពង់ឆ្នាំង រវាងម៉ូតូនិងរថយន្តបុកគ្នា បានបង្កអោយមនុស្ស៣នាក់ រងរបួសធ្ងន់៕
មតិយោបល់